وسى بەرىگە دەيىن تۋريزم دەسە جۇرت شەت ەلگە, تەڭىزگە بارۋدى ويعا الاتىن. بۇل ورايدا ىرگەمىزدە تۇرعان دالانىڭ تابيعاتىن, سۇلۋلىعىن, حالقىمىزدىڭ تاريحىنا, داستۇرىنە, اڭىز-ءافسانالارىنا بايلانىستى ورىنداردى كورۋدى, وزگە جۇرتقا كورسەتۋدى كوپ قاپەرگە الا قويماعانىمىز جاسىرىن ەمەس. قازىر جەرگىلىكتى تۋريزمگە كوزقاراستىڭ وزگەرە باستاعانى بىلىنەدى.
قوستانايدا «BESTكz» تۋريستىك وپەراتورى بارلىق جۇمىسىن بۇگىندە ىشكى ءتۋريزمدى دامىتۋعا باعىتتاپ وتىر. بۇدان ءۇش جىل بۇرىن جۇمىسىن باستاعان تۋريستىك وپەراتور الدىمەن ناۋىرزىم قورىعىن كورگىلەرى كەلەتىن قوناقتاردى كوپتەپ تارتۋدى قولعا العان بولاتىن.
راسىندا قوستاناي-تورعاي وڭىرىندە ەكوتۋريزمدى دامىتۋعا مول مۇمكىنشىلىكتەر بار. بۇل كۇندە يۋنەسكو-نىڭ بۇكىلالەمدىك مادەني جانە تابيعي مۇراسى تىزىمىنە ەنۋى ارقىلى دۇنيە جۇزىنە بەلگىلى بولىپ وتىرعان قورىق تۋريستەردى تۇما تابيعاتىمەن تارتاتىنىنا ماماندار ءباس تىگەدى. مۇندا ەش جەردە كەزدەسپەيتىن اعاش ءتۇرى, الۋان ءتۇرلى وسىمدىكتەر الەمى, «قىزىل كىتاپقا» ەنگەن جانۋارلار, تۇششى بۇلاقتار الەمنىڭ ءار شالعايىنداعى ءىرى قالالاردا تاس ءۇي مەن تاس كوشەدەن باسقا كورگەنى از, ءتۇتىن جۇتقان جۇرتتى قالايشا قىزىقتىرماس ەكەن؟ ءۇش جىلدان بەرى ىشكى ءتۋريزمدى دامىتۋعا تالپىنىس جاساپ جۇرگەن «BESTكz» تۋريستىك وپەراتورى الداعى جىلى وتەتىن ەكسپو-2017 حالىقارالىق كورمەگە كەلگەن شەتەلدىكتەرگە ناۋىرزىم قورىعىن كورسەتۋ ءۇشىن بيىل جازىمەن كوپتەگەن دايىندىق جۇمىستارىن جۇرگىزدى.
«BESTكz» تۋريستىك وپەراتورىنىڭ ديرەكتورى گۇلميرا قاپەنوۆانىڭ ايتۋىنشا, ىشكى ءتۋريزمدى دامىتۋعا جەرگىلىكتى تۇرعىنداردىڭ اتسالىسۋى دا قۋانتىپ وتىر. وتكەن جازدا ناۋىرزىم قورىعىنا التى باعىت بويىنشا وزدەرى تىلەك بىلدىرگەن ءجۇزقارالى تۋريستەردى اپاردى. ناۋىرزىم اۋدانىنىڭ ورتالىعى قارامەڭدى سەلوسىنداعى شاتحانانىڭ دايىنداعان ۇلتتىق تاعامدارىنا تۋريستەردىڭ بارلىعىنىڭ كوڭىلى تولدى. ال داستارقان ءمازىرى تەك ىشكى تۋريزمدە عانا ەمەس, جالپى ءتۋريزمنىڭ شەشۋشى تەتىكتەرىنىڭ ءبىرى دەسە جاراسادى. الداعى جىلى ەكسپو-2017 كورمەسى وتەتىن ۋاقىتتا تۋريستەر كەلەتىن ناۋىرزىم قورىعىندا ولاردى قازاقتىڭ ءداستۇر-سالتىن كورسەتەتىن كيىز ۇيلەرى كۇتەتىن بولادى.
سوڭعى ۋاقىتتا تورعاي ءوڭىرىنىڭ ىشكى ءتۋريزمنىڭ مەكەنىنە اينالاتىنىنا سەنىم قالىپتاسىپ كەلەدى. ۇلى دالانى ءبىر كورۋگە اركىم-اق قۇشتار. «تورعاي شارشىسى» دەگەن اتپەن بەلگىلى بولىپ وتىرعان گەوگليفتەردىڭ تابىلۋى دا تەك ىشكى ءتۋريزمدى دامىتۋعا ىقپال جاساپ قانا قويمايدى, الەم تۋريستەرىنىڭ تورعاي دالاسىنا دەگەن ىنتىزارلىعىن ارتتىرارى ءسوزسىز. «BESTكz» تۋريستىك وپەراتورىنىڭ ماماندارى تەك تورعاي دالاسى مەن ناۋىرزىم عانا ەمەس, قوستاناي وبلىسىنداعى تانىمدىق, تاريحي ورىندار مەن تابيعات تاماشاسى بار جەرلەردىڭ بارلىعىن دا ءتۋريزمدى دامىتۋدى قامتۋعا تالاپتانىپ وتىر. ارينە, ءوڭىردىڭ تابيعات جاعدايىنا بايلانىستى قيىندىقتار دا جوق ەمەس. دەگەنمەن, ىزدەنىستەر ءىزسىز, ناتيجەسىز قالمايتىنى انىق.
– ءبىز قوستاناي قالاسىن ءتۋريزمنىڭ حالىقارالىق موبيلدىك قوسىمشاسىنا قازاق, ورىس, اعىلشىن تىلىندە ەنگىزىپ قويدىق. الداعى ۋاقىتتا قىتاي تىلىندە ءماتىن دايىندايتىن بولامىز. مىسالى, دۇنيە ءجۇزىنىڭ قاي نۇكتەسىنەن بولسىن, ادامدار ينتەرنەت ارقىلى موبيلدىك قوسىمشادان قوستاناي قالاسىن اشادى دا, قىزىقتى ورىنداردى قارايدى. قازىردىڭ وزىندە ءبىزدىڭ پاراقشامىزدى ءبىراز ادامنىڭ قاراعانى بەلگىلى بولدى, – دەيدى «BESTكz» تۋريستىك وپەراتورىنىڭ ديرەكتورى گۇلميرا قاپەنوۆا.
وڭىردە ءتۋريزمدى دامىتۋ جان-جاقتى جۇمىستى قاجەت ەتەتىن كاسىپكەرلىكتىڭ ءتۇرى ءارى تابىس كوزى ەكەنىن وسى ىسكە تالاپتانعاندار الدەن-اق ءبىلىپ وتىر. ىشكى ءتۋريزمدى دامىتۋعا مۇرىندىق بولعان ناۋىرزىم قورىعى ەكسپو-2017 كورمەسى كەزىندە وعان كوپتىڭ كوزىن تاعى ءبىر جەتكىزەتىن بولار.
ءنازيرا جارىمبەتوۆا
«ەگەمەن قازاقستان»
قوستاناي