ورال قالاسىندا, شاعان وزەنىنىڭ وڭ جاعالاۋىندا ارناۋلى جولدىڭ اشىلۋى ۆەلوسيپەدشىلەرگە ۇلكەن قۋانىش سىيلادى. ونىڭ ۇزىندىعى – 3 شاقىرىمعا جۋىق. ءارى وسى ارادان بۇلدىرشىندەر مەن بالالارعا ارنالعان شاعىن اينالىم جول قوسا تۇرعىزىلعان. ۆەلوسيپەدشىلەر جولى ارنايى سىزىقتارمەن بەلگىلەنىپ تاڭبالانعان. بۇعان قوسا, جازدى كۇنى ۆەلوسيپەدشىلەرگە, قىس كەزىندە شاڭعىشىلارعا ارنالعان ءمودۋلدى عيمارات پەن وت جاعۋ قازاندىعى سالىنعان.
شاعان وزەنىنىڭ وڭ جاعالاۋىن ۆەلوسيپەد جولىنا اينالدىرۋ جونىندەگى جوبانى «كپو ب.ۆ» اتتى شەتەلدىك كومپانياسى قارجىلاندىرعان. بۇعان 214 ميلليون تەنگە قاراجات جۇمسالعان. وسى كەزگە دەيىن وڭىردەگى ۆەلوسپورتپەن اينالىسۋشىلار ءوز جاتتىعۋلارىن ورال قالاسىنىڭ ماڭىنداعى بورتاۋ دەپ اتالاتىن ەلدى مەكەندەگى جولدىڭ بويىندا وتكىزىپ كەلىپتى. بۇل, ارينە, ۆەلوسيپەدكە ارنالماعان. ەندى ولار ءوز جاتتىعۋلارىن ارنايى تۇرعىزىلعان جولدا وتكىزۋگە مۇمكىندىك الىپتى. بۇل جونىندە گازەت تىلشىسىنە 14 جاسار جاس ورەن نيكيتا باتيۋكوۆ ايتىپ بەردى. سونىمەن بىرگە, ايسۇلتان اشىعاليەۆ ەسىمدى 12 جاستاعى بالا دا قۋانىشتان ءجۇزى جايناپ, ەر جەتكەن سوڭ الەكساندر ۆينوكۋروۆتاي وليمپيادا «التىنىن» يەلەنىپ, ءوز ەلىنىڭ كوك تۋىن بيىككە كوتەرسەم دەگەن ويى بار ەكەنىن جەتكىزدى.
– ەلباسىمىز نۇرسۇلتان نازارباەۆ 2020 جىلعا دەيىن بۇقارالىق سپورتپەن شۇعىلدانۋشىلاردىڭ سانىن 30 پايىزعا دەيىن جەتكىزۋ جونىندە تاپسىرما بەرگەنى بەلگىلى. ەلىمىزدىڭ باتىس قاقپاسىندا ۆەلوسيپەد جولىنىڭ پايدالانۋعا بەرىلۋى ونى ويداعىداي ورىنداۋعا وڭ سەرپىن بەرەدى. ءارى وسى بىتكەن ءىس جاسوسپىرىمدەردىڭ قاۋىپسىزدىگىن ساقتاۋدىڭ دا باستى جولى, – دەيدى باتىس قازاقستان وبلىستىق ۆەلوسپورت فەدەراتسياسىنىڭ پرەزيدەنتى اسقار شوراەۆ.
تەمىر قۇسايىن,
«ەگەمەن قازاقستان»
ورال