ينۆەستيتسيالار جانە دامۋ ءمينيسترى جەڭىس قاسىمبەك ۇكىمەت وتىرىسىنىڭ قورىتىندىسىنا ارنالعان ءباسپاسوز كونفەرەنتسياسىندا قازاقستاننىڭ CRIRSCO پايدالى قازبالار بويىنشا ەسەپ بەرۋ جۇيەسىنە كوشۋىنىڭ ارتىقشىلىعىن مالىمدەدى.
«ەلىمىزدىڭ CRIRSCO قاتارىنا قوسىلۋى – بۇل ەلدەگى پايدالى قازبالاردىڭ, قورلاردىڭ بولۋىن راستايتىن, سونداي-اق بۇگىندە بىزدەگى بار اقپاراتتى راستاۋدىڭ ۇلكەن قادامى. بۇل ستاندارت بويىنشا جۇمىس ىستەۋ قازاقستانعا حالىقارلىق بيرجالاردا مينەرالدى رەسۋرستارى بار دەرەكتەر بازاسىن جاساۋعا مۇمكىندىك بەرەدى. ال شەتەلدىك ينۆەستورلار ءۇشىن قازاقستاننىڭ CRIRSCO بويىنشا جۇمىس ىستەۋى بۇل اقپاراتتىڭ نەگىزگى دالەلى بولىپ ەسەپتەلەدى. وسىعان بايلانىستى ءبىز CRIRSCO اياسىندا جۇمىس ىستەۋ شەتەلدىك ينۆەستورلاردى تارتۋعا ۇلكەن سەپتىگىن تيگىزەدى دەگەن ۇمىتتەمىز», – دەدى ج. قاسىمبەك.
سونىمەن قاتار, ول تاۋەلسىزدىك جىلدارى تارتىلعان ينۆەستيتسيالاردىڭ 60%-عا جۋىعى جەر قويناۋىن پايدالانۋ, مۇناي-گاز جانە تاۋ-كەن مەتاللۋرگيا سالالارىنا اۋدارىلعانىن ايتتى. بۇعان سايكەس, وسى سالالارداعى ستاندارتتاردى ارتتىرۋ قوسىمشا ينۆەستيتسيالاردى تارتۋعا مۇمكىندىك بەرەدى. ءوز كەزەگىندە بۇل ونەركاسىپ سالاسىنىڭ ىلگەرىلەۋىنە ىقپال ەتەدى.
CRIRSCO-نىڭ كوپشىلىككە ەسەپ بەرۋىنىڭ حالىقارالىق ستاندارتتارىن الەمدىك بيرجالار جانە بانكتەر مويىنداعان.