پاراليمپيادا ويىندارىنىڭ جەڭىمپازدارى مەن جۇلدەگەرلەرىنىڭ جانە ولاردىڭ باپكەرلەرىنىڭ سپورتتىق ەڭبەگىن اقشالاي باعالاۋدى تەڭەستىرۋ تۋرالى باستاما مەملەكەت قولداۋىنا يە بولادى, دەپ حابارلادى «اق جول» دەموكراتيالىق پارتياسىنىڭ ءباسپاسوز قىزمەتى.
«رەسپۋبليكالىق بيۋدجەتتىك كوميسسيانىڭ 2016 جىلى 22 قىركۇيەك كۇنگى №22 شەشىمىمەن پاراليمپيادا ويىندارىنىڭ جەڭىمپازدارى مەن جۇلدەگەرلەرىن جانە ولاردىڭ باپكەرلەرىن كوتەرمەلەۋ وليمپيادا ويىندارىنىڭ جۇلدەگەرلەرىن كوتەرمەلەۋ مولشەرىمەن تەڭەستىرۋ باستاماسى ماقۇلداندى», - دەلىنگەن پرەمەر-مينيستر ب.ساعىنتاەۆتىڭ قولى قويىلعان رەسمي جاۋاپتا.
سونىمەن بىرگە حاتتا قر ۇكىمەتىنىڭ ءتيىستى قاۋلى جوباسى تۋرالى مەملەكەتتىك ورگانداردىڭ كەلىسىمگە كەلگەنى جانە زاڭناماعا سايكەس قابىلداناتىنى حابارلاندى.
ەسكە سالا كەتسەك, مۇمكىندىگى شەكتەۋلى جانداردىڭ سپورتتىق ناتيجەلەرى جوعارى باعالانسا دا, ءبىزدىڭ ەلىمىزدە پاراليمپيادا چەمپيوندارىنا بەرىلەتىن سىياقىنىڭ رەسمي بەكىتىلگەن مولشەرى وليمپيادا جەڭىمپازدارىنا قاراعاندا 5 ەسە از.
21 قىركۇيەك كۇنى ءماجىلىستىڭ پلەنارلى وتىرىسىندا «اق جول» فراكتسياسى ازاماتتاردىڭ سپورتتىق ناتيجەلەرىن مەملەكەتتىڭ بىردەي باعالاۋى تۋرالى ماسەلەنى قايتا كوتەردى. ەڭ العاش وليمپياداشىلار مەن پاراليمپياداشىلاردى تەڭدەي ىنتالاندىرۋ قاجەتتىگى تۋرالى دەپۋتاتتىق ساۋالدى «اق جول» پارتياسى 2014 جىلدىڭ 2 ساۋىرىندە ۇكىمەتكە جىبەردى. وندا ۇكىمەت قازاقستاندا پاراليمپيادا چەمپيوندارى مەن جۇلدەگەرلەرىنىڭ ءالى شىقپاعاندىعىن ايتىپ جاۋاپ بەرگەن ەدى.