الماتىدا قاندى تەراكت ۇيىمداستىرعان رۋسلان كۇلەكباەۆ سوت وتىرىسىندا سوت تارتىبىنە باعىنباعاندىقتان سوت زالىنان قۋىلدى, دەپ حابارلايدى قازاقپارات ءتىلشىسى.
الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ەرلان بولاتوۆ وسىعان دەيىنگى سوت وتىرىستارىندا سوت وكىلدەرىنە ورنىنان تۇرىپ, قۇرمەت كورسەتپەگەن كۇلەكباەۆقا تاعى دا ەسكەرتۋ جاسادى.
«كەشە ءسىز اۋىرىپ وتىرمىن دەگەن سوڭ وتىرىپ جاۋاپ بەرۋگە كەلىستىك. بىراق, بۇگىن سوت ءتارتىبى بويىنشا تۇر دەگەندە تۇراسىز, سول ءۇشىن الدىڭعى ورىندىققا وتىرىڭىز», - دەدى ەرلان بولاتوۆ.
بۇعان كۇلەكباەۆ ەستىمەگەن كەيىپ تانىتىپ تور ىشىندەگى ەكىنشى ورىندىققا بارىپ وتىردى. الدىنا وتىرىڭىز دەگەن سۋديا سوزىنە: «نە بولدى؟» دەپ جاۋاپ بەردى.
وسىدان كەيىن سۋديا ەرلان بولاتوۆ كۇلەكباەۆتى زالدان الىپ كەتۋدى بۇيىرىپ, ادۆوكاتتارىنا ەسكەرتۋ جاسادى.