بۇل – مويىندالعان كوشباسشىلىق

قازاقستان رەسپۋبليكاسىنىڭ پرەزيدەنتى ن.ءا.نازارباەۆقا

قۇرمەتتى نۇرسۇلتان ءابىش ۇلى! سىزگە بۇكىل الەمدە يادرولىق قارۋدان باس تارتۋ جولىندا دايەكتى كۇرەس جۇرگىزىپ كەلە جاتقان دانا ءارى الىستى بولجايتىن جاھاندىق كوشباسشى رەتىندە لەبىزىمدى ءبىلدىرۋ قۇرمەتىنە يە بولىپ وتىرمىن. قازىرگى بەيمازا دۇنيەدە يادرولىق, ونىڭ ىشىندە تەرروريستىك  قاتەر اۋقىمى وسە ءتۇسىپ وتىر جانە يادرولىق قارۋ قولدانۋ قاۋپى بار جانجالدار ادامزات الدىندا تۇرعان باستى جاھاندىق پروبلەمالاردىڭ ءبىرى بولىپ تابىلادى. قازاقستان رەسپۋبليكاسى ءسىز­دىڭ كۇش-جىگەرىڭىزدىڭ ارقاسىندا ۋاقىت­تىڭ وسىنداي سىن-قاتەرلەرىنە قار­سى ءىس-قيمىل مەن يادروسىز الەمگە قا­راي جاھاندىق قوزعالىس سالاسىندا مويىندالعان كوشباسشى بولىپ وتىر. 1991 جىلى, تەك مەملەكەتتىك كورە­گەندىك پەن كوشباسشىلىق مىنەز تانى­تا وتىرىپ, ءسىز سەمەي يادرولىق پوليگونىن جابۋ تۋ­رالى بىردەن-ءبىر دۇرىس شەشىم قابىلدادىڭىز. ال 1994 جىلى ءسىزدىڭ كۇش-جىگەر جۇم­ساۋىڭىزدىڭ ناتيجەسىندە قازاق­ستان اۋماعىنان سوڭعى يادرولىق وقتۇم­سىقتار اكەتىلدى. ءسىز باسقاراتىن مەملەكەتتىڭ ازاماتتارى باتىلدىق پەن شەشىمدىلىك كورسەتىپ, يادرولىق فانتومدار بيلىك قۇرعان الەمگە قاسقايىپ قارسى شىعىپ, وزدەرىنىڭ بالالارى مەن بولاشاق ۇرپاعىنا يادرولىق قاتەردەن ازات ەلدە ءومىر ءسۇرۋ باقىتىن سىيلادى. قازاقستان رەسپۋبليكاسىنا ياد­روسىز ەل مارتەبەسىن قامتاماسىز ەتكەن  وسىنداي وتكىر دە تاعدىرشەشتى قا­دامدار الدىڭعى قاتارلى جانە سەنىمدى دامىپ كەلە جاتقان ءبىر مەملەكەت شەڭ­بەرىندە قاۋىپتى يادرولىق قارۋ-جاراق تەحنولوگيالارىنان باس تارتۋ ءمۇم­كىندىگىن عانا كورسەتىپ قويماي, بۇكىل ادامزات ءۇشىن بەيبىت يادروسىز بو­لا­شاققا دەگەن ءۇمىت وتىن جاقتى. يادرو­لىق قارۋدان ازات ورتالىق ازيا ايما­عىن قۇرۋ – ءسىزدىڭ جاھاندىق تۇراق­تىلىقتى قامتاماسىز ەتۋ جولىندا شەشۋشى مانگە يە تاريحي ەڭبەگىڭىز. بۇگىنگى كۇردەلى حالىقارالىق جاع­دايدا قۋاتتى ەۋرازيالىق دەرجا­ۆانىڭ كوشباسشىسى رەتىندە ناق ءسىز ەۋروپادا يادروسىز ايماق قۇرۋ بو­يىنشا قوزعالىسقا باسشىلىق ەتە وتىرىپ, وركەنيەت دامۋىن يادروسىز ارناعا باعىتتاي الاسىز. مۇنىڭ ور­نىقتى دامۋ مەن بۇكىل پلانەتانىڭ قاۋىپسىزدىگىن قامتاماسىز ەتۋگە ىقپال ەتەتىنى ءسوزسىز. مەنىڭ بۇل پىكىرىمدى رەسەيدەگى, قازاقستانداعى, تمد ەلدەرىندەگى, ەۋ­روپا مەن ورتالىق ازياداعى ميل­ليونداعان ادامنىڭ بولىسەتىنىنە جانە قولدايتىنىنا سەنىمدىمىن. رەسەيلىك انتيادرولىق قوزعالىستىڭ اتىنان ءبىزدىڭ ەلدەرىمىزدىڭ يادرولىق قارۋدان ازات الەمگە بەت العان جولداعى ىنتىماقتاستىعىنا بارىنشا ۇلەس قوسۋعا دايىن ەكەندىگىمىزدى بىلدىرەمىن. ۇلكەن قۇرمەتپەن, ماكسيم شينگاركين, VI شاقىرىلىمداعى مەملەكەتتىك دۋما دەپۋتاتى, قورعانىس جونىندەگى كوميتەت مۇشەسى