قۇرلىقتىق حوككەي ليگاسىندا ەل نامىسىن قورعايتىن استانانىڭ «بارىسى» بيىلعى ماۋسىمدى الا-قۇلا باستادى. ءتىپتى العاشقى ءۇش ويىندا قارسىلاستارىنا جول بەرىپ, جانكۇيەرلەرىن ءبىراز جابىرقاتىپ العان بولاتىن. وسىدان كەيىن كلۋب باسشىلىعى اندرەي نازاروۆتىڭ ورنىنا باس جاتتىقتىرۋشى ەتىپ بەلارۋس
مامانى ەدۋارد زانكوۆەتستى تاعايىندادى. تاياۋدا جاڭا جاتتىقتىرۋشىعا كوكەيىمىزدە جۇرگەن كەيبىر سۇراقتاردى قويعان ەدىك.
– ەدۋارد كونستانتينوۆيچ, ءسىزدىڭ «بارىسقا» كەلگەنىڭىزگە ءبىر ايدىڭ ءجۇزى بولدى. ويىنشىلارمەن ءتىل تابىسىپ ۇلگەردىڭىز بە؟
– العاشقى كۇننەن باستاپ ويىنشىلارمەن, كوماندانىڭ ليدەرلەرىمەن جاقىن تانىسىپ, ارالاسۋعا ەرەكشە كوڭىل ءبولدىم دەسەم, قاتەلەسپەيمىن. بۇعان مەنىڭ اعىلشىن ءتىلىن ءبىلۋىم دە وڭ اسەرىن تيگىزدى. سوندىقتان بۇل ماسەلەدە ەشقانداي كەدەرگى بولعان جوق. بارلىعى مەنىڭ كوڭىلىمنەن شىقتى. ءتىپتى, بۇگىندە الداعى باعىت-باعدارىمىزدى دا ايقىنداپ الدىق. قازىر سول ويلاعانىمىزدى جۇزەگە اسىرۋ ءۇشىن جۇمىس ىستەۋدەمىز. باستى ماقساتىمىز – ليگانىڭ پلەي-وفف كەزەڭىنە شىعۋ. بۇل – كلۋب باسشىلىعىنىڭ دا الدىمىزعا قويىپ وتىرعان مىندەتى.
– قانشا دەگەنمەن, كوماندانى جاڭا ماۋسىمعا باسقا مامان دايىندادى. بۇل كوزدەگەن ماقساتىڭىزعا قول جەتكىزۋگە كەدەرگىسىن تيگىزەدى دەپ ويلامايسىز با؟
– ارينە, كەز كەلگەن جاتتىقتىرۋشىنىڭ جاڭا ماۋسىمعا كومانداسىن ءوز تاكتيكاسى, ءوز ءتاسىلى بويىنشا دايىنداعىسى كەلەتىنى تۇسىنىكتى. الايدا, ولاردىڭ وسىلاي ورتا جولدان قوسىلۋى – ءجيى كەزدەسەتىن جاعداي. سوندىقتان ءبىز ءاردايىم دايىن بولۋىمىز كەرەك. سونداي-اق, ول كوماندانىڭ سول ماۋسىمداعى ناتيجەسىنە تولىعىمەن كەيىن كەلگەن جاتتىقتىرۋشى عانا جاۋاپ بەرەتىنى ءتۇسىنىكتى. دەمەك, مەن «بارىسقا» كەلەردە وسىنداي جاۋاپكەرشىلىكتەردى سەزىنە وتىرىپ شەشىم قابىلدادىم.
– ازىرگە تۋرنير كەستەسىندە كوش سوڭىندا كەلە جاتىرسىزدار. بۇل جاعداي پسيحولوگيالىق تۇرعىدا ويىنشىلارعا كەرى اسەرىن تيگىزبەي مە؟
– ءدال قازىر مەن تۋرنير كەستەسىنە قاراپ جۇرگەن جوقپىن. وعان ۋاقىتىم دا جوق. ويتكەنى, ءبىزدىڭ قازىرگى باستى مىندەتىمىز – ءوز ويىن ورنەگىمىزدى تاۋىپ, سونى جەتىلدىرۋ. بۇگىندە وسى باعىتتا تەر ءتوگۋدەمىز. كوڭىل قۋانتارلىعى سول, العاشقى ساتكە قاراعاندا, كوماندامىز ويىنىندا وڭ ءوزگەرىستەر بايقالادى. بۇعان ويىنشىلاردىڭ ءوز ءىستەرىنە دەگەن ادالدىعى مەن جاتتىقتىرۋشىلار قۇرامىنىڭ بىلىكتىلىگى كوپ سەپتىگىن تيگىزۋدە. قازىر ماۋسىمنىڭ تەك باسى عانا. الدا ءالى تالاي ويىن بار. سوندىقتان, تۋرنير كەستەسىندەگى جاعدايىمىزدى جاقسارتۋعا مۇمكىندىك مول دەپ ەسەپتەيمىن.
– ءسىزدىڭ «اۆانگاردتىڭ» جاتتىقتىرۋشىسى رەتىندە «بارىسپەن» بىرنەشە رەت كەزدەسكەنىڭىزدى جاقسى بىلەمىز. اسىرەسە, 2014-2015 جىلعى ماۋسىمنىڭ پلەي-وفف كەزەڭىندەگى تارتىستى جانكۇيەرلەر ءالى ۇمىتا قويعان جوق. بىراق سودان بەرى «بارىس» ساپىندا ايتارلىقتاي وزگەرىستەر بولدى. سونىڭ ىشىندە بيىل بىرقاتار جاڭا ويىنشى كەلدى. ولاردىڭ كەيبىرى ەرەسەكتەر ساپىنا ەندى قوسىلعان جاس حوككەيشىلەر. بۇعان قاتىستى نە دەيسىز؟
– «چيكاگو بلەك حوۋكس» كومانداسىندا سكاۋت رەتىندە جۇمىس ىستەگەنىمدە وسى قۇرلىقتىق حوككەي ليگاسىنا جاۋاپتى بولدىم. سول كەزدە «بارىستىڭ» ويىن جۇيەسى قالىپتاسقان, اۋىزبىرشىلىگى كۇشتى, وتە جاقسى كوماندا ەكەنىن بايقادىم. كوماندادا كەز كەلگەن ساتتە شەشىم قابىلداي الاتىن, اسىرەسە ويىنشى باسىمدىعىن ءساتتى جۇزەگە اسىراتىن شەبەر حوككەيشىلەر جەتىپ-ارتىلادى. الايدا, بيىلعى ماۋسىمدا كلۋب قۇرامى ءبىراز جاڭارعان. اراسىندا جاس, تاجىريبەسى از ويىنشىلار دا بار. كەيدە مۇنداي جوعارى دەڭگەيدەگى سايىستاردا بۇل ۇلكەن قاتەلىك بولىپ سانالاتىنى جاسىرىن ەمەس. ويتكەنى, كاسىبي بىلىكتىلىگى جوعارى, تاجىريبەسى مول ويىنشىلارمەن وڭ ناتيجەگە جەتۋ وڭايىراق.
– بۇگىندە ماۋسىم باسىندا كوماندا قۇرامىندا بولماعان تالعات جايلاۋوۆ, مارتين سەن-پەر سىندى ويىنشىلار قايتادان قاتارعا قوسىلىپ جاتىر. وسىعان قاراپ, كەزىندە اندرەي نازاروۆتىڭ نازارىنان تىس قالعان كونستانتين رۋدەنكو, مايك لاندين مەن ميحايل راحمانوۆتىڭ دا ورالۋى مۇمكىن دەۋگە بولا ما؟
– مەنىڭ بىلۋىمشە, بۇگىندە مايك لاندين شۆەيتساريانىڭ كومانداسىندا وينايدى. سوندىقتان جۋىق ارادا ونىڭ ورالا قويۋى ەكىتالاي. ال ميحايل راحمانوۆ تۋرالى ناقتى ەش نارسە ايتا المايمىن. ويتكەنى, ول قازىر وسكەمەننىڭ «تورپەدوسىندا» تەر توگىپ ءجۇر. وكىنىشكە قاراي, «بارىس» پەن «تورپەدونىڭ» ويىن كەستەسىنىڭ ۇقساستىعىنا بايلانىستى ول كوماندانىڭ كەزدەسۋلەرىن قاراۋعا مۇمكىندىك بولار ەمەس.
– بىزدە ادەتتە «بارىس» پەن قازاقستان ۇلتتىق قۇراماسىن ءبىر مامان جاتتىقتىراتىنىن بىلەسىز...
– وسىعان دەيىن مۇنداي ءتاجىريبەنى ەشقاشان قولداماعان ەدىم. الايدا, «بارىس» حوككەيشىلەرىنىڭ توقسان پايىزى قازاقستان ۇلتتىق قۇراماسىندا وينايتىنىن ەسكەرسەك, بۇعان كەلىسۋگە بولادى. بۇل ماسەلە قازاقستان حوككەي فەدەراتسياسى اتقارۋشى كوميتەتىنىڭ كەزەكتى وتىرىسىندا شەشىلەدى دەپ كۇتىلۋدە. ال ماسەلە ماعان قاتىستى بولسا, مەن ەكى مىندەتتى قاتار الىپ جۇرۋگە دايىنمىن.
– اڭگىمەڭىزگە راحمەت. جۇمىسىڭىزعا ساتتىلىك تىلەيمىز.
اڭگىمەلەسكەن
ەلامان قوڭىر
استانا