قازاقستان رەسپۋبليكاسىنىڭ سىرتقى ىستەر مينيسترلىگى امەريكا قۇراما شتاتتارى مەن رەسەي فەدەراتسياسى اراسىنداعى سيرياداعى جاعدايدى رەتتەۋ ماسەلەسى توڭىرەگىندەگى ىنتىماقتاستىقتىڭ توقتاتىلۋى تۋرالى مالىمدەمەگە بايلانىستى زور وكىنىش بىلدىرەدى.
مالىمدەمە ءماتىنىن ۆەدومستۆونىڭ ءباسپاسوز قىزمەتى تاراتتى.
"وقيعالار بارىسىنىڭ بۇل باعىتتا دامۋى وسى قاسىرەتتى كوپ شەككەن ەلدە قانتوگىس پەن ادام ءولىمىنىڭ ودان ءارى جالعاسۋىنا اكەلۋى مۇمكىن, سونداي-اق بۇدان بۇرىن قول جەتكىزگەن بارلىق كەلىسىمدەر مەن تاياۋ بولاشاقتا جاعدايدىڭ رەتتەلۋى پەرسپەكتيۆاسىنا قاۋىپ توندىرمەك. سيريالىق داعدارىستىڭ شەشىمىن ىزدەستىرۋ ماسەلەسىندە حالىقارالىق قاۋىمداستىقتىڭ ەكى نەگىزگى فاكتورى, ياعني رف مەن اقش اراسىنداعى كەلىسپەۋشىلىكتەر جانە ۋشىققان الشاقتىق الاڭداۋشىلىعىمىزدى تۋدىرۋدا. بۇنىڭ ءوزى قاقتىعىس شيەلەنىسۋىنىڭ كەمي تۇسۋىنە جانە كۇللى تاياۋ شىعىس وڭىرىندەگى جاعدايدىڭ تۇراقتانۋىنا ىقپالىن تيگىزبەيدى.
قازاقستان رەسپۋبليكاسى سىرتقى ىستەر مينيسترلىگىنىڭ 2016 جىلعى 10 قىركۇيەكتەگى مالىمدەمەسىندە قازاقستان رف مەن اقش اراسىنداعى سيريالىق داعدارىستى رەتتەۋ جونىندەگى ورتاق جوسپاردى ازىرلەۋدى كوزدەگەن ۋاعدالاستىقتى قولداعان بولاتىن. سيرياداعى بەيبىتشىلىكتىڭ ورناۋىنا ءۇمىت بەرگەن بۇل جوسپاردىڭ ىسكە اسپاعانى ءبىزدىڭ تەرەڭ الاڭداۋشىلىعىمىزدى تۋدىرۋدا.
وسىعان وراي, گۋمانيتارلىق داعدارىستىڭ شيەلەنىسۋى مەن سيريا حالقىنىڭ قايعى-قاسىرەتىن توقتاتۋ ماقساتىندا وسى ماسەلە بويىنشا رف مەن اقش اراسىنداعى كەلىسسوزدەردى جەدەل تۇردە قايتا قالپىنا كەلتىرۋگە شاقىرامىز".
ەگەمەن-اقپارات