قازاقستان مەن رەسەي ىنتىماقتاستىعىنىڭ ءحىىى وڭىرارالىق فورۋمى اياسىندا «استانا ەكسپو-2017» ۇلتتىق كومپانياسى مەن رەسەيدىڭ ەلىمىزبەن شەكارالاس ايماقتارىندا ورنالاسقان بىرقاتار وبلىستارىمەن ارادا ءوزارا ىنتىماقتاستىق تۋرالى مەموراندۋمعا قول قويىلدى.
بۇل قۇجاتقا قول جەتكىزۋدەگى باستى ماقسات – ەكسپو-2017 حالىقارالىق كورمەسىنە رەسەيلىك تۋريستەردى كوپتەپ تارتۋ, جاڭعىرمالى ەنەرگيا كوزدەرىنە, «جاسىل» تەحنولوگيانى جەتىلدىرۋگە بايلانىستى ءتۇرلى ينۆەستيتسيالىق جوبالاردى زەرتتەۋ جانە دامىتۋ. سونداي-اق, مەموراندۋم تۋريستىك سالاداعى ينفراقۇرىلىمدى دامىتۋعا ىقپال ەتۋگە ءتيىس.
قول قويۋ راسىمىندە ۇلتتىق كومپانيانىڭ باسشىسى احمەتجان ەسىموۆ:
– رەسەي فەدەراتسياسىنىڭ تۋريستىك وپەراتورلارىمەن بەلسەندى تۇردە جۇمىس ىستەيمىز. بۇل ەلدىڭ شەكارالاس ايماقتا ورنالاسقان, جالپى سانى 34 ميلليون ادام تۇراتىن 14 وبلىسىنىڭ حالقى كورمەگە كەلەدى دەپ كۇتىلۋدە. ولاردىڭ اراسىندا ومبى, استراحان, سۆەردلوۆ, تۇمەن وبلىستارى, تاتارستان رەسپۋبليكاسى بار. بۇگىنگى مەموراندۋم وسى وبلىستارمەن ارادا ىنتىماقتاستىقتى ودان ءارى ارتتىرىپ, ەكسپو-2017 حالىقارالىق كورمەسىنە كەلەتىن ادامدار سانىن ارتتىرۋعا ىقپال ەتەدى دەگەن ويدامىز, – دەپ اتاپ ءوتتى.
جالپى, ەكسپو كورمەسىنىڭ قانداي دارەجەدە وتكەنىن ايقىندايتىن باستى ەكى كورسەتكىش بار. ول قانشا ەلدىڭ ات سالىسقانى جانە كورمەگە قانشا ادامنىڭ كەلگەنى. احمەتجان ەسىموۆتىڭ ايتۋىنشا, استاناداعى كورمەگە باستاپقىدا 100 ەل قاتىسادى دەپ جوسپارلانعان, بۇل كورسەتكىش 103-كە جەتىپ, اسىرا ورىندالدى. ەندى 5 ميلليونعا تارتا ادامدى تارتۋ ءۇشىن كورمەنى بارىنشا تارتىمدى ەتىپ وتكىزۋ ماسەلەسى ويلاستىرىلۋدا.
احمەتجان ەسىموۆ ءوز سوزىندە كورمەگە ارنالعان عيماراتتاردىڭ قۇرىلىسىنا دا توقتالىپ ءوتتى. حالىقارالىق شارا وتەتىن اۋماقتىڭ ورتا تۇسىندا ورنالاسقان سفەرا پىشىندەس عيماراتتا قازاقستاننىڭ پاۆيلونى ورنالاسپاق. عيماراتتىڭ ءاربىر قاباتى عارىش ەنەرگياسى, كۇن ەنەرگياسى, سۋ ەنەرگياسى, كينەتيكالىق ەنەرگيا سىندى ەنەرگيا تۇرلەرىن سۋرەتتەۋگە ءتيىس.
استراحان وبلىسىنىڭ گۋبەرناتورى الەكساندر جيلكين استانادا وتەتىن ايتۋلى شارانىڭ تاقىرىبى بۇگىنگى تاڭدا وتە وزەكتى, كرەاتيۆتى ويلاي بىلەتىن ادامدار ءۇشىن پايدالى دەپ سانايدى.
– بولاشاقتىڭ تەحنولوگياسىنا, جاڭعىرمالى ەنەرگيا تەحنولوگياسىنا قىزىعۋشىلىق تانىتاتىن, ونى ءوز كوزدەرىمەن كورۋ ءۇشىن استاناعا كەلەتىن ادامداردىڭ كوپ بولاتىندىعى انىق. استراحان ءوڭىرى جەل ءجيى سوعاتىن, كۇن ەنەرگياسىن پايدالانۋ ءۇشىن ىڭعايلى ايماقتا ورنالاسقانىن ەسكەرسەك, ءبىزدىڭ بيزنەسىمىز ءۇشىن, ىسكەرلىك ورتامىز ءۇشىن دە قىزىقتى بولماق. ءبىزدىڭ ادامداردىڭ ەكسپو-2017 كورمەسىن كورۋ ءۇشىن استاناعا كەلۋگە دەگەن قىزىعۋشىلىعى جوعارى. قازىر قازاقستاننىڭ تۋريستىك اگەنتتىكتەرىمەن تىعىز بايلانىس ورناتىپ, لوگيستيكانى دۇرىس قالىپتاستىرۋ ءۇشىن بىرلەسىپ جۇمىس ىستەپ جاتىرمىز, – دەدى ول.
«استانا ەكسپو-2017» ۇلتتىق كومپانياسىنىڭ ەسەبىنە سۇيەنسەك, حالىقارالىق كورمەنى وتكىزۋگە ازىرلىك كەستەگە ساي جۇرگىزىلىپ جاتىر دەۋگە بولادى. كورمەگە قاتىسۋعا ءوتىنىش بەرگەن ەلدەرگە ارنالعان پاۆيلوندار وسى قازان ايىندا بەرىلە باستاماق. كورمە اياقتالعانشا استانادا تۇرۋعا تىلەك بىلدىرگەن ەلدەردىڭ وكىلدەرىنە ارنالعان پاتەرلەر دە ساقاداي-ساي. ولار ءوتىنىش بەرگەن رەتىنە قاراي, قازىر دايىن تۇرعان 1370 پاتەرگە قونىستانا بەرەدى. كورمە اياسىندا 3 مىڭنان استام تاقىرىپتىق جانە مادەني-ساۋىقتىق ءىس-شارا وتكىزىلەدى, ەتنوتۋريزمگە باسىمدىق بەرىلەدى.
ارنۇر اسقاروۆ,
«ەگەمەن قازاقستان»