«جەردە ءبىر جەتىم قۋانسا, كوكتە مىڭ پەرىشتە شاتتانادى» دەگەندى مىڭ قۇبىلتىپ ايتىپ جۇرسەك تە, ءمانى – بىرەۋ. بۇلدىرشىندەردى قۋانتىپ قانا قويماي, ءتۇرلى قاۋىپ-قاتەردەن ساقتاندىرىپ وتىرۋ دا وزەكتى ماسەلە بولىپ تابىلادى. ايتپاي كەلەتىن جاۋدىڭ ءبىرى – ءورت.
وسى ماسەلەگە وراي, الماتى قالاسىنىڭ توتەنشە جاعدايلار دەپارتامەنتىنىڭ قىزمەتكەرلەرى تەمىرتاۋ قالاسىنان كەلگەن بالالار مەن جاسوسپىرىمدەر تەاترىمەن بىرلەسىپ, قالاداعى №1 بالالار ۇيىندە «ءپىلدىڭ بالاسى – ءورت ءسوندىرۋشى» سپەكتاكلىن قويىپ بەردى.
وسىلايشا ءبىر وقپەن ەكى قوياندى اتقان قىزىقتى شارا الماتىعا العاش گاسترولدىك ساپارمەن كەلگەن تەمىرتاۋ تەاترىنىڭ قويىلىمدارىمەن ۇيلەسە كەتتى. ويتكەنى, بۇل كۇندەرى الماتىدا ءورت قاۋىپسىزدىگى ايلىعى ءوتىپ جاتقان بولاتىن.
بالالارعا ءورت قاۋىپسىزدىگى ەرەجەلەرىن بۇزىپ, ورتەي جازداعان «وتتىق» دەگەن قىز تۋرالى قويىلىم شىنىندا دا ۇنادى. كومەككە ءپىلدىڭ بالاسى – ءورت ءسوندىرۋشى مەن ينسپەكتور اسىعا كەلىپ, ەكەۋى الاپاتتىڭ الدىن الادى.
كوڭىلدى, ويىن تۇرىندە وتكەن كورىنىس بالالارعا كادىمگىدەي قۋانىش سىيلاپ, تەمىرتاۋ بالالار مەن جاسوسپىرىمدەر تەاترىنىڭ اكتەرلەرى ءرولدەرىنە بەرىلە ويناپ, ءبۇلدىرشىندەردى قۋانتتى.
بالالار دا قويىلىمعا اسەرلەنە ارالاسىپ, ەرتەگى كەيىپكەرلەرىن قولداپ, ولارعا جاندارى اشىپ, ورتپەن ويناعاننىڭ ءتۇبى نە بولاتىنىن, ءورت پايدا بولعاندا نە ىستەۋ كەرەكتىگىن ۇعىنىپ وتىردى.
كورىنىستەر اياقتالعان سوڭ سپەكتاكلگە كوڭىلى تولعان بالالار دا تەمىرتاۋلىق ونەر تالانتتارىنا العىس ءبىلدىردى.
– قالاي دەسەك تە, ءارى قىزىقتى ءارى پايدالى وتكەن شارانىڭ ءمانى مول بولدى. بۇلدىرشىندەردى جالىقتىرماعان قويىلىم ولاردىڭ رۋحاني جانە مادەني دامۋىنا مۇمكىندىك تۋعىزاتىن, ومىرگە قاۋىپ ءتونىپ, ءورت تۋىنداعانىندا سانالى ارەكەت ەتۋدى ۇيرەتەتىن, ءارتۇرلى جاعدايلاردا قاراپايىم قيمىل داعدىلارىن مەڭگەرۋگە كومەكتەسەتىن پەداگوگيكالىق يدەيا ىسكە اسىرىلدى, – دەيدى الماتى قالاسىنىڭ توتەنشە جاعدايلار دەپارتامەنتىنىڭ قىزمەتكەرى ا.نۇسىپباەۆ.
ازاماتتىق قورعاۋ مايورىنىڭ ايتۋىنشا, مۇنان بىلايعى جەردە بالالار ءۇيىنىڭ ءتاربيەلەنۋشىلەرىنە كەلىپ تۇرۋ الماتىلىق قۇتقارۋشىلار ءۇشىن داستۇرگە اينالماق.
ايناش ەسالي,
«ەگەمەن قازاقستان»
الماتى