استانادا قازاقستان رەسپۋبليكاسى تۇڭعىش پرەزيدەنتى – ەلباسى قورى قازاقستان حالىقتارىنىڭ تىلدەرى كۇنى مەن قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي قازاق ءتىلدى ۇزدىك ينتەرنەت-سايت بايقاۋىنا وتىنىمدەر قابىلداۋ باستالعانىن جاريالادى. بايقاۋ وتكىزۋدەگى سەرىكتەس – مەملەكەتتىك ءتىلدى دامىتۋ قورى.
بايقاۋ ماقساتى – ينتەرنەت جۇيەسىندەگى ۇزدىك قازاق ءتىلدى رەسۋرستاردى انىقتاۋ مەن ناسيحاتتاۋعا, اقپاراتتىق رەسۋرستار مەن سەرۆيستەردىڭ سانى مەن ساپاسىن ارتتىرۋعا, جەلى قولدانۋشىلارىنىڭ قىزىعۋشىلىعىن ۇلعايتۋعا, اقپارات كەڭىستىگىندە قازاق ءتىلىنىڭ قولدانىس اياسىن كەڭەيتۋگە جانە ۇزدىكتەردىڭ تانىمالدىلىعىن كوتەرۋگە ىقپال ەتۋ.
بايقاۋعا ۇكىمەتتىك ەمەس, تاۋەلسىز قوعامدىق سايتتار, عالامتور كەڭىستىگىندەگى تاجىريبەسى كەمىندە ءبىر جىلعا تولعان, قازاق تىلىندە اقپارات تاراتاتىن, قىزمەت ءتۇرى قازاقستان رەسپۋبليكاسىنىڭ قولدانىستاعى زاڭناماسىنا قايشى كەلمەيتىن كەز كەلگەن سايت قاتىسا الادى. بايقاۋعا تەك مەملەكەتتىك ورگانداردىڭ, شەتەلدىك ۇيىمداردىڭ, بۇقارالىق اقپارات قۇرالدارىنىڭ ەلەكتروندى نۇسقالارى (گازەت, تۆ, راديو) قاتىسا المايدى.
سىيلىق مىناداي نوميناتسيالار بويىنشا تاعايىندالادى: «وتكىر ءتىل» – قازاق ءتىلىن جانە ۇلتتىق قۇندىلىقتاردى ناسيحاتتاۋشى ۇزدىك سايت, «رۋحاني ازىق» – قازاق ادەبيەتى مەن مادەنيەتىن ناسيحاتتاۋشى ۇزدىك سايت, «تەرەڭ ىزدەنىس» – قازاق ەلىنىڭ تاريحىن ناسيحاتتاۋشى ۇزدىك سايت, «شىنايى ءومىر» – قوعامداعى وزەكتى ماسەلەلەردى تالقىلايتىن ۇزدىك سايت, «سپورت تىنىسى» – سالاماتتى ءومىر سالتى مەن سپورتتى ناسيحاتتاۋشى ۇزدىك سايت, «ءبىلىم بۇلاعى» – ءبىلىم بەرەتىن ۇزدىك سايت, «جاستار الەمى» – جاستار تاقىرىبىنا ارنالعان ۇزدىك سايت.
ءاربىر نوميناتسيا بويىنشا جەڭىمپازعا 300 مىڭ تەڭگە كولەمىندە اقشالاي سىيلىق بەرىلەدى. بايقاۋ قورىتىندىسى وسى جىلعى قازان ايىنىڭ سوڭىندا شىعادى.
بايقاۋ جەڭىمپازدارىن بەلگىلى قوعام قايراتكەرلەرى, قالامگەر-جۋرناليستەر مەن بايقاۋ قۇرىلتايشىلارىنان جاساقتالعان قازىلار القاسى انىقتايدى.
قازىلار القاسى سايتتاردى مازمۇنى, قىزمەت باعىتى, ينتەراكتيۆتىلىگى, كوركەمدىك جاعى, يدەيا ەرەكشەلىگى, تارتىمدىلىعى سەكىلدى تالاپتار بويىنشا سارالاپ, جەڭىمپازداردى انىقتايدى.
بايقاۋ ەرەجەسىمەن قازاقستان رەسپۋبليكاسى تۇڭعىش پرەزيدەنتى – ەلباسى قورى مەن مەملەكەتتىك ءتىلدى دامىتۋ قورىنىڭ سايتتارىنان تانىسۋعا بولادى.
«ەگەمەن-اقپارات»