رۇستەم ەسداۋلەتوۆ قازاقتىڭ شىعارماشىلىق تىنىسى كەڭ, كەلەشەگىنەن ۇلكەن ءۇمىت كۇتتىرگەن جاستارىنىڭ ءبىرى بولاتىن. جاسىنداي جارقىلداعان جاستىڭ قول سوزعان ارماندارى قانداي اسىل, بيىك بولسا, ونەردى ورگە سۇيرەگەن ءىس-قيمىلى دا سونداي نىق, ناقتى ەدى. قارىشتاپ قادام باسىپ, قالىقتاپ قانات قاعىپ كەلە جاتىر ەدى. جازمىشقا امال بار ما, ماڭدايىنا كەلتە عۇمىر جازىلىپتى...
مەملەكەتتىك «دارىن» جاستار سىيلىعىنىڭ لاۋرەاتى, كينو جانە تەاتر اكتەرى, اقىن, رەجيسسەر رۇستەم ەسداۋلەتوۆ اتىنداعى ءى رەسپۋبليكالىق جاستار جانە ستۋدەنتتەر فەستيۆالى سالتاناتتى تۇردە تۇساۋىن كەستى. شىعىس قازاقستان وبلىستىق دراما تەاترىندا شىمىلدىعىن ءتۇرگەن شاراعا استانا, الماتى, قاراعاندى, كوكشەتاۋ, سەمەي سىندى قالالاردان ءبىرقاتار تەاتر ۇجىمدارى كەلدى. فەستيۆالعا قاتىسۋشىلار الدىمەن رۇستەم ەسداۋلەتوۆ شىعارماشىلىعىنا ارنالعان كورمەنى تاماشالادى. كورمەگە رەجيسسەردىڭ ءتۇرلى تەاتر فەستيۆالدەرىندە قول جەتكىزگەن جەتىستىكتەرى مەن ماراپاتتارى, تەاتر تارلاندارىمەن جانە ارىپتەستەرىمەن, سونداي-اق جۇمىس بارىسىندا تۇسكەن فوتوسۋرەتتەرى, ولەڭدەر جيناعى مەن ءتۇرلى جيناقتارعا ەنگەن توپتامالارى جانە ءباسپاسوز بەتىندەگى ەستەلىكتەر قويىلىپتى. تۇڭعىش رەت ۇيىمداستىرىلعان تەاتر مەرەكەسى ءۇش كۇنگە سوزىلدى. قوڭىر كۇزدەگى ادام جانىن تەربەيتىن رۋحانيات مەرەكەسىنىڭ اشىلۋ سالتاناتىندا وبلىس اكىمىنىڭ ورىنباسارى جاقسىلىق ومار قۇتتىقتاپ, رۋحتاس دوسى تۋرالى شىنايى سىر شەرتتى.
– رۇستەم تۋرالى كوپ ايتۋعا بولادى. ول وسكەمەندە قازاق تەاترىنىڭ بايراعىن بيىك جەلبىرەتەمىن دەپ تەر توكتى. وسىدان ءبىراز ۋاقىت بۇرىن وڭىرىمىزدە وتكەن رەسپۋبليكالىق دراما تەاترلارى فەستيۆالىندە رۇستەم دوسىمىزدى ەسكە الۋعا ارنالعان اۋقىمدى شارا ۇيىمداستىرساق, ەلدىڭ بارلىق تاراپىنان تەاتر ۇجىمدارىن شاقىرساق, وعان جاستار تەاترلارى قاتىسسا دەگەن ويىمىز بۇگىن جۇزەگە استى. ويتكەنى, ول قازاقتىڭ ونەردەگى جاستارىنىڭ بەت-بەينەسى بولىپ قالىپتاسىپ, ەلدىڭ جادىندا دا سول بولمىسىمەن قالدى, دەدى جاقسىلىق ومار. بۇعان قوسا, وبلىس اكىمىنىڭ ورىنباسارى فەستيۆالدى ءداستۇرلى تۇردە جىل سايىن ۇيىمداستىرۋ كوزدەلىپ وتىرعانىن جەتكىزدى.
بۇدان كەيىن ر.ەسداۋلەتوۆتىڭ ءومىرى مەن ونەرىنەن سىر شەرتكەن «ءبورىناما» دەرەكتى ءفيلمى كورسەتىلدى. فيلمدە قازاقتىڭ ادەبيەتى مەن مادەنيەتىنە تالانتتى ۇل-قىزداردى سىيلاعان ىرگەلى اۋلەت, اۋىلداعى ورازباي اكەنىڭ ماۋەلى باعىندا قيالى جۇيرىك بولىپ وسكەن ارمانشىل بالا, ونىڭ ءوز باعىتىن ايقىنداعان جاستىق شاعى مەن شىن جۇيرىككە تۇساۋ جوق ەكەنىن تانىتقان ساحنا مەن ساحنا سىرتىنداعى سان ءتۇرلى ەرەن ەڭبەگى باياندالادى. كادردا وتىز ءبىر جاسىندا تالاي بيىكتەردى باعىندىرىپ ۇلگەرگەن ر.ەسداۋلەتوۆتىڭ ءولشەۋلى ءومىرى دە ساعات ءتىلىمەن سىرتىلداپ, ادام بالاسىنىڭ بۇل ءپانيدەگى ماقسات-مۇراتىنىڭ ءمانىن اشا تۇسەدى. سانكت-پەتەربۋرگتە رەسەيلىك ايگىلى تەاتر تارلانى ل.ءدوديننىڭ ءتالىمىن العان رۇستەمنىڭ سول كەزدەگى ءوزى جەتەكشىلىك جاساعان جامبىل اتىنداعى شىعىس قازاقستان وبلىستىق تەاترىن ستانيسلاۆسكي جۇيەسىمەن قايتا قۇرۋى دا ونەردەگى جانسەبىل ەڭبەگىنىڭ ءبىر كورىنىسىن پاش ەتتى.
جارى مارجان بۇگىندە رۇستەمنىڭ ءتۇتىنىن وشىرمەي, ارتىندا قالعان ولجاس, بوتاگوز, حانزادا, نۇرزادا ەسىمدى بالالارىن تاربيەلەپ وتىر. ونىڭ ومىردەن ەرتە وزعان رەجيسسەردىڭ مۇراسى بويىنشا ت.جۇرگەنوۆ اتىنداعى ونەر اكادەمياسىندا كانديداتتىق ديسسەرتاتسيا قورعاعانىن ايتا كەتكەن ءلازىم. ياعني, ر.ەسداۋلەتوۆتىڭ مۇراسى ىزدەۋسىز ەمەس.
فەستيۆال بارىسىندا كوكشەتاۋ قالاسى اقان سەرى اتىنداعى مادەنيەت كوللەدجىنىڭ «جاس تولقىن» جاستار ستۋدياسى ر.مۇقانوۆانىڭ «ماڭگىلىك بالا بەينە», سەمەي قالاسى م.تولەباەۆ اتىنداعى مۋزىكا ۋچيليششەسىنىڭ «ءداۋىر» ستۋدەنتتىك تەاترى م.شاحانوۆتىڭ «تاناگوز», الماتى قالاسى «ا.ي مۋزىكالىق تەاتر ورتالىعى» م.اۋەزوۆتىڭ «قاراگوز», قاراعاندى قالاسى تاتتىمبەت ونەر كوللەدجىنىڭ «Q» ستۋدەنتتەر تەاترى يران-عايىپتىڭ «قورقىتتىڭ كورى», استانا قالاسى قازاق ۇلتتىق ونەر ۋنيۆەرسيتەتىنىڭ «ستۋدەنتتىك زەرتحاناسى» ي.ساپاربايدىڭ «سىعان سەرەناداسى» جانە باعدارلامادان تىس شىعىس قازاقستان وبلىستىق دراما تەاترى ابايدىڭ «اتىمدى ادام قويعان سوڭ...» اتتى وي-تولعانىسى ارقاۋ بولعان قويىلىمدارىن ساحنالادى. بەلگىلى تەاتر سىنشىلارى ساحنانىڭ جاس بۋىنىنا باعا بەردى. تاقىرىپ تاڭداۋ, ەكسپەريمەنتتىك ءىزدەنىس, اكتەرلىك انسامبل, ساحناداعى قيمىل-قوزعالىس, رەجيسسەرلىك شەشىم سىندى ساحنانىڭ سان سىرىن قامتىعان سىن-ەسكەرتپەلەر كەلەشەك تەاتر شەبەرلەرىنە ءبىر جاعىنان تاجىريبەلىك ءدارىس ىسپەتتى بولدى.
فەستيۆالدىڭ جابىلۋ سالتاناتىندا اقىن, مەملەكەتتىك سىيلىقتىڭ لاۋرەاتى ۇلىقبەك ەسداۋلەت بۇل تەاتردىڭ رۇستەمنىڭ ءوزى جوباسىن سىزىپ, ارمانداپ كەتكەن ونەر ورداسى ەكەنىن, ادام جانىن مولدىرەتەتىن تەاتر ونەرىنىڭ وسكەمەندەگى ورلەۋى رۇستەمنەن باستالاتىنىن, وسى ورايدا فەستيۆال كەلەشەكتە شەتەلدەردىڭ ۇجىمدارى دا قاتىساتىن حالىقارالىق شاراعا اينالسا دەگەن تىلەگىن ايتتى. سونداي-اق, كوپشىلىكتىڭ تىلەگىنە ساي وبلىستىق تەاترعا رۇستەم ەسداۋلەتوۆتىڭ ەسىمى بەرىلسە دەگەن ۇسىنىسىن جەتكىزدى. ايتا كەتۋ كەرەك, بۇل ماسەلە بۇدان بۇرىن جەرگىلىكتى باسپاسوزدە بىرنەشە مارتە كوتەرىلگەن بولاتىن.
ءۇش كۇنگە سوزىلعان فەستيۆال قورىتىندىسى بويىنشا باس جۇلدەنى استانا قالاسىنان كەلگەن قازاق ۇلتتىق ونەر ۋنيۆەرسيتەتىنىڭ «ستۋدەنتتىك زەرتحاناسى» جەڭىپ الدى. بۇل – ي.ساپاربايدىڭ «سىعان سەرەناداسىن» قويعان قازاقستاننىڭ ەڭبەك سىڭىرگەن قايراتكەرى سايلاۋ قاميەۆتىڭ رەجيسسەر رەتىندەگى العاشقى جەڭىسى ەكەن. فەستيۆالعا قاتىسقان بارلىق تەاتر ۇجىمدارى جەكە اتالىمدار بويىنشا ماراپاتتالىپ, قارجىلاي سىيلىقتارعا يە بولدى.
دۋمان اناش,
«ەگەمەن قازاقستان»
وسكەمەن