جامبىل وبلىسىنىڭ ەلورداداعى كۇندەرى اياسىندا ۇلتتىق مۋزەيدە «تاريحى تەرەڭ تارازدان تاعزىم» اتتى كورمە ۇيىمداستىرىلدى.
مادەني جانە رۋحاني مۇراسىمەن باي ءوڭىردىڭ تاريحى سوناۋ سامانيدتەر, تۇركىلەر, قاراحاندار داۋىرىمەن بايلانىستى. ودان بەرىدە قۇرىلعان قازاق حاندىعى ناق وسى جەردە, دالىرەك ايتقاندا شۋ مەن تالاس وزەندەرىنىڭ اڭعارىنداعى قوزىباسى دەگەن جەردە تۋ تىككەن. سوندىقتان جامبىل وبلىسىنىڭ جۇرتقا ۇسىنار, كورمەگە قويار زاتتارىنىڭ مول بولۋى تاريحي زاڭدىلىق.
كورمەگە تەك قانا وبلىس كولەمىندە ەمەس, بۇكىل قازاق مادەنيەتىنىڭ قۇندىلىعى ىسپەتتى سامانيدتەردىڭ كۇمىس مونەتالار قازىناسى, تۇركى, قاراحان, موڭعول تەڭگەلەرىنىڭ توپتامالارى, 2012 جىلى تابىلعان جەتىتوبە وباسىنىڭ التىن بۇيىمدارى, قازاق حاندىعىنىڭ قالىپتاسۋ كەزەڭىندەگى قازاق باتىرلارىنىڭ قارۋ-جاراقتارى قويىلدى.
سونداي-اق, «ۇلتىمىزدىڭ ۇلى پەرزەنتتەرى» دەگەن بولىمدە كەڭەس وداعىنىڭ باتىرى باۋىرجان مومىش ۇلىنىڭ, حالىق قاھارمانى قايرات رىسقۇلبەكوۆتىڭ, عازيز بايتاسوۆتىڭ, ءىىى دارەجەلى «ايبىن» وردەنىنىڭ يەگەرلەرى پولات ايانقۇلوۆ پەن جاقسىبەك بايسەيىتوۆتىڭ جەكە زاتتارى مەن قۇجاتتارى قويىلدى.
رەپرەسسياعا ۇشىراعان سۋرەتشى ل.ۆ.بريۋممەردىڭ وبلىستىق مۋزەيگە سىيعا تارتقان 1000-نان اسا سۋرەتتەرى دە كورمەگە قويىلىپ, كورەرمەندەر قىزىعۋشىلىعىن تۋعىزدى.
كورمە جامبىل وبلىسى اكىمدىگى مەن مادەنيەت باسقارماسىنىڭ قولداۋىمەن ۇيىمداستىرىلدى.
ايگۇل سەيىلوۆا
فوتو: ورىنباي بالمۇرات