كەشە فۋتبولدان قازاقستان كۋبوگى جارتىلاي فينالىنىڭ العاشقى ويىندارى ءوتتى.
اۋەلگى ماتچتا پاۆلوداردىڭ «ەرتىسى» ءوز الاڭىندا ەلوردانىڭ «استاناسىن» قابىلدادى. 2:1 ەسەبىمەن قوناقتاردىڭ پايداسىنا شەشىلگەن تارتىستى كەزدەسۋدەگى دوپتىڭ بارلىعى ءبىرىنشى تايمدا سوعىلعانىن اتاپ ايتقان ءجون. ويىننىڭ 23-ءشى مينۋتىندا استانالىقتاردىڭ جارتىلاي قورعاۋشىسى اسحات تاعىبەرگەن مەرگەندىك تانىتسا, ارادا ون مينۋتقا جەتەر-جەتپەستە «ەرتىستىڭ» ۇزدىك شابۋىلشىسى رومان مۇرتازاەۆ تارازى باسىن تەڭەستىردى. سودان تۋرا بەس مينۋت وتكەندە, ياعني ويىننىڭ 37-ءشى مينۋتىندا ەلوردالىقتاردىڭ جاقىندا عانا جاراقاتىنان ايىعىپ, ساپقا قوسىلعان كوماندا كاپيتانى, شابۋىلشى تاڭات نوسەرباەۆ ءوز كلۋبىن قايتادان باسىمدىققا يە قىلدى.
ايتا كەتەرلىك نارسە, بۇل ويىندا ماۋسىمنىڭ سوڭىنا دەيىن جاراقاتىنا بايلانىستى قاتاردان شىعىپ قالعان داۆيد لوريانىڭ ورنىنا, پاۆلودارلىقتاردىڭ قاقپاسىن انتون تسيرين قورعادى. ال الاڭعا نەگىزىنەن قوسالقى قۇرامداعى جاس ويىنشىلارىن شىعارعان استانالىقتاردىڭ سوڭعى شەبىندە ادەتتەگىدەي نەناد ەريچ ەمەس, ونىڭ ارىپتەسى الەكساندر موكين تۇردى. مىنە, ول ويىننىڭ سوڭىنداعى تورەشى قوسقان ۋاقىتتا ءوز قاقپاسىنا بەلگىلەنگەن 11 مەترلىك ايىپ دوبىن شەبەرلىكپەن ۇستاپ, پاۆلودارلىق ويىنشى دجيبي فاللعا بارماق تىستەتتى. ءسويتىپ, تابلوداعى ەسەپ وزگەرگەن جوق.
جارتىلاي فينالدىڭ ەكىنشى كەزدەسۋى الماتىدا ءوتتى. قازاقستان كۋبوگىنىڭ قازىرگى يەگەرى, جەرگىلىكتى «قايرات» مۇنايشىلار وڭىرىنەن كەلگەن «اتىراۋ» كومانداسىمەن باق سىناستى. قوناقتار كۇشى باسىم الاڭ يەلەرىنە ءبىرىنشى تايمدا لايىقتى قارسىلىق كورسەتتى. بۇل شيەلەنىستى تەكەتىرەستىڭ تاعدىرىن ەكىنشى تايمنىڭ ورتاسى اۋا بەرە توردا تۋلاعان جالعىز دوپ شەشتى. ويىننىڭ 72-ءشى مينۋتىندا «قايراتتىڭ» جارتىلاي قورعاۋشىسى يسلامبەك قۋات وڭتايلى ءساتتى پايدالانىپ, قارسىلاستارىن قاپى قالدىردى. ءسويتىپ, الاڭ يەلەرى 1:0 ەسەبىمەن جەڭىسكە جەتتى.
ەندى 5 قاراشادا «اتىراۋ» «قايراتتى» ءوز الاڭىندا قابىلداپ, قارىمتا ويىندا ەسە جىبەرمەۋگە تىرىسادى. ال «استانا» مەن «ەرتىس» اراسىنداعى قارىمتا ماتچ 6 قاراشا كۇنى ەلورداداعى «استانا-ارەنا» ستاديونىندا وتەدى.
ءالجان ءالىش