وليمپيادا جەڭىمپازدارىنا بەرىلەتىن سىياقى دوللارمەن ەمەس, تەڭگەمەن ولشەنۋ كەرەك ەدى. بۇگىن اقوردادا ءوتىپ جاتقان قر ۇكىمەتىنىڭ كەڭەيتىلگەن وتىرىسىندا اقشا-كرەديتتىك ساياسات جونىندە بايانداعان قر ۇلتتىق بانكىنىڭ توراعاسى دانيار اقىشەۆ سانانى دوللارسىزداندىرۋعا قاتىستى وسىلاي رەنىش ءبىلدىردى دەپ حابارلايدى قازاقپارات.
«تەڭگە باعامىنىڭ ەركىن «ءجۇزۋ» جاعدايىندا ايىرباس باعانىمىنىڭ كۇشەيۋى دە السىرەۋى دە بولىپ تۇرادى. بۇل نەگىزىنەن سىرتقى فاكتورلارعا بايلانىستى. دەگەنمەن, دوللارسىزداندىرۋعا قاتىستى شارالار جۇيەلى جۇرگىزىلۋدە. تەڭگەلىك دەپوزيتتەر حالىق ءۇشىن باسقا شەتەلدىك ۆاليۋتاعا قاراعاندا جەتى ەسەگە دەيىن ءتيىمدى», دەدى باس بانكير. ونىڭ ايتۋىنشا, جىل باسىنان بەرى ەلىمىزدە دوللارسىزداندىرۋ ۇدەرىسى انىق بايقالىپ وتىر. ماسەلەن, تەڭگە بويىنشا دەپوزيتتەر ەلۋ پايىزعا دەيىن ارتسا, كەرىسىنشە شەتەلدىك ۆاليۋتاداعى دەپوزيتتەر ءتورت پايىزعا كەمىگەن.
«سولاي بولا تۇرا, قوعام مەن بيزنەستىڭ تەڭگە باعامىنىڭ ەركىن اينالىمىنا بەيىمدەلۋىنە دە ءبىراز ۋاقىت كەرەك. اكتيۆتەردىڭ دوللارلانۋى عانا ەمەس, سانانىڭ دوللارلانۋىنان قۇتىلۋ دا وڭاي ەمەس. تەڭگەمەن باعامداۋ, ۇلتتىق ۆاليۋتامەن ولشەۋگە كەلگەندە قينالىپ جاتاتىندار بار. بۇل رەتتە ۇلتتىق بانك اكتيۆتەردى دوللارسىزداندىرۋعا قاتىستى جۇيەلى شارالاردى اتقارىپ كەلەدى», - دەدى د. اقىشەۆ.
ماسەلەن, سانانى دوللارسىزداندىرۋ بويىنشا ينتەرنەت سايتتاردا كولىكتەر باعاسىن, جىلجىمايتىن جانە باسقا دا م ۇلىكتەردى تەڭگەدەن باسقا كەز كەلگەن ۆاليۋتادا كورسەتۋگە تىيىم سالىنعان. «تاۋارلار مەن قىزمەتتەردىڭ باعاسىن كورسەتۋدە, جارنامالاۋدا تەڭگەنى عانا كورسەتۋ, باسقا شەتەلدىك ۆاليۋتالاردى كورسەتۋگە تىيىم سالۋ شارالارىن زاڭنامالىق ىنتالاندىرۋ جۇمىستارىن جالعاستىرامىز. ارينە, ۇلتتىق ۆاليۋتامەن ولشەۋگە كەلمەيتىن جاعدايلاردى ايتىپ وتىرعانىمىز جوق. بۇل رەتتە سانانى دوللارسىزداندىرۋعا قاتىستى ايتا كەتەيىن, وليمپيادا چەمپيوندارىنا سىياقىنى كورسەتكەندە ولارعا بەرىلەتىن سومانىڭ مولشەرىن شەتەلدىك ۆاليۋتادا ەمەس, تەڭگەمەن ايتۋعا دا بولاتىن ەدى», دەدى ۇب باسشىسى