استانادا قورعانىس ءمينيسترى يمانعالي تاسماعامبەتوۆتىڭ قاتىسۋىمەن گەنەرال-مايور جومارت قۋانعاليەۆ پەن امانجول وسپانوۆتى سالتاناتتى تۇردە زاپاسقا شىعارىپ سالۋ ءراسىمى ءوتتى.
قورعانىس مينيسترلىگىندە وفيتسەرلەر ءۇشىن ماڭىزدى شارا, ياعني جاۋىنگەرلىك تۋمەن قوشتاسۋ ءراسىمى العاش رەت ءوتتى. قورعانىس مينيسترلىگىنىڭ قۇرمەت قاراۋىلى روتاسى مەن تۋ ۇستاۋشى توپتىڭ قاتىسۋىمەن گەنەرالداردى شەكتى جاسقا جەتۋى بويىنشا بوساتۋ تۋرالى بۇيرىق وقىلدى. گەنەرال-مايور جومارت قۋانعاليەۆ پەن امانجول وسپانوۆ كەزەكپە-كەزەك جاۋىنگەرلىك تۋدىڭ جانىنا كەلىپ, باس ءيدى. وسىلايشا ولار تۋعا اسكەري سالەم بەردى.
«شىنىمەن دە ناعىز كومانديرلەر, ارميامىزدىڭ بەتكە ۇستار گەنەرالدارى ءاسكەري قىزمەتتەرىن وسىمەن اياقتاۋدا. ولار ءاسكەرىمىزدىڭ قۇرىلۋىنىڭ باسى-قاسىندا بولىپ, وزدەرىنىڭ بىلىمدەرىمەن جانە ءتاجىريبەلەرىمەن تاۋەلسىز مەملەكەتىمىزدىڭ اسكەري سالاسى مەن قۋاتتى قورعانىسىنىڭ دامۋىنا قوماقتى ۇلەس قوستى», – دەدى قورعانىس مينيسترى ي.تاسماعامبەتوۆ سالتاناتتى ءراسىم بارىسىندا.
شىعارىپ سالۋ كەزىندە گەنەرالداردىڭ ءاسكەري دارا جولى, ولاردىڭ قالىپتاسۋى مەن جەتىستىكتەرى تۋرالى دەرەكتى فيلم كورسەتىلدى.
گەنەرال-مايور جومارت قۋانعاليەۆ قازاقستان رەسپۋبليكاسى قارۋلى كۇشتەرى باس شتابىنىڭ ورتالىق كوماندالىق پۋنكتىن, گەنەرال-مايور امانجول وسپانوۆ قازاقستان رەسپۋبليكاسى قارۋلى كۇشتەرى قارۋ-جاراق باس باسقارماسىن باسقارعانىن ايتا كەتەيىك. اسكەري قىزمەتشىلەر 40 جىل بويى جاۋىنگەرلىك ساپتا بولدى. ونىڭ تەڭ جارتىسىنىڭ ءبىرشاما جىلدارىن قازاقستاندىق ارميانىڭ قالىپتاسۋىنا سارپ ەتتى. ولارمەن بىرگە قىزمەت اتقارعان جاۋىنگەرلىك قارۋلاستارى, قارۋلى كۇشتەردىڭ بارلىق جەكە قۇرامى ولاردىڭ كوپ جىلدىق ەڭبەكتەرىنە شىن جۇرەكتەن العىستارىن بىلدىرەدى.
«جوعارعى باس قولباسشىعا, مەملەكەتكە جانە حالىققا قىزمەت ەتۋ جوعارى ابىرويدى ءارى قاراي دا الىپ جۇرەتىندەرىڭىزگە سەنىمدىمىن. بۇل الداعى ەكى ايتۋلى وقيعا تاۋەلسىزدىگىمىزدىڭ 25 جىلدىعى مەن قازاقستان قارۋلى كۇشتەرى قۇرىلۋىنىڭ 25 جىلدىعى قارساڭىندا ەرەكشە ماڭىزدى. سەبەبى الدىمىزدا ەلىمىزدىڭ قورعانىس قابىلەتتىلىگىن قامتاماسىز ەتۋدەگى جاھاندىق تاپسىرمالار تۇر», دەپ اتاپ ءوتتى قورعانىس ءمينيسترى.
گەنەرال-مايور جومارت قۋانعاليەۆ روستوۆ جوعارى اسكەري كوماندالىق ۋچيليششەسىن جانە ف.دزەرجينسكي اتىنداعى ءاسكەري اكادەميانى تامامداعان. قازاقستان ارمياسى قۇرىلعانعا دەيىن زىمىران اسكەرلەرىنىڭ «ينجەنەر-ەلەكتريگى» جوعارى اسكەري-ارناۋلى بىلىمىمەن ديۆيزياداعى بىردەن-ءبىر قازاق وفيتسەرى بولعان ول التاي وڭىرىندە قىزمەت اتقارىپ, «پودپولكوۆنيك» شەنىنە دەيىن كوتەرىلگەن. «كسرو قارۋلى كۇشتەرىندە وتانعا قىزمەت ەتكەنى ءۇشىن» وردەنى, ءىىى دارەجەلى «ايبىن», ءىى دارەجەلى «داڭق» وردەندەرىمەن جانە كوپتەگەن مەدالدارمەن ماراپاتتالعان.
گەنەرال-مايور امانجول وسپانوۆ ومبى جوعارى تانكتىك ينجەنەرلىك ۋچيليششەسىن جانە رەسەي فەدەراتسياسى قورعانىس مينيسترلىگى بروندى تانكتى اسكەرلەر اسكەري اكادەمياسىن بىتىرگەن. ءىى دارەجەلى «ايبىن» وردەنىمەن, مەرەيتويلىق جانە ەڭبەك ءسىڭىرگەن جىلدارى ءۇشىن 8 مەدالمەن ماراپاتتالعان. گەنەرال-مايور امانجول وسپانوۆ قىزمەتىن گەرمانيادا باستاعان. وندا روتا باسقارعان.
ساۋلەبەك ءبىرجان