«كەدەيدىڭ باي بولسام دەگەنى جاقسى, ال, بايدىڭ قۇداي بولسام دەگەنى قيىن» (شەرحان مۇرتازا). ويباي-اۋ, بۇگىندە باي بولسام دەپ كىم ارماندامايدى؟ قازىر جۇرتتىڭ بالاسىنىڭ ءبارى جوعارى ءبىلىم الۋعا قۇمار. جاستاردىڭ كوبىسى بايلىق, ناپاقا, مىش-مىش اقشانىڭ ءبارى سول قارجىگەر, زاڭگەر, ەكونوميست سەكىلدى ماماندىقتاردا جاتقانداي كورەتىنى بار. قازاقتىڭ بالالارى تاباقتاي ديپلوممەن جۇمىسسىز جۇرگەندە, وزگە ۇلتتىڭ بالالارى 6 ايلىق كۋرستى ءبىتىرىپ الىپ, ءبىرى كومپيۋتەر جوندەپ, ءبىرى اينەك سالىپ, تەمىر دانەكەرلەپ, قۇبىر جوندەپ, تاماعى توق, كويلەگى ءبۇتىن جۇرەدى. وسىدان كەيىن جاستارعا كاسىپتىك ماماندىق بەرەتىن ورتا وقۋ ورىندارىنىڭ ءرولىن ارتتىرىپ, كوبەيتە ءتۇسۋ ماسەلەسى وزىنەن-ءوزى تۋىندايتىنى انىق.
جالپى العاندا كاسىپتىك ءبىلىم بەرەتىن ورتا وقۋ ورىندارىنا جاقسى كوڭىل بولىنگەن. وبلىستا ءوڭىر قاجەتتىلىگىنە ساي جاڭا ماماندىقتار اشىلىپ, حيميا, اۋىلشارۋاشىلىق, قۇرىلىس, تەحنيكالىق ماماندىقتارعا بولىنەتىن مەملەكەتتىك تاپسىرىس كولەمى ارتىپ كەلەدى. مەملەكەتتىك كوللەدجدەردە دايارلاناتىن ماماندىقتاردى بەلگىلى ءبىر سالاعا باعىتتاۋ, وڭتايلاندىرۋ, ولاردى كورپوراتيۆتى باسقارۋعا بەرۋ باعىتىندا جۇيەلى جۇمىستار جۇرگىزىلىپ وتىر.
كاسىبي مامان دايارلاۋدا – دۋالدى وقىتۋدى ەنگىزۋدىڭ ماڭىزى زور. وتكەن وقۋ جىلىندا جامبىل وبلىسىنداعى 27 كوللەدجدە دۋالدى وقىتۋ ەنگىزىلىپتى. بۇل كورسەتكىش الدىڭعى وقۋ جىلىنا قاراعاندا ارتقانىمەن, ءالى دە وسى جۇيەمەن جۇمىس جۇرگىزەتىن كوللەدجدەر سانىن ۇلعايتۋ قاجەت. ويتكەنى, بۇل جۇيە – بىلىمگەرلەردىڭ ماماندىققا ماشىقتانۋىنا, تەوريالىق ءبىلىمىن تاجىريبەمەن ۇشتاستىرۋعا جانە جۇمىسقا ورنالاسۋعا ۇلكەن مۇمكىندىك بەرەدى.
بيىل جامبىل وبلىسىندا جالپى قۇنى 16,8 ملرد تەڭگەنى قۇرايتىن 8 ينۆەستيتسيالىق جوبانى ىسكە اسىرۋ جوسپارلانۋدا, 380 جاڭا جۇمىس ورنىن اشۋ كوزدەلۋدە. بۇل دەگەنىمىز كوللەدجدە وقىپ جۇرگەن جاستارىمىز ءۇشىن ۇلكەن مۇمكىندىك ەمەس پە؟ ەندەشە تەحنيكالىق-كاسىپتىك ءبىلىم بەرۋ ۇيىمدارى وڭىردە ينۆەستيتسيالىق جوبالار بويىنشا اشىلاتىن كاسىپورىندارمەن تىعىز بايلانىس جاساپ, ولاردىڭ قاجەتتىلىكتەرىنە سايكەس كادرلار دايىنداۋلارى ءتيىس.
سوندىقتان وبلىستىق ءبىلىم باسقارماسى, جۇمىسپەن قامتۋدى ۇيلەستىرۋ جانە الەۋمەتتىك باعدارلامالار, اۋىلشارۋاشىلىعى, كاسىپكەرلىك باسقارمالارى وبلىستىق كاسىپكەرلەر پالاتاسىمەن بىرلەسە وتىرىپ, كاسىپتىك باعدار بەرۋ جۇمىستارىن ۇيىمداستىرىپ, دۋالدى وقىتۋ ەنگىزىلگەن كوللەدجدەر جەلىسىن ۇلعايتىپ, بىتىرۋشىلەردىڭ جۇمىسقا ورنالاسۋىنا بارىنشا ىقپال ەتۋ شارالارىن جۇرگىزۋلەرى قاجەت. بۇل ءۇشىن, ارينە, اي سايىن جۇمىسقا ورنالاسقان تۇلەكتەر تۋرالى مالىمەتتەر بازاسىن جاڭارتىپ, قاداعالاپ وتىرۋ كەرەك.
قالاي ايتساق تا كوللەدج تۇلەكتەرىن جۇمىسقا ورنالاستىرۋ – كۇردەلى ماسەلە. تەك بۇل ماسەلە جوعارى جاققا اقپار بەرۋ ءۇشىن قاعاز بەتىندە عانا ەمەس, ءىس جۇزىندە ورىندالىپ جاتسا جاستاردىڭ كاسىپتىك ءبىلىم بەرەتىن ورتا وقۋ ورىندارىنا دەگەن ىقىلاسى ارتا تۇسەتىنى انىق.
ورالحان ءداۋىت,
«ەگەمەن قازاقستان»
جامبىل وبلىسى