فۋتبولدان 2018 جىلعى الەم چەمپيوناتى ىرىكتەۋ جارىسىنىڭ ە توبىنا تۇسكەن قازاقستان قۇراماسى قىركۇيەكتىڭ 4-ءى كۇنى تۇندە تۋرنيردەگى ءبىرىنشى ماتچىندا پولشا كومانداسىن قابىلدادى. ەلوردانىڭ «استانا-ارەنا» سپورت كەشەنىندە وتكەن قىزىقتى كەزدەسۋ 2:2 ەسەبىمەن اياقتالدى. وسىلايشا سول كۇنى جاسى 48-گە تولىپ وتىرعان تالعات بايسۋفينوۆ رەسپۋبليكا تەرمە جاماعاتى تىزگىنىن قولعا ۇستاعالى بەرى وتكىزگەن ءبىرىنشى رەسمي ويىنىندا كۇشتى قارسىلاسىمەن تەڭ ناتيجەگە قول جەتكىزدى.
تەگىندە, بيىل عانا ەۋروپا چەمپيوناتىنىڭ شيرەك فينالىنا دەيىن بارعان توپتىڭ نەگىزگى فاۆوريتىمەن وتەتىن كەزدەسۋدىڭ ءبىزدىڭ جىگىتتەر ءۇشىن وڭايعا سوقپايتىنىن الدىن الا ءبارىمىز دە شامالاعانبىز. مۇنىڭ ۇستىنە, قارسىلاستاردىڭ باسى 2003 جىلدان باستالاتىن ءۇش كەزدەسۋىندە دە پولياكتار جەڭىپ كەتكەن.
الاڭ يەلەرى ويىندى وتە ەركىن باستادى. ولاردىڭ سەنىمدى ويىندارى ادەپكىدە قوناقتاردى ءبىرشاما توسىلدىرىپ تاستاعانداي كورىندى. سوندىعىنان بولار, ولار كوپكە دەيىن دوپقا يەلىك ەتە المادى. بىراق 9-مينۋتتا دوپ اياقتارىنا تيگەن بويدا قۇيىنداي قۇيعىتقان قارسى شابۋىل ۇيىمداستىرىپ, ءبىزدىڭ شەپكە تەز جەتىپ كەلدى. پولياكتار الدىمەن سول قاپتالدان قاقپا الاڭىنا قاراي دوپ جونەلتتى. وعان ءبىزدىڭ ءۇش بىردەي قورعاۋشىدان بۇرىن جەتكەن بارتوش كاپۋستكا اياعىن توسا قويدى. ەسەپ وسىلاي اشىلدى. ال 35-مينۋتتا روبەرت لەۆاندوۆسكي پەنالتيدەن ەسەپتى 2:0-گە جەتكىزدى.
ءبىز وسىدان كەيىن ءوز كوماندامىزدىڭ بارلىق ىنتاسى مەن ءمۇمكىندىگى تاۋسىلىپ بىتكەندەي كورىپ ەدىك. بىراق جىگىتتەر قايتپادى. الدىمەن ەكى ويىنشىنى قارسىلاستار قاقپاسى الدىندا الداپ وتكەن باۋىرجان يسلامحان گولكيپەر لۋكاش فابيانسكيمەن بەت-بەت كەلىپ, دوپتى باعاننىڭ جانىنان جىبەردى. 42-مينۋتتا ماقسات بايجانوۆتىڭ اۋەلەتىپ جىبەرگەن دوبىن يسلامبەك قۋات باسپەن ۇرىپ, فابيانسكيدى تاعى ءبىر سىناپ ۇلگەردى.
كوماندالار ەكىنشى تايمعا بۇرىنعى قۇرامدارىمەن ورالدى. قازاقستان قۇراماسىنىڭ بەلدى فورۆاردى سەرگەي حيجنيچەنكو باس-اياعى جەتى مينۋتتىڭ ىشىندە الاڭنىڭ وپاي-توپايىن شىعارىپ, ەسەپتى تەڭەستىردى دە جىبەردى. ادەپكى گول 51-مينۋتتا جارتىلاي قورعاۋشى دميتري شومكونىڭ سول قاپتالدان ايىپ الاڭى ىشىنە دوپ جەتكىزۋىنەن كەيىن سالىندى. ونى كەۋدەسىمەن قابىلداپ العان شابۋىلشى گولكيپەر مەن قورعاۋشىنى الداپ ءوتىپ, قاقپا تورىن ب ۇلىك ەتكىزدى. بۇدان كەيىن پولياكتار ەكى رەت ستاندارتتى جاعدايدان دوپ ۇردى. مۇنىڭ سوڭى تاعى دا الاڭ يەلەرىنىڭ قارسى شابۋىلىنا ۇلاستى. تاعى سول بۇيىردەن دوپ جەتكىزىلدى. بۇل جولى ماقسات بايجانوۆ فورۆاردقا جول اشىپ بەردى. ءسويتىپ, ەسەپ تەڭەستى دە كەتتى.
جاعدايدىڭ بۇلايشا قالىپتاسۋى, البەتتە, پولياكتارعا ۇناعان جوق. سوندىقتان ولار ەستەرىن جيىپ العاننان كەيىن قايتا شابۋىلعا شىعا باستادى. مۇندا كوپ رەتتە لەۆاندوۆسكي ۇرعان دوپتاردىڭ جولىنان شومكو تابىلىپ جاتتى. ەندى ءبىر كەزدە ميليك الىستان ۇرىپ, باعىن سىناپ كورمەك بولدى. كەلەسى ءبىر مەزەتتە لەۆاندوۆسكيدىڭ بەرگەن دوبىن ياكۋب بلاششيكوۆسكي جاقىن جەردەن ۇرىپ تۇسىرە المادى. مۇنىڭ سوڭىنان الاڭ يەلەرى بۇرىشتاما دوبىنان گول سوعىپ كەتۋگە ءسال قالدى.
وسىمەن ىرىكتەۋ تۋرنيرىندەگى ءبىرىنشى ويىن ەكى قۇراماعا تەڭ ناتيجە اكەلدى. وسى كۇنى وسى توپتاعى دانيا قۇراماسى ارمەنيانى قابىلداپ, 1:0 ەتىپ ۇتسا, رۋمىنيا مەن چەرنوگوريا 1:1 ەسەبىمەن تەڭ ءتۇستى. بۇدان باسقا, مىناداي ناتيجەلەر تىركەلدى: چەحيا – سولتۇستىك يرلانديا 0:0, نورۆەگيا – گەرمانيا 0:3, مالتا – شوتلانديا 1:5, ليتۆا – سلوۆەنيا 2:2, سلوۆاكيا – انگليا 0:1, سان-مارينو – ازەربايجان 0:1. قالعان ويىنداردىڭ ءبىرسىپىراسى كەشە وتسە, سوڭى بۇگىن وينالادى.
قازاقستان قۇراماسى كەلەسى كەزدەسۋىن 8 قازان كۇنى سىرت الاڭدا چەرنوگوريامەن وتكىزەدى.
سەرىك ءپىرنازار,
«ەگەمەن قازاقستان»
سۋرەتتى تۇسىرگەن
ورىنباي بالمۇرات