بۇگىن الەمنىڭ 206 ەلىنىڭ سپورتشىلارى مەن بوسقىندار قۇرامالارىنىڭ باسىن قوسىپ, ۇزىن سانى 974 مەدالدى ساراپقا سالدىرعان, تابانى كۇرەكتەي 16 كۇن بويى جەر شارى جۇرتىنىڭ باسىم بولىگىن وزىنە كوز تىگىپ, قۇلاق تۇرگىزدىرىپ قويعان وليمپيادانىڭ اياقتالعانىنا تۋرا 16 كۇن تولىپ وتىر. ريو-دە-جانەيرونىڭ تورىندە جارىس كورىگىن قىزدىرعان بۇل الاماننىڭ قىزىعى مەن قىزۋى ءالى باسىلا قويعان جوق. كەرىسىنشە, 2020 جىلى توكيودا وتەتىن كەلەسى ويىندارعا دەيىن ايتىلا بەرەتىن ونىڭ ءمانى مەن ماڭىزى, سالماعى مەن سارابى تۋرالى ءادىپتى اڭگىمەلەردىڭ كەزەگى الداعى كۇندەردىڭ ەنشىسىندە جاتىر.
ەندى وليمپيالىق ۋاقىتپەن بىردەي مەزگىل وتكەننەن كەيىن ءبىز دە وعان قايتا ءبىر ورالىپ, ويىندار قورىتىندىلارى تۋراسىندا قىسقاشا ءسوز قوزعاپ كورەيىك. بىردەن ايتىپ قويايىق, قازاقستان سپورتشىلارىنىڭ ريودا قول جەتكىزگەن تابىستارى شىن مانىندە ەرەسەن ەرلىكپەن پارا-پار بولدى. مۇنى پايىمداۋ ءۇشىن بىزگە بۇدان بۇرىنعى وليمپيادالارداعى كورسەتكىشتەر مەن ەسەپ-قيساپتى بەزبەن باسىنا تاعى ءبىر سالىپ وتۋگە تۋرا كەلەدى. بارىڭىزگە بەلگىلى, قازاقستان دەربەس كوماندا رەتىندە العاش رەت قاتىسقان 1996 جىلعى وليمپيالىق ويىنداردا 3 التىن, 4 كۇمىس جانە 4 قولا مەدال جەڭىپ العان بولاتىن. مۇنى سپورتتىڭ 14 ءتۇرى بويىنشا سايىسقا تۇسكەن 96 سپورتشىمىز الىپ كەلدى. مىنە, بۇدان كەيىنگى كەزەڭدەردە ءبىزدىڭ وليمپيالىق ويىندارعا قاتىسقان ساڭلاقتارىمىزدىڭ سانى مەن ولاردىڭ جارىسقان بايگەلەرىنىڭ قاتارى ۇدايى ءوسىپ وتىردى. وسىلايشا, ءبىز 2000 جىلى سيدنەيگە 17 سپورت ءتۇرى بويىنشا 130 تارلانىمىزدى اپاردىق. ولار «جاسىل قۇرلىقتان» 3 التىن جانە 4 كۇمىس مەدال الىپ قايتتى. 2004 جىلى افينادا جالاۋ جەلبىرەتكەن كەلەسى ويىنداردا سپورتتىڭ 17 ءتۇرى بويىنشا 119 ساڭلاق ەلىمىزدىڭ نامىسىن قورعادى. بۇلاردىڭ ەنشىسىنە 1 التىن, 4 كۇمىس جانە 3 قولا مەدال جازىلدى.
بۇدان كەيىن 2008 جىلى بەيجىڭدە كەرۋەن كەرگەن الامان 22 سپورت تۇرىنەن ءبىزدىڭ 132 سپورتشىمىزدى جارىس جولدارىنا شىعاردى. ولار ەلگە 2 التىن, 4 كۇمىس جانە 7 قولا مەدالمەن ورالدى. ءسويتىپ, جالپى مەدال سانىن ءبىرىنشى رەت 13-كە جەتكىزدى. 2012 جىلى لوندوندا تاپ وسى مەدالدار سانى جونىندەگى ۇزدىك كورسەتكىش جانە ءبىر قايتالاندى. بىراق بۇل كەزدەگى ەڭ باستى تابىس سپورتشىلارىمىزدىڭ التىن مەدالدار سانىن 7-گە جەتكىزۋى ەدى. سول سياقتى قورجىنعا تاعى 1 قولا جانە 5 كۇمىس مەدال ءتۇستى. بۇلاردى سپورتتىڭ 20 ءتۇرى بويىنشا سايىسقا شىققان 115 ورەنىمىز جۇزەگە اسىردى. ال برازيليا جەرىنە 104 نامىستى ۇل-قىزدارىمىز اتتانىپ, 17 ءتۇرلى سايىس بويىنشا جۇلدەلەر ءۇشىن كۇرەسكە قاتىستى. بۇلاردىڭ الىپ قايتقاندارى 3 التىن, 5 كۇمىس جانە 9 قولا مەدال بولدى. وسىنىڭ نەگىزىندە جالپى مەدالدار كورسەتكىشى جونىنەن 17-گە توقتاپ, تاعى ءبىر رەكوردقا قۇلاش ۇردىق. ال تاپ ويىندار باستالار الدىندا ءتورت بىردەي وليمپيادا چەمپيونىمىزدىڭ جولدارىنا توسقاۋىل قويىلماعاندا, جۇلدەلەر سانىنىڭ بۇدان دا كوپ بولاتىنىندا ەشبىر كۇمانىمىز جوق.
وسىلاردىڭ ءبارى ءبىزدىڭ ەلىمىزدە سپورتتىڭ كوپتەگەن ءتۇرى بويىنشا العان باعىت پەن باعداردىڭ دۇرىس ەكەنىن بايقاتادى. ءبىز بۇل جەردە, ەڭ الدىمەن, اۋىر اتلەتتەرىمىزگە ريزاشىلىق ءبىلدىرۋىمىز كەرەك. «قاناتى قايىرىلىپ, تۇمسىعى مايىرىلىپ» بارعان سول ۇجىم قورىتىندىدا كوماندالىق ەسەپتە بەسىنشى ورىنعا تۇراقتادى. ال تاياۋ كۇندەردە بۇل ساپقا تاعى ءبىر قولا مەدالدىڭ قوسىلىپ قالۋى ابدەن مۇمكىن. ءوزىنىڭ قايسىبىر ويىنداردان دا التىن مەدال الىپ كەلۋ ءۇردىسىن جاقسى جالعاستىرا بىلگەن بوكسشىلارىمىز دا اسپەتتەۋگە تۇرادى. ونىڭ ۇستىنە, بۇعان دەيىن ەڭ جوعارى كورسەتكىشى 4 مەدالدان اسىپ كورمەگەن بىلعارى قولعاپ شەبەرلەرىنىڭ بۇل جولى 5 جۇلدەمەن ورالىپ وتىرعانىن دا ۇمىتپاۋ كەرەك. سول سياقتى ايەلدەر كۇرەسىنىڭ وكىلدەرى دە ايدى اسپاننان ءبىر-اق شىعاردى. وسى ساپتا سۋدا ءجۇزۋ سپورتىنان تۇڭعىش رەت التىن مەدالدىڭ الىنۋى بۇل سالاعا سونى سەرپىن بەرەتىن بولسا كەرەك.
مۇنىڭ ءبارىن نەگە ايتىپ وتىرمىز؟ قازىر ماماندار مەن جانكۇيەرلەر اراسىندا ويىندارعا بارىپ قايتقان سپورتشىلارىمىزبەن جاتتىقتىرۋشىلارىمىزدى ءجوندى-ءجونسىز سىناۋشىلار كوبەيىپ كەتتى. البەتتە, سىن ايتىلۋى كەرەك. ول ەندىگى جۇمىستى جاقسارتۋ ءۇشىن دە قاجەت. بىراق سىن سىناۋ ءۇشىن عانا ايتىلماۋى ءتيىس. بىزدىڭشە, ءتيىستى فەدەراتسيالار مەن باپكەرلەر شتابتارى وزدەرىنىڭ جىبەرگەن كەمشىلىكتەرى مەن ولقىلىقتارىن سىرت كوزدەن دە ارتىق بىلەدى. تەك ولاردىڭ سول كەمشىن تۇستارى مەن ولقى جاقتارىن جۇيەلى دە جوسپارلى تۇردە جوندەۋلەرىن تىلەيىك.
ءبىزدىڭ بالا كۇنىمىزدە «بۇگىننەن دە بولادى ەرتەڭ نۇرلى» دەپ كەلەتىن ءان جولدارى بولۋشى ەدى. ال ءبىز سپورتىمىزدىڭ كەلەشەگى بۇگىنگىدەن دە الەۋەتتى بولا تۇسەتىنىنە, ونىڭ بۇرىن ءوزىمىز ءۇشىن وگەي كورىنىپ كەلگەن كوپتەگەن تۇرلەرىنىڭ وركەن جايا باستايتىنىنا سەنىمدىمىز. بۇعان ەلباسىنىڭ تىكەلەي تاپسىرماسىمەن قازىر ءبىراز ۋاقىتتان بەرى ءارتۇرلى وبلىستار ورتالىقتارىندا سالىنىپ كەلە جاتقان الۋان سيپاتتى سپورت سارايلارى تولىق دالەل.
سەرىك ءپىرنازار,
«ەگەمەن قازاقستان»