قازاقستان – 18 ملن حالقى بار, بىراق تەرريتوريا جاعىنان 9-شى ورىندا بولعانىمەن الەمدەگى ورنى بولەك ەل. ويتكەنى, قازاقستان – انتيادرولىق قوزعالىستىڭ باسىندا كەلە جاتقان مەملەكەت. مىنە, ەلباسى قىتايعا وسىنداي الەمدىك ۇدەرىستەرگە ۇلكەن ۇلەس قوسىپ وتىرعان مەملەكەتتىڭ باسشىسى رەتىندە شاقىرىلدى.
ايتا كەتەيىن, نۇرسۇلتان نازارباەۆ حانچجوۋدا قىتاي حالىق رەسپۋبليكاسىنىڭ توراعاسى سي تسزينپينمەن كەزدەستى. ءتورت قۇجات بەكىتىلدى. سونىڭ ءبىرى – «نۇرلى جول» جانە «جىبەك جولىنىڭ ەكونوميكالىق بەلدەۋى» باعدارلامالارىن ۇشتاستىرۋ جونىندەگى ىنتىماقتاستىق جوسپارى.
الىس تۇرعان اعايىننان, جاقىن تۇرعان كورشى ارتىق. قىتاي توراعاسىنىڭ قازاقستانعا دەگەن كوزقاراسى وسىنداي! نۇرسۇلتان نازارباەۆتى ۇلكەن جيىرمالىقتىڭ جيىنىنا ارنايى شاقىرۋى بەرىك دوستىقتى بىلدىرەدى. كوشباسشىلاردىڭ سامميت قارساڭىندا كەزدەسۋى دە سەرىكتەس ەلدەردىڭ ىنتىماقتاستىعىن اڭعارتتى.
قوس كوشباسشىنىڭ بيىلدىققا ءۇشىنشى جۇزدەسۋى بۇل. جەمىستى دەۋگە نەگىز بار. ساۋدا-ەكونوميكا, كولىك-ترانزيت, وتىن-ەنەرگەتيكا ماسەلەلەرى قوزعالدى. ارالاس-قۇرالاس بولىپ كەتكەن ەكى ەلدىڭ بۇل باعىتتاردا جوسپارلارى كوپ. دەگەنمەن, اڭگىمەنى نۇرسۇلتان نازارباەۆ سي تسزينپينگە جۇمىس ساپارىمەن كەلۋگە, G20-عا قاتىسۋعا شاقىرعانى ءۇشىن العىس ايتۋدان باستادى.
G20-نىڭ ەكونوميكاعا ۇلكەن ەكپىن قويىپ وتىرعانى وتە دۇرىس دەپ ايتامىن. ويتكەنى, كوپ تۇيتكىلدەر وسى جەردە شەشىلۋى ءتيىس. G20-عا الەمدەگى بارلىق مەملەكەتتەر كەلەدى. حالىقارالىق ۇيىمدار, سودان كەيىن شاقىرىلعان مەملەكەتتەر بار. ونىڭ ىشىندە قازاقستان دا ءوزىنىڭ پىكىرىن ءبىلدىردى. ونىڭ ۇستىنە, قازاقستاننىڭ مورالدىق جانە قۇقىقتىق ءجونى بار. سەبەبى, جاڭا جىبەك جولىنىڭ بويىندا تۇرعان مەملەكەت. 2,5 مىڭ شاقىرىم جىبەك جولى قازاقستاننىڭ تەرريتورياسىمەن وتەدى. ترانزيتتىك, كولىكتىك ماسەلەلەر بار بۇل جەردە. وسىعان بايلانىستى كوپتەگەن ماسەلەلەر شەشىلەدى. سوندىقتان قازاقستاننىڭ ۇلەسى وتە ۇلكەن بولماق.
ءادىل احمەتوۆ,
قازاقستاننىڭ ەڭبەك سىڭىرگەن قايراتكەرى