ماسەلەسى وبلىستا تولىق شەشىلىپ, 1200-دەي وقۋشى ساباقتى جاڭارتىلعان عيماراتتاردا باستادى
بيىل وڭىردە 72 803 شاكىرت مەكتەپ تابالدىرىعىن اتتاسا, 8 582-ءسى العاش رەت پارتاعا وتىرىپ, كۇمىس قوڭىراۋ سىڭعىرىن ەستىدى. ەلىمىز تاۋەلسىزدىك العاننان بەرى 37 ءبىلىم ءۇيىنىڭ بوي كوتەرگەنىن, بىلتىر اپاتتى جاعدايدا تۇرعان عيماراتتار جايى ءبىرجولا ەڭسەرىلگەنىن ەسكەرسەك, وقۋ-اعارتۋ سالاسىنا مەملەكەت, جەرگىلىكتى بيلىك تاراپىنان ۇلكەن كوڭىل ءبولىنىپ وتىرعانىن اڭعارۋ قيىن ەمەس. بيىلعى جاڭا وقۋ جىلىنداعى باستى جاڭالىقتاردىڭ بىرىنە «نۇرلى جول» ينفراقۇرىلىمدى دامىتۋ باعدارلاماسى اياسىندا ءۇش اۋىسىممەن وقىتۋ جايىنىڭ تۇبەگەيلى شەشىم تاپقانىن اتار ەدىك.
بۇل كۇندى ع. مۇسىرەپوۆ اۋدانىنىڭ تۇرعىندارى تاعاتسىزدانا توسقان بولاتىن. ويتكەنى, بۇرىنعى اۋپارتكومنىڭ تار عيماراتىندا 400-گە جۋىق وقۋشىنىڭ قىسىلا-قىمتىرىلا وتىرۋلارىنا تۋرا كەلگەن. اتا-انالار مۇڭدارىن شاعىپ, تالاي ەسىكتەردى جاعالاعانمەن, وزەكتى پروبلەما ساعىزداي سوزىلىپ كەلگەن. تەك «قازاقستان جولى-2050: ءبىر ماقسات, ءبىر مۇددە, ءبىر بولاشاق» جولداۋىندا ايتىلعان 2017 جىلعا دەيىن ەلدەگى بارلىق مەكتەپتى ەكى اۋىسىممەن وقىتۋعا كوشىرۋ تۋرالى تالاپتاردان كەيىن عانا كەشەندى ءىس-قيمىلدار باعدارلاماسى ءتۇزىلىپ, 400 ورىندى مەكتەپ ءۇيىن كوتەرۋگە 1 ميلليارد 600 ميلليون تەڭگە ءبولىندى. باس مەردىگەر «الفا-سەۆەر» كومپانياسى ءوز ءىسىن جاۋاپكەرشىلىكپەن اتقارىپ, ەكى قاباتتى ءبىلىم ءۇيىن 1,5 جىلدىڭ ىشىندە سالىپ ءبىتىردى. نوۆويشيم قازاق ورتا مەكتەبىنىڭ اشىلۋ سالتاناتىنا ايماق باسشىسى ەرىك سۇلتانوۆ قاتىسىپ, ۇستازدار مەن اتا-انالاردى ايتۋلى مەرەكەمەن قۇتتىقتادى. ول ءوز سوزىندە ەل تاۋەلسىزدىگىنىڭ 25 جىلدىعى مەرەيتويى قارساڭىندا ەلباسى تاپسىرماسى ابىرويمەن ورىندالعانىن اتاپ ءوتتى. ءبىرىنشى سىنىپ وقۋشىلارىنا پرەزيدەنت اتىنان «مەنىڭ وتانىم – قازاقستان» كىتابىن, مەكتەپ-ينتەرناتقا «گازەل» اۆتوكولىگىنىڭ كىلتىن تابىس ەتتى.
– ءۇش اۋىسىمدا وقۋ وقۋشىلارعا دا, ۇستازدارعا دا اۋىر سوققان. بۇگىنگى قۋانىشىمىزدى ايتىپ جەتكىزۋ قيىن. فيزيكا, حيميا, بيولوگيا, ينفورماتيكا, مۋلتيمەديالىق كابينەتتەرگە سوڭعى ۇلگىدەگى قۇرال-جابدىقتار ورناتىلعان. ايىرتاۋ مەن شال اقىن اۋداندارىنان دا وقۋشىلار قاتىنايدى. ولار 200 ورىندى ينتەرناتتا تۇراتىن بولادى, – دەدى جۋرناليستەرگە بەرگەن سۇحباتىندا مەكتەپ-ينتەرناتتىڭ ديرەكتورى سارسەنگۇل سۇيەسىنوۆا.
بۇدان بولەك اسحانا, اكت جانە سپورت زالدارى, مەديتسينالىق كابينەت, كىتاپحانا, ينتەرنەت-زال جۇمىس ىستەيدى. مەكتەپ جانىندا ستاديون, مونشا ورنالاسقان.
قىزىلجار اۋدانىنا قاراستى بايتەرەك اۋىلى تۇرعىندارىنىڭ دا كوپتەن كۇتكەن ارمانى ورىندالدى. بۇل ەلدى مەكەندى «ورالماندار اۋىلى» دەپ تە اتايدى. 7 جىل بۇرىن وتانداستاردى ەلگە ورالتۋ باعدارلاماسى شەڭبەرىندە وسى جەرگە شەتتەن كەلگەن اعايىندارىمىز ورنالاسىپ, جاسىل جەلەك جامىلعان اۋىل پايدا بولدى. بۇگىندە مۇندا 1 550-دەي ادام تۇرسا, ۇشتەن ءبىرىن 18 جاسقا دەيىنگىلەر قۇرايدى. 300-دەن استام وقۋشىنىڭ اۋدان ورتالىعىنا قاتىناپ وقۋى ەڭبەك دەسە ەرىنبەيتىن, قيىندىقتان قايمىقپايتىن ءۇلكەندەردىڭ قاباعىنا كىربىڭ ۇيالاتاتىن. ەندى جۇزدەرىنە نۇر ۇيالاپ, قۋانىشتارىن ءبىر-بىرىمەن بولىسكەنشە اسىق. وبلىستىق بيۋدجەتتەن بولىنگەن قاراجاتتىڭ ەسەبىنەن جارتى جىلدىڭ ءىشىندە سالىنعان 300 ورىندى ءبىلىم ورداسى ءوز ەسىگىن ايقارا اشتى. وسىلايشا 53 مۇعالىم, 19 تەحنيكالىق قىزمەتكەر تۇراقتى جۇمىسقا ورنالاستى. وسىنداعى سالتاناتتى شاراعا قاتىسقان ە.سۇلتانوۆ ۇستازدار الدىندا ءبىلىم بەرۋدىڭ جاڭا جۇيەسىن ەنگىزۋ, باسەكەگە قابىلەتتى, ءبىلىمدى, بىلىكتى ۇرپاق تاربيەلەۋ مىندەتى تۇرعانىن جەتكىزىپ, مەكتەپ ۇجىمىنا سۋ جاڭا اۆتوبۋستىڭ كىلتىن تارتۋ ەتتى.
– مەكتەپتىڭ بوي كوتەرگەنىنە ريزاشىلىعىمىزدى بىلدىرەمىز. بالالارىمىز ەندى سۋىقتا ءبۇرسەڭدەپ, توڭبايتىن بولادى. ولاردىڭ ساپالى ءبىلىم الۋىنا بارلىق جاعداي جاسالعان. 5 نەمەرەمنىڭ بىرەۋىن ءبىرىنشى سىنىپقا, ەكىنشىسىن دايىندىق توبىنا بەردىك. قالعاندارى جوعارى سىنىپتاردا وقيدى. الىسقا اپارۋ ابدەن قاجىتىپ ەدى, اق تۇيەنىڭ قارنى جارىلعان وسىنداي باقىتتى كۇنگە جەتكەنىمىزگە سەنە الار ەمەسپىز, – دەيدى اۋىل تۇرعىنى مەڭدىباي راحمەتوۆ.
5 بالا تاربيەلەپ وتىرعان الماگۇل پارتيزاننىڭ شاتتىقتان ءجۇزى الاۋلاپ, جانارىنان وت ۇشقىندايدى. وسىندا جۇمىسقا ورنالاسقانىنا شۇكىرشىلىك ەتەدى. جولداسى دا ەلەكترمەن دانەكەرلەۋشى قىزمەتىنە قابىلدانىپتى. 52 مۇعالىمنىڭ التاۋى «ديپلوممەن – اۋىلعا!» باعدارلاماسى بويىنشا ورنالاسىپتى. سولاردىڭ ءبىرى ساكەن قۇسايىنوۆ م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىن ينفورماتيكا ماماندىعى بويىنشا ءتامامداپ, جولدامانى وسىندا الىپتى. 4 كابينەتكە 48 كومپيۋتەر قويىلعان. بولمەلەر كەڭ ءارى جارىق, دەيدى جاس مامان. 120 ورىندى اسحانانىڭ باعاسى قولجەتىمدى. از قامتىلعان, تۇرمىسى تومەن وتباسىلاردان شىققان 75 بالا تەگىن تاماقتانادى.
مەكتەپ قۇرىلىسىنا, جيھازدار, قوندىرعىلار ساتىپ الۋعا 825 ميلليون تەڭگە جۇمسالىپتى.
تايىنشالىقتار دا زاماناۋي مەكتەپ ءۇيىنىڭ زارىن ابدەن تارتقانداردىڭ ءبىرى. وقۋشىلار مەن ۇستازدار كوپ جىل بويى ەشقانداي تالاپقا ساي كەلمەيتىن عيماراتتى پانالاۋلارىنا تۋرا كەلگەن. قانشا جەردەن جوندەۋ كوردى دەگەننىڭ وزىندە ەسكىنىڭ جۇرناعى انادايدان مەنمۇندالاپ تۇراتىن. قازاقشا ءدارىس الاتىن شاكىرتتەر وسىنداي مۇشكىل حالدە جۇرسە دە, ۇلگەرىمدەرىن ءتومەندەتپەدى. قوعامدىق بەلسەندىلىكتەرىن جوعالتپادى. بىردە جاقسى جاڭالىق جىل قۇسىنداي ساعىنتىپ جەتتى. اسىرەسە, مۇعالىمدەردىڭ ابدەن زارەزاپ بولىپ قالعاندارى سونشالىق, باستاپقىدا سەنبەگەن. مەردىگەر ۇيىمدار مەن قۇرىلىسشىلار ىسكە بىلەك سىبانىپ, ىلدىم-جىلدىم كىرىسكەندە عانا ءۇش اۋىسىمنىڭ ازابىنان قۇتىلارىنا كوزدەرى جەتىپ, كوڭىلدەرىندە ءۇمىت وتى ويانعان. ءزاۋلىم ساراي ىسپەتتەس ەكى قاباتتى ءبىلىم ءۇيى پايدالانۋعا بەرىلگەندە قالىڭ جۇرتشىلىق اۋدان ورتالىعىنداعى جالعىز ۇلتتىق شاڭىراققا قاراي اعىلعان. ورتاق قۋانىشتى بولىسكەن تۇرعىندار بالالارىمىز ەكى اۋىسىمدا وقيتىن بولدى دەسىپ, ارقالارىنان اۋىر جۇك تۇسكەندەي جەڭىلدەنىپ سالا بەرگەن.
سالتاناتتى جيىنعا كەلگەن وبلىس اكىمىنىڭ ءبىرىنشى ورىنباسارى ايداربەك ساپاروۆ قۇرىلىس جۇمىستارىن دەر كەزىندە بىتىرگەن «وسنوۆانيە» جشس باسشىلىعىنا العىسىن ارناپ, جينالعانداردى ايتۋلى وقيعامەن قۇتتىقتادى. جاس ۇرپاقتىڭ جوعارى ءبىلىم جەتىستىكتەرىمەن قۋانتارىنا سەنىم ءبىلدىرىپ, «گازەل» كولىگىنىڭ كىلتىن تابىستادى.
ءبىز اۋداندىق وقۋ ءبولىمىنىڭ باسشىسى ەركىن ورازوۆتى سوزگە تارتقانىمىزدا ول بۇرىنعى مەكتەپ ءۇيى 100 عانا ورىندى بولسا, جاڭا عيمارات 300 ورىنعا لايىقتالعانىن, وقۋشىلار سانى 440 بولعانىن, ءۇش ءبىرىنشى سىنىپ اشىلعانىن, 26 كابينەت, 30 ورىندى ينتەرنات جۇمىس ءىستەيتىنىن جەتكىزدى. 46 مۇعالىم ءوسكەلەڭ ۇرپاق تاربيەسىنە اتسالىساتىن بولادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى