«قازاقپارات» حالىقارالىق اقپارات اگەنتتىگىنىڭ الدىندا تۇرعان نەگىزگى مىندەت – ەلىمىزدىڭ ەڭ باستى اقپارات سايتى دارەجەسىنە ساي بولۋ. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن ءباسپاسوز-ءماسليحاتىندا «قازاقپارات» حالىقارالىق اقپارات اگەنتتىگىنىڭ باس ديرەكتورى اسەل تولەگەنوۆا مالىمدەدى.
«ەگەر ورتا ەسەپپەن الاتىن بولساق, «قازاقپارات» سايتىنا تاۋلىگىنە 27 مىڭ ادام كىرىپ, ونداعى اقپاراتتاردى وقيدى ەكەن. ال الداعى ۋاقىتتا ءبىز بۇل كورەستكىشتى 45 مىڭعا دەيىن جەتكىزۋدى كوزدەپ وتىرمىز. ول ءۇشىن ەڭ الدىمەن, ءبىزدىڭ كونتەنتىمىز تۇبىرىمەن جاڭالانادى. ارينە, بۇرىنعىداي مەملەكەتتىك باعدارلامالار مەن مەملەكەتتىك ورگانداردىڭ قىزمەتى تۋرالى اقپاراتتار تۇراقتى تۇردە بەرىلىپ تۇرادى. بىراق ودان بولەك, ءبىز قاراپايىم ينتەرنەت پايدالانۋشى وقىرماننىڭ تالاپ-تىلەگىنە جاۋاپ بەرەتىن, سول ارقىلى ولاردى قىزىقتىراتىن, ويلارىنان شىعاتىن دۇنيەلەردى جاريالاۋدى نازاردا ۇستايتىن بولامىز», دەدى اسەل دۋلاتقىزى. ونىڭ ايتۋىنشا, الداعى ۋاقىتتا اگەنتتىك سايتىندا جاريالاناتىن اقپاراتتاردى بەرۋدىڭ قالىبى دا وزگەرمەك. «حابارلاردىڭ تاقىرىپتارى ويناقى, ال مازمۇنى وقىرماندارعا جەڭىل قابىلداناتىنداي ستيلدە جازىلادى. بۇعان قوسا, ءبىزدىڭ لوگوتيپىمىز وزگەرەدى. ياعني, حالىقارالىق اقاپارت اگەنتتىگى اتىنا ساي بولۋ ءۇشىن ءبىز لوگوتيپكە كەيبىر جاڭا ەلەمەنتتەردى ەنگىزدىك. ءبىز سايت قولدانۋشىلارىمەن كەرى بايلانىس ورناتىپ, ولاردى تولعاندىراتىن ماسەلەلەرگە دە ءۇن قوسىپ وتىراتىن بولدامىز», دەدى اگەنتتىكتىڭ باس ديرەكتورى.
ءباسپاسوز-ءماسليحاتىندا «قازاقپارات» وكىلدەرى سونداي-اق, بۇگىندە سايتتىڭ تەحنيكالىق تۇرعىدا جاڭالانۋى مەن وزگەرۋىنە, ديزايننىڭ جاڭارۋىنا ايرىقشا ءمان بەرىلىپ وتىرعانىن, بۇلاردىڭ بارلىعى اگەنتتىك سايتىنىڭ ءاردايىم ترەندتە بولۋ قاجەتتىگىنەن تۋىنداپ وتىرعانىن اتاپ ءوتتى.
ءلايلا ەدىلقىزى