وسىمەن 11-ءشى رەت ۇيىمداستىرىلىپ وتىرعان «ۇلكەن جيىرمالىقتىڭ» ءداستۇرلى ءسامميتى بۇگىن تۇستەن كەيىن باستالادى (استانا ۋاقىتىمەن سالىستىرعاندا حانچجوۋ قالاسى 2 ساعات ەرتە جۇرەدى). ونىڭ جۇمىسىنا قازاقستان پرەزيدەنتى نۇرسۇلتان نازارباەۆ قاتىسادى.
الەمدەگى جەتەكشى ەلدەردىڭ باسىن قوسىپ وتىرعان سامميتتە جاھاندىق ەكونوميكانىڭ ورنىقتى جانە تەڭگەرىمدى ءوسىمىن ىنتالاندىرۋ, حالىقارالىق قارجى سالاسىن جەتىلدىرۋ, ونىڭ رەفورمالارىن العا جىلجىتۋ, ينكليۋزيۆتى قارجىلاردى دامىتۋ ماسەلەلەرى تالقىلانادى.
وسى ارادا ايتا كەتەتىن نارسە, قىتاي تاراپى قازاقستان پرەزيدەنتى نۇرسۇلتان نازارباەۆتىڭ سامميتكە قاتىسۋىنا ۇلكەن ءمان بەرىپ وتىر.
ەسكە سالا كەتەيىك, 2015 جىلعى 1 جەلتوقساننان باستاپ «ۇلكەن جيىرمالىققا» توراعالىق تۇركيادان قىتايعا وتكەن بولاتىن. «يننوۆاتسيالىق, كىناراتسىز, ءوزارا بايلانىستى جانە ينكليۋزيۆتى الەمدىك ەكونوميكا قۇرۋ» تاقىرىبىنداعى بۇل سامميت ەرتەڭ اياقتالادى.
جولدىباي بازار,
«ەگەمەن قازاقستان» – حانچجوۋدان (قىتاي)