بۇگىن, 3 قىركۇيەك كۇنى كەشكە قىرعىزستاننىڭ ىستىقكول وبلىسىنىڭ ورتالىعى - چولپون-اتا شاارىنىڭ يپپودرومىندا كوشپەلىلەردىڭ بۇكىلالەمدىك ەكىنشى ويىندارى سالتاناتتى جاعدايدا اشىلدى.
كوشپەلىلەر وركەنيەتى بۇگىندە كۇللى ادامزات بالاسى ۇزدىك ۇلگى رەتىندە كەرەك ەتىپ وتىرعان تۇراقتى دامۋدىڭ باستاپقى قالپى بولىپ تابىلادى. بۇل تۋرالى وسىندا وتكەن كوشپەلىلەردىڭ بۇكىلالەمدىك ەكىنشى ويىندارىنىڭ اشىلۋ بارىسىندا ءسوز سويلەگەن قىرعىزستان پرەزيدەنتى المازبەك اتامباەۆ ايتتى. ونىڭ ايتۋىنشا, بۇۇ-نىڭ دامۋداعى باستى ماقساتى وسىعان باعىتتالعان.
پرەزيدەنت ءوز سوزىندە ويىندارعا قاتىسۋشىلار مەن قوناقتاردى وسىناۋ وراسان زور وردالى وقيعامەن قۇتتىقتادى. ول ەلدىڭ ءبىر مەزگىلدە 62 مەملەكەتتىڭ 1 مىڭ ادامعا جۋىق سپورتشىدان تۇراتىن ۇلكەن دەلەگاتسياسىن قابىلداۋعا قاۋقارلى بولىپ وتىرعانىنا ماقتانىش سەزىمىن ءبىلدىردى.
ا.اتامباەۆتىڭ سوزىنە قاراعاندا, فەستيۆالگە سونداي-اق قىرعىزستاننىڭ ءاربىر وبلىسىنان وكىلدەر كەلگەن. «قىرعىزدار قوناقتى قۇتتى ادام دەپ سانايدى. ۇيگە قانشا قوناق كەلسە, سونشا قۇت تا كىرەدى, دەيدى ولار. سوندىقتان قىرعىزدار قاشاننان قوناقتاردى قۇرمەتپەن جانە مەيماندوستىقپەن قارسى الادى. ءدال بۇگىنگى سياقتى», - دەدى ول.
قىرعىز ەلى پرەزيدەنتىنىڭ پىكىرىنشە, كوشپەلىلەر ويىندارىنا قىزىعۋشىلىق بىلدىرەتىن ەلدەردىڭ قاتارى ۇدايى ارتىپ كەلەدى. بۇدان نەبارى 2 جىل بۇرىن عانا وتكەن ءبىرىنشى ويىندارعا 19 ەلدىڭ وكىلى كەلگەن بولسا, قازىر بۇل تسيفر 62-گە جەتىپ وتىر. بۇدان ارتىق قانداي دالەل كەرەك!
ا. اتامباەۆ ءوزىنىڭ سوزىندە كوشپەلىلەردىڭ بۇكىلالەمدىك ەكىنشى ويىندارىن وتكىزۋگە قولداۋ كورسەتكەن بىرقاتار ەلدەردىڭ پرەزيدەنتتەرىنە العىس ايتتى.
قىرعىزستان پرەزيدەنتى سوڭىندا ويىنداردى اشىق دەپ جاريالادى.
دامير قوجامقۇل
https://youtu.be/tRVkBq_aG3c