تاۋەلسىزدىكتىڭ 25 جىلدىعىنا وراي استانا قالاسىندا «قۋاتتى ءوڭىر – قۋاتتى قازاقستان» اتتى قىزىلوردا وبلىسىنىڭ كۇندەرى وتەدى.
«الاشتىڭ اناسى» اتانعان سىر ەلىنىڭ استاناداعى اۋىلشارۋاشىلىق ءھام مەرەكەلى شاراسى ەكى كۇنگە سوزىلادى. ەڭ الدىمەن, قىزىلوردالىقتار اۋىلشارۋاشىلىق جارمەڭكەسىن ۇيىمداستىرىپ, وڭىردە وندىرىلەتىن تاۋارلارىن ارزان باعادا ەلوردا تۇرعىندارىنا ۇسىنادى. وندا قىزىلوردا قالاسى مەن 7 اۋداننان 45-كە تارتا ءونىم تۇرلەرى ساۋداعا تۇسەدى. ناقتىراق ايتساق, 70 توننا كۇرىش, 90 تونناعا جۋىق كوكونىس, 70 توننا باقشا داقىلدارى, 33 توننا كارتوپ, 20 توننا ارال تەڭىزىنىڭ بالىعى, 6 توننا الما جانە جەمىس-جيدەكتەر, 4 توننا ءسۇت ونىمدەرى جانە قىمىز-شۇبات, 2 توننا بال, 3 توننا كونديتەرلىك ونىمدەر, 6 توننا ەت جانە شۇجىق ونىمدەرى, 1 تونناعا جۋىق ۇلتتىق تاعامدار مەن 5 توننا ارال تۇزى بار. جالپى ەسەپتە جارمەڭكەگە قىزىلوردادان 70 ملن تەڭگەنىڭ 400 تونناعا جۋىق اۋىلشارۋاشىلىق ونىمدەرى اكەلىنەدى.
جارمەڭكە اياسىندا «ىرىستى, كۇرىشتى قىزىلوردا» اتتى وبلىس ونەرپازدارىنىڭ كونتسەرتى كورەرمەن نازارىنا ۇسىنىلادى. سونىمەن قاتار, سىر توپىراعىنان شىققان اتاقتى كۇرىششى, ەكى مارتە سوتسياليستىك ەڭبەك ەرى ى. جاقاەۆتىڭ125 جىلدىق مەرەيتويى ۇيىمداستىرىلىپ, «اق كۇرىشتىڭ اتاسى – ىبىراي» اتتى كورمە وتەدى.
شارا اياسىندا استانا قالالىق ورتالىق كىتاپحاناسىندا «سىرداريا كىتاپحاناسى» سەرياسىمەن جارىق كورگەن سىر بويى اقىن-جازۋشىلارىنىڭ شىعارمالارىنان جانە ءوڭىردىڭ الەۋمەتتىك-ەكونوميكالىق دامۋىن كورسەتەتىن كىتاپتاردان قۇرالعان «تۋى بيىك, تۇعىرى بەرىك سىر ەلى» اتتى كىتاپ كورمەسى, ەۋرازيا ۇلتتىق ۋنيۆەرسيتەتىندە «تاۋەلسىزدىك جىلدارىنداعى سىر ءوڭىرىنىڭ جەتكەن جەتىستىكتەرى» تاقىرىبىندا مەملەكەت جانە قوعام قايراتكەرلەرىنىڭ ستۋدەنتتەرمەن كەزدەسۋى, استانا بالالار اۋىلىندا «ءبارى دە بالا باقىتى ءۇشىن» اتتى قايىرىمدىلىق شاراسى, سونداي-اق, كونگرەسس-حولل فويەسىندە «تاۋەلسىزدىكتىڭ دارا جولىنداعى سىر ەلىنىڭ جەتىستىكتەرى» اتتى فوتو كورمەسى مەن «تاۋەلسىزدىكتىڭ سىرلى بوياۋلارى» تاقىرىبىندا وبلىس سۋرەتشىلەرىنىڭ كورمەسى ۇيىمداستىرىلادى.
ايتا كەتەيىك, ارزان باعاداعى جارمەڭكە ب.مومىش ۇلى داڭعىلىنداعى وقۋشىلار سارايىنىڭ الاڭىندا وتەدى.
تالعات رايىمبەك