بۇگىن باس پروكۋراتۋرادا قۇقىق قورعاۋ ورگاندارى اكادەمياسىنداعى قۇقىق قورعاۋ ورگاندارى باسشىلىعىنىڭ پرەزيدەنتتىك رەزەرۆىندە تۇرعان قىزمەتكەرلەر ءۇشىن ەكىنشى وقىتۋ كۋرستارىنىڭ اياقتالۋىنا ارنالعان سالتاناتى ءىس-شارا ءوتتى, دەپ حابارلادى باس پروكۋراتۋرانىڭ ءباسپاسوز قىزمەتى.
ءىس-شارانى اشقان باس پروكۋروردىڭ ءبىرىنشى ورىنباسارى يوگان مەركەل رەزەرۆتەگىلەردى بولاشاق جاۋاپتى باسشىلىق قىزمەتكە دايارلاۋدا وقۋ كۋرستارىنىڭ ماڭىزدى ەكەنىن اتاپ ءوتىپ, قاتىسۋشىلاردى ونىڭ ءساتتى اياقتالۋىمەن قۇتتىقتادى.
اكادەميا رەكتورى ۇلان بايجانوۆ ءوز سوزىندە وقۋ پروتسەسىنىڭ ەرەكشەلىكتەرى مەن قورىتىندىلارىنا توقتالىپ ءوتتى.
رەزەرۆتەگىلەردىڭ مارتەبەسى مەن دەڭگەيىن ەسكەرىپ, ءبىلىم بەرۋ ءۇردىسىنىڭ باسىم بولىگى ۇجىمدى قالىپتى جانە سىندارلى جاعدايدا ءتيىمدى باسقارۋ, ستراتەگيالىق جوسپارلاۋ, كوشباسشىلىق پەن باسشىنىڭ جەكە تيىمدىلىگى ماسەلەلەرىنە ارنالدى. تەرروريستىك اكتسيالار مەن جاپپاي نارازىلىق كەزىندە كەلىسسوزدەر جۇرگىزۋ تاكتيكاسىنا ايرىقشا كوڭىل ءبولىندى.
ەكىنشى وقۋ كۋرستارىنىڭ ءبىر ەرەكشەلىگى – ءار رەزەرۆيستى جەكەلەي وقىتۋعا باسا نازار اۋدارىلۋىندا, بۇل اسا تاجىريبەلى ساراپشىلاردىڭ قاتىسۋىمەن كاسىبي داعدىلاردى دامىتۋ جونىندەگى كەڭەستەر ازىرلەۋگە مۇمكىندىك بەردى.
كۋرستاردى جوعارعى دەڭگەيدە ءارى ساپالى ۇيىمداستىرۋ ءۇشىن ساباقتاردى ترەنينگ تۇرىندە 19 بەدەلدى عالىم جانە پراكتيك مامان, سونىڭ ىشىندە مەملەكەتتىك ورگانداردىڭ باسشىلىق قۇرامىنىڭ 5 وكىلى وتكىزدى.
شارانىڭ سوڭىندا رەزەرۆتەگىلەرگە سەرتيفيكاتتار مەن ءتوس بەلگىلەر بەرىلىپ, ەڭ ۇزدىك دەپ تانىلعان ساراپشىلار مەن تىڭداۋشىلار ماراپاتتالدى.
ايدار ورىسباەۆ