ەلىنە قايتپاۋ ءۇشىن پاسپورتىن جەپ قويدى
فرانتسيادا جۇرت كۇتپەگەن ءبىر وقيعا ورىن الدى – ءوز وتانىنا دەپورتاتسيا جاسالۋىنا كەلىسپەگەن گامبيالىق وپپوزيتسيونەر پوليتسەيلەردىڭ كوز الدىندا ءوز پاسپورتىنىڭ بىرنەشە پاراعىن جەپ قويدى.
وقيعا تۋلۋزا قالاسىندا ورىن العان. فرانتسۋز بيلىگى افريكانىڭ گامبيا مەملەكەتىنىڭ 34 جاستاعى بۋباكار ەسىمدى تۇرعىنىنا باسپانا بەرۋدەن باس تارتادى. مۇندا جاسىرىن جولمەن كەلگەن مۇعادجىر ءوز ەلىنە قايتارىلۋ ءۇشىن ۇشاققا اكەلىنگەننەن «بۇزىلا» باستايدى. ال بورتقا وتىرعىزىلار الدىندا قۇجاتىن كورسەتىپ جاتقاندا, ونى جالما-جان جىرتىپ, پاراقشالارىن اۋزىنا سالىپ جۇتۋعا كىرىسەدى. مۇنىمەن دە توقتاماي ءتارتىپ ساقشىلارىنىڭ بەتتەرىنە تۇكىرەدى. مۇنى كورگەن پيلوت ۇشۋ كەزىندە قاۋىپ توندىرەدى دەپ ەسەپتەپ, ونى الماي كەتىپتى.
جۇكتىلىگىنە 17 اي بولسا دا, بوسانار ەمەس
قىتايدىڭ حۋنان پروۆينتسياسىنىڭ تۇرعىنى جۇكتىلىگى مەرزىمىنىڭ ۇزاقتىعى جاعىنان گيننەستىڭ الەمدىك رەكوردتار كىتابىنا ەنەتىندەي ناتيجە كورسەتتى.
بۇقارالىق اقپارات قۇرالدارى قازىر ۆان شي اتتى ايەلدىڭ وتكەن جىلدىڭ اقپان ايىنان بەرى ەكىقابات ەكەنىن جازىپ جاتىر. دارىگەرلەر سول كەزدە بالا 15 قاراشا كۇنى تۋىلادى دەگەن بولجام جاساپ بەرگەن ەكەن. الايدا, سودان بەرى قانشا ۋاقىت وتسە دە, كەلىنشەكتىڭ بوسانار ءتۇرى جوق. سوندىقتان وعان كەلەسى ايدا وتا جاسالماقشى.
ارالار ادامدى اشتىق پەن اۋرۋدان ساقتاپ قالادى
عالىمدار قازىر تاپ وسىنداي قورىتىندىعا كەلىپ وتىر. ولار بال ارالارىنىڭ ادامدى اۋرۋدان قورعاپ, اشتىقتان ساقتاپ قالاتىنىنا سەنىمدى.
ماماندار ادامعا وتە كوپ پايداسى بار عاجايىپ زات – بال ەكەنىن العا تارتادى. ولار بالدىڭ ادام اعزاسىنا تيگىزەتىن پايداسىنىڭ ۇشان-تەڭىز ەكەنىن ايتادى. ونىڭ باستى پايداسى كەز كەلگەن ۆيرۋس پەن ميكروبقا قارسى بەلسەنە كۇرەسە الاتىنىنان كورىنەدى. بال سونداي-اق ادامزات بالاسىنا زياندى ميكروورگانيزمدەرمەن, ءدارى-دارمەكتەردىڭ زالالدارىمەن كۇرەسۋگە جاقسى كومەكتەسەدى.
جالاڭاش ترامپ...اقش-تىڭ 5 قالاسىندا تۇر
قۇراما شتاتتاردىڭ 5 قالاسىندا رەسپۋبليكاشىلار پارتياسى اتىنان اقش پرەزيدەنتتىگىنە ۇمىتكەر دونالد ترامپتىڭ جالاڭاش كەيىپتەگى ءمۇسىنى پايدا بولدى.
ميللياردەردىڭ ەسكەرتكىشىن Indecline انارحيستەر توبى جاساتقان كورىنەدى. ولار نيۋ-يورك, لوس-اندجەلەس, سان-فرانتسيسكو, كليۆلەند جانە سيەتل قالالارىنىڭ كورنەكتى جەرلەرىنە قويىلىپتى. «بىزگە ۇناي ما, ۇناماي ما, ماسەلە وندا ەمەس, ترامپ قازىردىڭ وزىندە الەم مادەنيەتىندەگى اتى اڭىزعا اينالعان تۇلعا. تاريحتا مۇنداي ادامداردىڭ كەسكىندەرى قاشاندا تاسپەن قاشالىپ, ماڭگىلىك تۇلعالار رەتىندە قۇرمەتتەلىپ وتىرعان», – دەپ سانايدى جوبانى جاساۋشىلاردىڭ ءبىرى.
كۇيەۋىن قايتارۋ ءۇشىن 17 ايلىق قىزىن قۇربان ەتتى
امەريكانىڭ وڭتۇستىك كارولينا شتاتىنىڭ پوليتسياسى 23 جاستاعى كيمبەرلي مارتينەستى ءوزىنىڭ ءبىر جارىم جاستاعى قىزىن ءولتىردى دەگەن ايىپپەن تۇتقىندادى.
ايەل وتكەن جەكسەنبى كۇنى قۇتقارۋ قىزمەتىنە تەلەفون شالىپ, 17 ايلىق قىزى پەيتوننىڭ بەزگەكپەن اۋىرىپ جاتقانىن جەتكىزەدى. تەكسەرە كەلگەندە, مارتينەستىڭ بالاعا زورلاپ تۇز جەگىزگەنى انىقتالادى. وسىدان قىزدا گيپەرناتريەميا پايدا بولعان. كەيىن ول جانساقتاۋ بولىمىندە ءجانتاسىلىم ەتەدى. كيمبەرليدىڭ ادۆوكاتىنىڭ ايتۋىنشا, كەلىنشەك كەتىپ قالعان كۇيەۋىن وسىنداي جولمەن قايتارىپ الماقشى بولىپتى. مۇنىڭ ورنىنا ول ەندى الداعى 20 جىلىن تۇرمەدە وتكىزۋى مۇمكىن.
ساۋدتاردىڭ ءداستۇرى ادام ومىرىنە قاۋىپتى
ساۋد ارابياسىندا ۇيلەنۋ تويلارى كەزىندە كوپتەن بەرى ءبىر مەزگىلدە بىرنەشە قارۋدان اسپانعا وق اتۋ اتتى مەرەكەلىك ءۇردىس بار. كەيدە مۇنىڭ سوڭى قايعىلى جاعدايلارعا دۋشار ەتىپ جاتادى.
سوڭعى جولى كورولدىكتىڭ تەرىستىگىندەگى تۋرايف قالاسىندا وتكەن ۇيلەنۋ تويىندا اتىلعان وقتىڭ ءبىرى جازاتايىم ءبىر ايەلگە ءتيىپ كەتىپ, قاتتى جاراقاتپەن اۋرۋحاناعا تۇسكەن. قازىر 40-تان اسقان ايەلدىڭ ءومىرى ءۇشىن دارىگەرلەر كۇرەسىپ جاتىر. وسىعان بايلانىستى پوليتسيا تويدىڭ وتۋىنە جاۋاپتى 4 ادامدى قاماۋعا الدى. قالادا بۇدان 4 كۇن بۇرىن سونداي جاعدايدا 20 جاسار قوناق تا قاتتى جارالانىپ قالعان ەكەن.
اقپارات اگەنتتىكتەرىنىڭ ماتەريالدارى بويىنشا دايىندالدى