«ەكسپو-2017» حالىقارالىق مامانداندىرىلعان كورمەسىنە تايلاند كورولدىگىنىڭ قاتىساتىندىعى تۋرالى كەلىسىمشارتقا قول قويىلدى. قۇجاتقا «استانا ەكسپو-2017» ۇلتتىق كومپانياسى» اكتسيونەرلىك قورىنىڭ باسقارما باسشىسى احمەتجان ەسىموۆ پەن تايلاند ەنەرگەتيكا مينيسترلىگىنىڭ تۇراقتى حاتشىسى – ۇلتتىق سەكتسيا كوميسسارى ارەەپونگ بحووچاووم قول قويدى.
باسقوسۋ بارىسىندا ا. ەسىموۆ «بولاشاق ەنەرگياسى» تاقىرىبىندا وتكىزىلەتىن كورمەنىڭ ۇيىمداستىرىلۋ جۇمىستارى تۋرالى كەڭىرەك ايتىپ بەردى.
«حالىقارالىق كورمەگە دايىندىق قارقىندى ءجۇرىپ جاتىر. ءتىپتى, بيىلدىڭ كۇزىندە قاتىسۋشى مەملەكەتتەرگە وزدەرىنىڭ ۇلتتىق پاۆيلوندارىن بەرەمىز, ونى سول كەزدەن باستاپ بەزەندىرىپ, دايىنداي بەرە الادى», – دەدى ءوز سوزىندە ۇلتتىق كومپانيا باسشىسى.
سونداي-اق ول كورمەنىڭ حالىقارالىق ىلگەرىلەتۋ ماسەلەسىن دە قوزعادى. بۇگىنگى تاڭدا 96 مەملەكەت قاتىساتىندىعىن راستاپ, 63-ءى قاتىسۋ كەلىسىمشارتىنا قول قويدى.
ءوز كەزەگىندە, تايلاند ۇلتتىق سەكتسياسىنىڭ كوميسسارى ا. بحووچاووم قازاقستاننىڭ تايلاند ءۇشىن ورتالىق ازياداعى ماڭىزدى ساۋدا-ەكونوميكالىق ارىپتەس ەكەنىن اتاپ ءوتتى.
«كورمەگە قاتىسۋ ءبىزدىڭ كورولدىك ءۇشىن وتە ماڭىزدى. بۇل شارا ءبىزدىڭ مەملەكەتتەر اراسىنداعى ەكىجاقتى قارىم-قاتىناستار ءۇشىن ەرەكشە قارقىن بەرەتىنىنە سەنىمدىمىز», ؘ– دەدى ا. بحووچاووم.
كەزدەسۋدە تايلاند وكىلدەرى وزدەرىنىڭ ۇلتتىق كۇندەرىن اتاپ ءوتۋ ءراسىمىن 2017 جىلدىڭ 12 تامىزىنا بەكىتۋدى سۇرادى. بۇل كۇنى تايلاندتا رام ءىح پاتشاسىنىڭ جۇبايى – مارتەبەلى سيريكيت پاتشايىمنىڭ تۋعان كۇنىنە قاتىستى سالتاناتتى شارا ۇيىمداستىرىلادى. وسى شارا اياسىندا تاي پاۆيلونى ەكسپو قاتىسۋشىلارىنا ارناپ مادەني, ويىن-ساۋىق ءىس-شارالارىن وتكىزبەكشى.
ايدار ورىسباەۆ