ريو-دە-جانەيرودا ءوتىپ جاتقان وليمپيالىق ويىنداردا قازاقستاندىق 38 جاستاعى پالۋان گۇزەل ءمانۇروۆا ايەلدەر كۇرەسىنىڭ 75 كيلوعا دەيىنگى سالماعىندا كۇمىس جۇلدەگەر اتاندى.
ول فينالدا كانادالىق ەريكە ۋيبەمەن بەلدەستى. كۇرەستە 27 جاستاعى قارسىلاسى 6:0 ەسەبىمەن باسىم ءتۇستى.
لوندون وليمپياداسىنان قولا مەدال العان جەرلەسىمىز ءوزىنىڭ ءبىرىنشى بەلدەسۋىندە ۆەنگەر جانەتت نەمەتتى 12:2 ەتىپ تىزە بۇكتىردى. سودان كەيىن 1/4 فينالدا كامەرۋننىڭ 31 جاستاعى وكىلى اننابەل ءاليدى 8:6 ەتىپ ۇتتى. ال جارتىلاي فينالدا 29 جاسار رەسەيلىك ەكاتەرينا بۋكينانى بەلدەسۋدىڭ ەكىنشى كەزەڭىندە تازا جەڭدى. ول ءبىرىنشى كەزەڭدە 8:1 ەتىپ ۇتتى. ەكىنشى كەزەڭدە قارسىلاسى 5 ۇپاي الدى. وسىلايشا 8:6-عا جەتتى. سوڭعى سەكۋندتاردا ءمانۇروۆا باسەكەلەسىنىڭ جاۋىرىنىن جەرگە تيگىزىپ, تازا ۇتىپ كەتتى.
دامير قوجامقۇل