بيىل وڭتۇستىك قازاقستان وبلىسىنان قىزىلجار اۋدانىنا 16 وتباسى قونىس اۋداردى. العا قويعان ارمان-ماقساتتارىنا ۇمتىلىپ, جاڭا جەردە وزگەشە ومىرگە بەيىمدەلە باستاعان اعايىندارىمىزعا مەملەكەت تاراپىنان كوتەرمەاقى جانە جالعا باسپانا بەرىلىپ, تۇپكىلىكتى ورنىعۋعا مۇمكىندىكتەر جاسالدى. سولاردىڭ ءبىرى – بەگاليەۆتەر اۋلەتى. ولار كەلە سالىسىمەن جەر تەلىمدەرىن الىپ, يگەرۋگە بىردەن كىرىسىپ كەتتى.
«ەڭبەك پەن باقىت – ەگىز» دەگەن قاعيداعا سۇيەنەتىن وتباسى مۇشەلەرىنە «كوشىپ كەلدىك, ەندى ءبىزدىڭ جاعدايىمىزدى جاساڭدار» دەپ قول قۋسىرىپ وتىرۋ مۇلدەم جات ەكەنىنە كورشى-قولاڭداردىڭ دا كوزدەرى انىق جەتىپ, شىن ءسۇيسىنىس ءبىلدىرىستى. جەرمەن جۇمىس ىستەۋدىڭ قىر-سىرلارىن ۇيرەنىپ, ۇلگى-ونەگە الۋعا تىرىستى. تاڭنىڭ اتىسىنان كۇننىڭ باتىسىنا دەيىن ەڭبەك ەتۋگە ابدەن داعدىلانعان بەگاليەۆتەر سوكولوۆ اۋىلىنان بوس جاتقان جەردى جالعا الىپ, ءتورت گەكتارىن ەگىستىككە ىڭعايلاپ وڭدەدى. كوكتەمدە وسى القاپقا ورامجاپىراقتىڭ جەتى ءتۇرىن, ودان باسقا قىزاناق, ءسابىز, قيار سىندى كوكونىستەر ەكتى. ءار ىسكە ۇلكەن جاۋاپكەرشىلىكپەن قاراعان وتاعاسى ەگەتىن داندەردىڭ بارلىعىن شەتەلدەن ارنايى تاپسىرىسپەن الدىرتتى. جەردى قوپسىتىپ, جاعالاي قاۋلاپ وسكەن ارامشوپتەردى وتاپ, كوكونىستەردى باپتاۋ شارالارىنا ءبىر كىسىدەي جۇمىلا كىرىستى.
– تەرىسكەيدىڭ جەرى وتە قۇنارلى ەكەن. سۋدى ەسىل وزەنىنەن الامىز. كەلەشەكتە ەگىستىك اۋماعىن ۇلعايتپاقشىمىز. اينالا قانداي اسەم. اۋاسى شە... كوكىرەك كەرە تىنىستايسىڭ. اق قايىڭدارعا قاراساڭ, كوڭىلىڭ تويادى. شارشاپ-شالدىعۋدى بىلمەيسىڭ, ءوزىڭدى سەرگەك سەزىنەسىڭ. ادامدارى دا, تابيعاتى دا جانعا جىلىلىق سىيلايتىن سولتۇستىككە كوشىپ كەلگەنىمە قۋانىشتىمىن, – دەيدى ءومىرالي بەگاليەۆ.
ءۇيدىڭ ۇلكەنى ءومىرالى اتا-اناسىن, ءىنىسى اقبارالىنى, قارىنداسى نافيسانى دا الىپ كەلگەن. قىزىلجار وڭىرىنە قونىس اۋدارعان ولارعا 912 مىڭ تەڭگە بىرجولعى كوتەرمەاقى بەرىلدى. باسپانامەن قامتاماسىز ەتىلدى. اۋلەتتىڭ نەگىزگى تابىس كوزى – باعباندىق. ماۋسىمنىڭ ورتاسىنان باستاپ 2,5 توننا قيار جيناپ, تابيعي تازا ءونىمدى وبلىس ورتالىعىنداعى «يۋجنىي» بازارى مەن كورشىلەس اۋىلدارداعى ازىق-ت ۇلىك دۇكەندەرىنە كوتەرمە باعامەن وتكىزگەن. ماۋسىمدىق جۇمىسقا جەرگىلىكتى 15 تۇرعىن تارتىلعان.
– ءبىز تۇقىم سەۋىپ, ارامشوپتەردى ج ۇلىپ, جەردى قوپسىتۋمەن اينالىسامىز. جاز بويى كوكونىستەرگە كۇتىم جاساپ, كۇزدە ولاردى جيناۋعا اتسالىسامىز. 30 مىڭ تەڭگە ەڭبەكاقى الامىز. قول قۋسىرىپ وتىرعاننان گورى ءناپاقا تاپقان الدەقايدا جاقسى عوي, – دەيدى سوكولوۆ اۋىلىنىڭ تۇرعىنى ۆالەنتينا كيلينا.
جەرمەن جۇمىس ىستەۋدە ءتاجىريبەسى مول اقبارالى ماۋسىمدىق ناۋقانداردىڭ ماشاقاتى كوپ ەكەنىن, ازىرگە تۇسكەن كىرىس اينالىم قاراجاتىن تولىقتىرۋعا جەتپەيتىنىن, سوندىقتان تومەن پايىزبەن نەسيە الۋدى ويلاستىرىپ وتىرعانىن, كەلەشەكتە سيىر ساتىپ الىپ, ءسۇت جانە ەت ءوندىرۋمەن اينالىسپاق ويلارى بارىن جەتكىزدى.
وسى جىلى قىزىلجار اۋدانىنا كوشىپ كەلگەن وتباسىلارعا 5 ميلليون 270 مىڭ تەڭگە كوتەرمەاقى بەرىلگەن. جىل سوڭىنا دەيىن اتالمىش اۋدانعا كوشىپ كەلۋشىلەر قاتارى تاعى ەكى ەڭبەكقور وتباسىمەن تولىقپاقشى.
الما قۋاندىققىزى,
جۋرناليست
سولتۇستىك قازاقستان وبلىسى,
قىزىلجار اۋدانى
سۋرەتتى تۇسىرگەن
امانگەلدى بەكمۇراتوۆ