جاقسىلىق جاعداي بولا قالسا, ازاعاڭ ءار ۋاقىت سۇيىنشىلەپ «ەگەمەننىڭ» الماتى بولىمشەسىنە تەلەفون سوعاتىن. قۋانىشىن ءبولىسىپ, بالاشا ءماز بولاتىن. ەلباسى حابارلاسىپ, ءحالىن سۇراعاندا: «شالدارشا شاپقىلاپ ءجۇرىپ جاتىرمىن», دەپ ايتتىم دەپ سونشالىقتى ءبىر رياسىز كوڭىلمەن اعىنان جارىلاتىن. جاقىندا عانا ازيادانىڭ قۇرمەتتى الاۋگەرى رەتىندە وسكەمەنگە بارىپ كەلگەن جولى: «نەسىن ايتاسىڭ, مىنا اعالارىڭ شال بولسا دا جەلە جورتىپ ءجۇگىرگەندە الاۋگەر جاستاردىڭ بارىنەن وزىپ كەتتى عوي», دەپ شاتتانعان بولاتىن. اعانىڭ كوڭىلى جاس ەدى, ومىرگە قۇشتار ەدى, جۇرەگى تۇنىپ تۇرعان ىزگىلىكتى ماحاببات ەدى.
ماحابباتتىڭ جىرشىسى. ىزگىلىكتىڭ جىرشىسى. ەرلىكتىڭ جىرشىسى. حالىققا مەيلىنشە كەڭ تاراعان, وقىرمانى ەڭ كوپ جازۋشى. ءبىر عانا «ماحاببات, قىزىق مول جىلدار» مەن «اقيقات پەن اڭىز» وسىعان انىق ايعاق. انا ءبىر جىلدارى تۋعان حالقىنا «قازاق ۇلتشىلدىعىن» تاڭعانى ءۇشىن باس حاتشى گورباچەۆقا نارازىلىق حاتىن جولداعان ۇلتجاندى قايراتكەر. ەكى اي بۇرىن عانا ەل پرەزيدەنتىنىڭ قولىنان «وتان» وردەنىن العان وتانشىل ابىز. ءوزى دە قازاق قىزدارى سايلاپ قويعان ماحاببات پرەزيدەنتى.
قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى ءازىلحان نۇرشايىقوۆتى اقىرعى ساپارعا اتتاندىرعان م.اۋەزوۆ اتىنداعى اكادەميالىق دراما تەاترى الدىندا بولعان قارالى جيىندا ايتىلعان سوزدەردىڭ وي تۇجىرىمى وسىعان سايدى. ادەبيەتىمىز بەن مادەنيەتىمىزدى اۋىر شىعىنعا ۇشىراتقان قازاعا بايلانىستى ەلباسىنىڭ كوڭىل ايتۋ جەدەلحاتىن كوپشىلىككە الماتى قالاسىنىڭ اكىمى احمەتجان ەسىموۆ جەتكىزدى. قارت قالامگەردىڭ ءومىر بويى ەلگە قىزمەت ەتكەن ونەگە-ۇلگىسىن ايتا كەلە, قازاقستان جازۋشىلار وداعى باسقارماسىنىڭ توراعاسى نۇرلان ورازالين كوڭىل ايتۋ جەدەلحاتتارىن جولداعاندار قاتارىندا پرەمەر-مينيستر ك.ءماسىموۆ, سەنات پەن ءماجىلىس توراعالارى ق.توقاەۆ پەن و.مۇحامەدجانوۆ, مەملەكەتتىك حاتشى – سىرتقى ىستەر ءمينيسترى ق.ساۋداباەۆ, اقيىق اقىن, يۋنەسكو-داعى قازاقستاننىڭ وكىلى و.ءسۇلەيمەنوۆ, مينيسترلەر م.قۇل-مۇحاممەد, ب.جۇماعۇلوۆ, ا.جۇماعاليەۆ ەسىمدەرىن, ماسكەۋدىڭ ءبىر توپ قالامگەرلەرىن اتاپ ءوتتى. الماتى, شىعىس قازاقستان جانە وڭتۇستىك قازاقستان وبلىستارىنان حالقى سۇيگەن, حالقىن سۇيگەن ەڭ حالىقشىل جازۋشىمىزبەن قوشتاسۋعا ارنايى دەلەگاتسيالار كەلىپتى.
قارالى جيىندا ءماجىلىس دەپۋتاتى ن.سابيليانوۆ, ادەبيەتىمىزدىڭ اقساقالى ت.كاكىش ۇلى, حالىق جازۋشىسى ت.مولداعاليەۆ, ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى, اكادەميك ع.مۇتانوۆ, جازۋشى س.دوسانوۆ ءسوز سويلەپ, ازاعاڭنىڭ مايدانداعى, جۋرناليستيكاداعى, جازۋشىلىق جولداعى جانە ءومىر تىرلىگىندەگى وشپەس ءىز قالدىرعان تاعىلىم-عيبراتتارىنا كەڭىنەن توقتالدى.
ازاعاڭ كەڭسايداعى ءوزىنىڭ ءسۇيىكتى جارى, ماڭگىلىك ماحابباتىنىڭ جىرىن مازداتقان حاليما اپايدىڭ قاسىنا قويىلىپ, ارۋاعىنا قۇران باعىشتالىپ, اس بەرىلدى.
قورعانبەك امانجول.