قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ كەشە جۇمىس بابىنداعى ساپارمەن اقمولا وبلىسىنا كەلدى.
ۇكىمەت باسشىسى الدىمەن «ستەپنوگور ەۋروپا پودشيپنيك كورپوراتسياسى» اق وندىرىستىك ۋچاسكەلەرىن ارالاپ, كاسىپورىننىڭ جاڭا باعىتتاعى جۇمىستارىمەن تانىستى. ودان كەيىن ستەپنوگور قالاسىنداعى №2 يندۋستريالىق-تەحنيكالىق كوللەدجىندە جاستارمەن كەزدەسۋ وتكىزىپ, دوڭگەلەك ۇستەل اۋقىمىندا ەركىن پىكىر ءوربىدى.
– مەنى مونوقالا مەن وعان ىرگەلەس اۋىلدار جاستارىنىڭ تىنىس-تىرشىلىگى قىزىقتىرادى, – دەدى كارىم قاجىمقان ۇلى. – سىزدەر ءۇشىن باستى ماسەلە ماماندىق الىپ, بەلسەندى ەڭبەككە ارالاسۋ بولىپ تابىلادى. مەملەكەت باسشىسىنىڭ تاپسىرماسىمەن جۇمىسشى ماماندىعىن الۋ اقىسىز نەگىزدە ءجۇرگىزىلەدى. ستەپنوگور قالاسىندا «قازاق التىن» جشس, ستەپنوگور ەۋروپا پودششيپنيك كورپوراتسياسىنا, تاۋ-كەن مەتاللۋرگيا زاۋىتىنا, تاۋ-كەن جابدىقتارى زاۋىتىنا 4 كوللەدج كادر دايارلايدى. بۇگىنگى كۇنى مۇندا 1186 ستۋدەنت دۋالدى وقۋ جۇيەسىنە تارتىلعان.
قولدانىلىپ جاتقان شارالار ءناتيجەسىندە اقمولا وبلىسىندا جاستاردىڭ جۇمىسسىزدىعى 2010 جىلعى 5,6 پايىزدان 2015 جىلى 3 پايىزعا تومەندەدى. بۇل رەسپۋبليكالىق دەڭگەيدەن جوعارى. ايتكەنمەن, اۋىل جاستارىنىڭ مەملەكەتتىك قولداۋ جونىندەگى اقپاراتقا قول جەتكىزۋى, ءتيىستى كەڭەستەر الۋى, بوس ۋاقىتتى ءتيىمدى پايدالانۋى باعىتىندا جۇمىستى شيراتا ءتۇسۋ قاجەت. وسى ورايدا جاستار رەسۋرستىق ورتالىقتارىنىڭ قىزمەت اۋقىمىن كەڭەيتۋ قاجەت.
كەزدەسۋدە اقمولا وبلىسى اكىمىنىڭ ورىنباسارى نۇرلان نۇركەنوۆ حابارلاما جاساسا, شورتاندى اۋداندىق «جاستار رەسۋرستىق ورتالىعىنىڭ» ديرەكتورى, اۋداندىق ءماسليحاتتىڭ دەپۋتاتى ەربولات جاپاروۆ, «ەپك-ستەپنوگور» اق باقىلاۋ-ولشەۋ قۇرالدارىنىڭ رەتتەۋشىسى ءلاززات شۇكىربايقىزى, ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ ستۋدەنتى مارعۇلان تۇرماشەۆ, №2 يندۋستريالىق-تەحنيكالىق كوللەدجىنىڭ وقۋشىسى اناستاسيا سەمەنچەنكو پرەمەر-مينيستر كوتەرگەن ماسەلەلەرگە قاتىستى ويلارىن ورتاعا سالدى.
پرەمەر-مينيستر ءۇيد باعدارلاماسىمەن جەمىستى جۇمىس اتقارىپ كەلە جاتقان «قازاقستاننىڭ جىلىجاي تەحنولوگياسى» جشس ونىمدەردى دايىنداۋ مەن ونى وتكىزۋ ىسىمەن تانىسقان سوڭ بۋراباي اۋدانىنا باعىت الدى.
اۋدان ورتالىعى ششۋچە قالاسىنداعى «ميراس» مەكتەپ-گيمنازياسىندا پەداگوگتەر قاۋىمىنىڭ قاتىسۋىمەن ءبىلىم سالاسىنداعى كوكەيكەستى ماسەلەلەردەن وزەك تارتقان كەڭەس وتكىزىلدى.
– ەلباسى ءبىلىم سالاسىنا ەرەكشە كوڭىل ءبولىپ كەلەدى, – دەدى ۇكىمەت باسشىسى كىرىسپە سوزىندە. – وسى باعىتتا كوپتەگەن جۇمىستار اتقارىلۋدا. مەن بۇگىن ەلىمىزدەگى ينتەرناتتاردىڭ جاعدايىمەن تانىسۋعا ارنايى كەلىپ وتىرمىن. ويتكەنى, اۋىل بالالارىنىڭ ءبىلىم ساپاسى كوبىنە وسىنداي مەكتەپتەرگە بايلانىستى.
بۇدان كەيىن اقمولا وبلىسى اكىمىنىڭ ورىنباسارى ن.نۇركەنوۆ پەن ءبىلىم جانە عىلىم ءمينيسترى ە.ساعاديەۆتىڭ كەڭەيتىلگەن حابارلامالارى تىڭدالدى.
پرەمەر-مينيستر قورىتىندى سوزىندە: «مەن رەسپۋبليكالىق مارتەبەسى بار مەكتەپ-ينتەرناتتا اۋىل بالالارىمەن بىرگە وقىدىم. (بۇل ماسەلە «ەگەمەن قازاقستان» گازەتىندە كوتەرىلگەن بولاتىن – ب.ا.) سوندىقتان دا بۇل ماسەلە ماعان جاقسى تانىس. وسىنداي مەكتەپتەردىڭ دامۋى ءبىز ءۇشىن وتە ماڭىزدى. بارلىق وقۋشىلاردىڭ 48 پايىزى – اۋىل مەكتەبىندە ءبىلىم الادى. سونىڭ ىشىندە, 55 مىڭعا جۋىق بالا مەكتەپ-ينتەرناتتاردا وقيدى. ولاردىڭ اراسىندا دارىندى بالالار كوپ. سوندىقتان, اۋىل مەكتەپتەرىنە, اۋىل بالالارىنا جاعداي جاساۋ ەلباسىنىڭ باستى نازارىندا. وسى جۇمىستاردى اتقارۋ ءۇشىن كەلەسى ماسەلەلەرگە كوڭىل ءبولۋىمىز كەرەك.
بىرىنشىدەن, ۇستازدىڭ بەدەلىن, ينتەرنات مۇعالىمدەرىنىڭ مارتەبەسىن كوتەرۋ – ءبىزدىڭ نەگىزگى مىندەتىمىز.
ەكىنشىدەن, بارلىق مەكتەپتەردە ينفراقۇرىلىمدى دامىتىپ, ينتەراكتيۆتى قۇرالدار مەن ينتەرنەتتىڭ بولۋىن قامتاماسىز ەتۋ قاجەت. بۇل ءۇشىن ءتيىستى قارجى بولىنۋدە. ءبىز بۇل جۇمىستى اۋىل مەكتەپتەرىنەن باستايمىز», – دەدى ۇكىمەت باسشىسى.
سونداي-اق, ول العاشقى ينتەراكتيۆتى قۇرالدى «ميراس» ۇجىمىنا سىيعا تارتتى.
ك.ءماسىموۆ جۇمىس كەستەسىنىڭ تىعىزدىعىنا قاراماستان «ەسىل-اگرو» جشس-ءنىڭ ەگىستىك القاپتارىن ارالاپ, سەرىكتەستىكتىڭ تاۋارلى-ءسۇت فەرماسىندا بولدى.
ۇكىمەت باسشىسى ساپارى بارىسىندا ەلىمىز ءۇشىن اسا ماڭىزدى ەكى ماسەلەنى قامتىعان كەڭەس وتكىزدى.
وسى ورايدا كارىم قاجىمقان ۇلى ەاەو ەلدەرىنىڭ ۇكىمەت باسشىلارىنا وداق ەلدەرىنىڭ ەت-ءسۇت ونىمدەرىنە تەحنيكالىق رەگلامەنتتەر دايىنداۋ ماسەلەسىن قاراۋ جونىندە رەسمي تۇردە ۇسىنىس جاريالاپ, اۋىل شارۋاشىلىعى ءمينيسترى اسقار مىرزاحمەتوۆكە سوعان سايكەس ۇندەۋ دايىنداۋدى تاپسىرعانىن اتاپ كورسەتتى. ول وتاندىق تاۋار ءوندىرۋشىلەردىڭ اۋىلشارۋاشىلىق ونىمدەرىن وتكىزۋدە ماڭىزدى ءرول اتقارماق.
«استانا اينالاسىنداعى ازىق-ت ۇلىك بەلدەۋىن دامىتۋ جانە اۋىل شارۋاشىلىعى ونىمدەرىن وتكىزۋ» تاقىرىبىنداعى ماجىلىسكە اۋدان اكىمدەرىنىڭ ورىنباسارلارى, وبلىستىق باسقارمالاردىڭ باسشىلارى مەن ءىرى تاۋار وندىرۋشىلەر قاتىستى. مۇندا اقمولا وبلىسى اكىمىنىڭ ورىنباسارى قادىرحان وتاروۆ بايانداما جاسادى.
استانا قالاسىنىڭ تۇرعىندارىن اۋىلشارۋاشىلىق ونىمدەرىمەن تۇراقتى قامتاماسىز ەتۋ ماقساتىندا وبلىستىڭ 17 اۋدانى بەلسەندى جۇمىس اتقارۋدا. بۇل ىسپەن 128 كاسىپورىن اينالىسادى. ونىمدەر 28 بازاردا, 29 ساۋدا ءۇيى مەن 10 ساۋدا ورتالىعىندا ۇزدىكسىز ساتىلۋدا. ال, ەلوردا جارمەڭكەسىندەگى باعا 15-20 پايىزعا تومەن. ۇستىمىزدەگى جىلدىڭ بەس ايىندا استانالىقتاردىڭ داستارقانىنا 5,6 مىڭ توننا ەت جانە ەت ونىمدەرى, 74,9 ميلليون دانا جۇمىرتقا جەتكىزىلدى. بۇل كورسەتكىشتەر وتكەن جىلدىڭ سايكەس مەرزىمىمەن سالىستىرعاندا اناعۇرلىم كوپ. بيىلعى جىل باسىندا استانا قالاسى مەن اقمولا وبلىسىنىڭ اكىمدىكتەرى اراسىندا ازىق-ت ۇلىك قاۋىپسىزدىگىن قامتاماسىز ەتۋ جونىندەگى مەموراندۋمعا قول قويىلۋى ماقساتتى جۇمىستىڭ باياندىلىعىن ايقىندايدى.
بۇل باعىتتاعى جۇيەلى جۇمىس جەمىسسىز دە ەمەس. مال باسى بارلىق ت ۇلىك بويىنشا ءوسىپ, اسىلداندىرۋ ىسىنە ايرىقشا كوڭىل بولىنۋدە. مەملەكەتتىك رەگيستر دەرەكتەرى بويىنشا اسىل تۇقىمدى ءىرى قارانىڭ سانى 64,3 مىڭ باسقا جەتىپ وتىر. بۇل ىسپەن 30 شارۋاشىلىق تۇراقتى اينالىسۋدا. وسى رەتتە, 2010-2015 جىلدارى اتالعان شارۋاشىلىقتارعا شەتەلدىك 14 مىڭ باس مال جەتكىزىلىپ, رەسپۋبليكالىق كورسەتكىشتىڭ ۇشتەن ءبىرىن قۇراعانىن ايتۋعا بولادى. استانالىق وبلىستىڭ ەكسپورتتىق الەۋەتىنىڭ ارتۋىن وسى جاعدايلارمەن دە بايلانىستىرعان ءجون.
ۇكىمەت باسشىسى, سونداي-اق, بۋرابايدا ششۋچە-بۋراباي كۋرورتتى ايماعىن دامىتۋ ماسەلەسى جونىندە كەڭەس وتكىزىپ, وندا وبلىس اكىمى س.كۋلاگين باستاعان قۇزىرلى ورگاندار وكىلدەرىنىڭ كۇن تارتىبىندە قارالعان ماسەلەگە قاتىستى ەسەپتەرى تىڭدالدى.
بۇگىندە مۇندا كۋرورتتى ايماقتى دامىتۋدىڭ ءبىرىنشى جانە ەكىنشى كەزەڭدەرىنىڭ جۇمىستارى اتقارىلۋدا. سونىمەن بىرگە, وبلىسقا وسى تۇرعىدا 25 ءىس-شارانى جۇزەگە اسىرۋ تاپسىرىلعان بولاتىن. ولاردىڭ جەتەۋى كەلەر جىلى استانادا وتەتىن ەكسپو كورمەسىنە قاتىستى. قازىرگى كەزدە اتالعان ءىس-شارالاردىڭ دا بىرنەشەۋى جۇزەگە اسىرىلۋدا.
– ششۋچە-بۋراباي كۋرورتتى ايماعىن دامىتۋ ەلباسىنىڭ تۇراقتى نازارىندا. سوندىقتان پرەزيدەنت تاپسىرمالارى تياناقتى ورىندالۋى ءتيىس, – دەپ اتاپ ءوتتى ك.ءماسىموۆ كەڭەستى قورىتىندىلاي كەلە.
باقبەرگەن امالبەك,
«ەگەمەن قازاقستان»