جۋىردا وبلىسىمىزعا كەڭىنەن تانىمال, سەكسەن جاستاعى ارداگەر ءفوتوتىلشى ۆلاديسلاۆ حولين بالاشا قۋانىپ, قولىما مىنا سۋرەتتى ۇستاتىپ ەدى. مۇنى ارىپتەسىمىز بۋرابايدان ەمەس, ساندىقتاۋدىڭ قالىڭ ورماندارىنان ءتۇسىرىپتى. ولكەتانۋشىلاردىڭ ايتۋىنشا, بۇل اعاشتىڭ جاسى 400 جىلعا, بيىكتىگى 40 مەترگە, ەنى 2,5 مەترگە جۋىقتايدى.
ماسەلە مۇندا دا ەمەس. ماسەلە, 400 جىل بويى جۇبىن جازباي تۇرعان ەگىز قاراعاي ءومىر جايلى تاعلىمدى عاقلياسىندا بولسا كەرەك.
ومىرگە قۇشتارلىقتىڭ ونەگەسىن اعاشتار كورسەتەتىندەي. بۇعان ءبىزدىڭ ءولكەدە مىسال كوپ. بۋرابايداعى وقجەتپەستىڭ شىنارىنداعى تاستى جارىپ شىققان قاراعايلار قايراتتىلىقتىڭ قۋات قاينارىنداي جانىڭىزدى ءسىلكىنىسكە ءتۇسىرەدى. ال, مىڭ بۇرالعان بيشى قايىڭدار نازىكتىك پەن سۇلۋلىقتىڭ سيمۆولىنداي كەۋدەڭىزگە قۋانىش قۇيادى. قاراپ تۇرساڭىز, مۇنداي سۋرەتتەر كوز الدىڭىزدا عاجايىپ تۇرگە ەنىپ, كوڭىلدى كوككە ورلەتەدى دە تۇرادى.
باقبەرگەن امالبەك,
«ەگەمەن قازاقستان»
اقمولا وبلىسى