وليمپيادانىڭ باستالۋىنا 1 كۇن قالدى
الەم كوز تىككەن الامان
ەرتەڭ ريو-دە-جانەيروداعى XXXI جازعى وليمپيالىق ويىندار تاريحتىڭ تورىنە شىعادى. وسىناۋ وردالى قالاداعى اتاقتى الىپ ستاديون – «ماراكانادا» ايتۋلى جارىستىڭ جالاۋى جەلبىرەپ, الاۋى تۇتانادى. سالتاناتتى ءسات استانا ۋاقىتىمەن سەنبى, 6 تامىزعا قاراعان ءتۇنى ساعات 04:00-دە باستالادى.
ون التى كۇننىڭ ورىمىندەگى جان الىپ, جان بەرىسەتىن سايىستا قازاق سپورتشىلارىنىڭ الاتىن ءوز ەنشىسى مەن سىباعاسى تۇر. ءبىز سول جۇلدەلەر جۇلگەسىندە سويى تۇگەل سوم التىننان قۇيىلعان مەدالدىڭ كوپ بولۋىن قالاپ وتىرمىز. مۇنىمىز جانە بەكەردەن-بەكەر تىلەگەن ءپارۋايى قالاۋ ەمەس. ءبىزدىڭ ساڭلاقتاردىڭ ءۇي مەن تۇزدە ءجۇرىپ, وزدەرىنە ۇزدىكسىز كوز قاداپ وتىرعان جانكۇيەرلەرىنىڭ سول ۇمىتتەرىن اقتاپ شىعۋعا تولىق مۇمكىندىگى بار.
سونىمەن, ءتورت جىلدىق تسيكلدىڭ باستالاتىن شاعىنا تاۋلىكتەن ءسال عانا اساتىن ۋاقىت قالدى. ءدۇبىر تىم جاقىن. وسىعان وراي «ەگەمەن قازاقستاننىڭ» وسىناۋ باسىرەلى باسەكەگە اتتاندىرعان ارناۋلى ءتىلشىسى باقتيار تايجان دا ىسكە بەكەم كىرىستى. ءبىز بۇگىن ونىڭ برازيليا جەرىنەن جولداعان العاشقى جولجازباسىنا دا كەزەك بەرىپ وتىرمىز. وسىنىڭ ءوزى سپورتتىڭ ۇلان تويى باستالىپ قالعانىن كورسەتەدى.
سان ەمەس, ساپا كەرەك
قىزعالداقتار مەكەنى سانالاتىن گوللانديا ارقىلى برازيلياعا كەلىپ جەتتىك. بىزبەن بىرگە گرەك-ريم, دزيۋدو شەبەرلەرى مەن اۋىر اتلەتتەر ۇشىپ كەلدى. قازاقتىڭ باس بالۋانى نۇرمۇحان تىناليەۆتىڭ كوڭىل-كۇيى جاقسى سياقتى. «جاۋاپكەرشىلىكتى سەزىنەمىز. بىراق, الدىن الا ءبارىن كەسىپ-ءپىشىپ ايتۋعا بولمايدى. جەڭىلۋ ءۇشىن ەمەس, جەڭۋ ءۇشىن كەلدىك. اللانىڭ باسقا سالعانىن كورەمىز», دەيدى سايىپقىران. قازاقستان قۇراماسىنىڭ اعا جاتتىقتىرۋشىسى, الەم چەمپيونى باقتيار بايسەيىتوۆ تە جىگىتتەرگە سەنىمدى. «بارلىق وقۋ-جاتتىعۋ جيىندارىن تىڭعىلىقتى وتكىزدىك. راس, ءبىز ريوعا ءۇش بالۋان عانا اكەلدىك, بىراق ۇشەۋى دە الەمدىك ساناتتاعى مىقتى سپورتشىلار. جەرەبە جولداس بولسا, ۇشەۋى دە جۇلدەگە يە بولادى», دەيدى. قازاقستاننىڭ گرەك-ريم كۇرەسىنەن باس جاتتىقتىرۋشىسى تاڭات ساعىندىقوۆ تا سان ەمەس, ساپاعا جۇمىس جاساعاندارىن ايتىپ قالدى.
قازاق جاستارىنان العاش رەت سامبودان الەم چەمپيونى بولعان قانات بايشولاقوۆتىڭ تۋعان ءىنىسى تالعات بايشولاقوۆ – ماكسيم راكوۆتىڭ باپكەرى. ماكسيمنىڭ ءوز سالماعىنداعى بارلىق بالۋانداردى ءارتۇرلى جارىستاردا جەڭگەنىن داتكە قۋات ەتىپ ول وتىر. ارينە, سوڭعى جىلدارى قازاقستان قۇراماسى سەركەسىنىڭ اناۋ ايتقانداي جولى بولمادى. استانادا وتكەن الەم چەمپيوناتىندا ماكسيمنىڭ كوڭىلى قاتتى قۇلازىعانىن بايقاعانبىز. قولىنان كەلگەنىن ايانعان جوق, بىراق كۇرەسى ماندىمادى. ۇنەمى بابىندا بولۋ مۇمكىن ەمەس, ايتپەسە وسى ماكسيم گۋانجوۋدا وتكەن ازيا ويىندارىندا موڭعول حالقىنا عانا ەمەس, دۇنيە جۇزىنە ايگىلى بالۋان نايداننىڭ شاڭىن تۋلاقتاي قاعىپ العانىن ءوزىمىز دە كورگەنبىز. سول نايدانعا بۇيىرعان باق سارى التىنداي باۋىرىمىزعا دا بۇيىرسا ەكەن دەگەن تىلەك ۇستىندەمىز.
– وليمپيالىق ويىندارعا وسال بالۋان بارمايدى, – دەيدى تاڭات ساعىندىقوۆ. – ءبارى ءبىر-بىرىمەن قارايلاس, ءبىر-ءبىرىنىڭ مىقتى, وسال تۇستارىن وسىعان دەيىن زەرتتەپ, قارسى ايلاعا دايىندالىپ كەلدى. قاي-قايسىنىڭ دا چەمپيون بولۋعا جاعدايلارى جەتەدى. ولاردىڭ قاتارىندا ءبىزدىڭ بالۋاندار دا بار. باق پەن باپ قاتار شاپسا, ءبارى دە مۇمكىن.
باس جاتتىقتىرۋشى ۋاجىنە قوسىپ-الارىمىز جوق. سان-پاۋلۋدا الەكسەي ني باستاعان اۋىر اتلەتتەر ريوعا بولەك رەيسپەن ۇشىپ كەتتى. لوندوندا قازاق ءانۇرانىن حيتكە اينالدىرعان باپكەردە باياعى جايراڭداعان كوڭىل-كۇي جوق. سوندىقتان, مازالامادىق. بىراق, قازاقستان اۋىر اتلەتتەرى تاعدىر سىناعىنا قوس قولىن كوتەرىپ بەرىلدى دەگەندى استە ايتۋعا بولمايدى. رەسەي قۇراماسىنىڭ جارىس جولىنان الىنعانى وزگەلەر سەكىلدى, قازاقستان قۇراماسىنا دا جاقسى مۇمكىندىكتەر سىيلايتىنىن ءىشى قۇرعىر سەزەدى. جىگىتتەردى ايتپاعاننىڭ وزىندە, جازيرا جاپپارقۇلدىڭ چەمپيوندار اۋىلىنا ات ويناتىپ كىرۋىنە تولىق مۇمكىندىگى بار. لايىم سولاي بولعاي.
ال گرەك-ريم جانە دزيۋدوشىلار بىزبەن بىرگە سان-پاۋلۋعا ۇشىپ كەلدى. گەورگي تسۋرتسۋميا مەن نۇرماحان تىناليەۆتىڭ ورىندىقتارى قاتار ءتۇسىپ قالعان ەكەن, ەكەۋى دە الىپ اتانعا جۇك بولاتىنداي اتپال ازاماتتار. بىرەۋىنە ءبىر ورىندىقتىڭ ءوزى ازدىق ەتەدى. ءبىر ك ۇلىپ العان ەكەۋى باسقالارىمەن ورىن اۋىسىپ وتىردى.
سام جامىراعان شاقتا سان-پاۋلۋدان ريو-دە-جانەيروعا ۇشتىق. «اسسالاۋماعالەيكۇم, برازيليانى» وسى جەردە ايتتىق. قازاقستان – ارمان-ماقساتى ءۇلكەن ەل, الەۋەتى مىقتى مەملەكەت. سپورت ويىندارىنىڭ پاديشاسى وليمپيالىق ويىنداردان اۋەلدەن اۋزىنىڭ سالىمى جاقسى بولاتىن. اتاقتى پەلەنىڭ قۇت مەكەنى قازاقستان حالقىنا سىيلار قۋانىشى كوپ بولعاي. جاراتقاننان برازيليا توپىراعىن باسقاندا وسىنى تىلەدىك.
اسپاننان شۇعا ەمەس, التىن جاۋسا...
برازيليانىڭ ەكى ءتۇنى ارتتا قالدى. اۋا رايى قوڭىر سالقىن. مۇندا جىلدىڭ بۇل مەزگىلى قىسقا سانالادى ەكەن. كۇندىز قويۋ بۇلت تۇتقان. حالىقارالىق وليمپيادا كوميتەتىنىڭ باعدارلاماسى بويىنشا جۇمىس جاساپ جاتقان رۋسلان مەدەلبەك: «اعا, مەن كەلگەلى ون ءبىر كۇن بولدى. وسىلاي ءتۇيىلىپ تۇرادى. بىراق, جاۋمايدى», – دەگەن ەدى. كەشە برازيليا اسپانى رۋسلاننىڭ ءسوزىن تەرىسكە شىعارىپ, اعىل-تەگىل اقتارىلدى.
وسى كۇنى ءباسپاسوز ورتالىعىندا بولدىق. راسىن ايتساق, سپورتتىڭ دۇنيەجۇزىلىك الامانىنا الەم كوز تىگىپ وتىرسا دا, ريو-دە-جانەيرو ونشالىقتى اسىقپايتىن سياقتى. جۋرناليستەر اۋىلىندا دا, ءباسپاسوز ورتالىعىندا دا ءالى ءجوندەۋ جۇمىستارى ءجۇرىپ جاتىر. بايقاعانىمىز, كۇزەت كۇشتى. اۆتومات ۇستاعان اسكەريلەردىڭ قولى شۇرىپپەدەن بوسامايتىنداي كورىنەدى. اتتى ساربازدار دا كوپ. وليمپيادا الاۋىن الىپ قاشۋ, ءتىپتى, ءسوندىرۋ ارەكەتى بولعان سوڭ ۋاقىتشا ۇكىمەت ساقتىق شارالارىن كۇشەيتكەن سىڭايى بار.
وليمپياداشىلار قالاشىعىندا بولدىق. دۇنيە ءجۇزىنىڭ بارلىق مىقتى سپورتشىلارى جينالعان قالاشىقتا قازاقستان بايراعى كوزگە ەرەكشە ىستىق كورىنەدى. برازيليا – بايلىعىمەن ماقتانا المايتىن ەل. مۇندا دا ىسىراپشىلىقتى بايقاي المايسىز. قالاشىقتاعى كوز تارتار دۇنيەلەردىڭ ىشىنەن دوڭگەلەك ورىندىقتار كوزگە ەرەكشە تۇسەدى. باجايلاپ قاراساڭىز, كادىمگى جانارماي قۇيىلاتىن بوشكەلەردى ورتاسىنان قاق ءبولىپ, ءۇستىن شارباق اعاشپەن قاپتاعان. سىرت كوزگە ادەيى وسىلاي جاساعانداي كورىنگەنىمەن, قالتانىڭ جۇتاڭدىعى بىلىنەدى.
شىركىن, ءبىزدىڭ قازاقستان ەكەن عوي, حالىقارالىق جارىس وتكىزسە, ايدى اسپاننان ءبىر-اق شىعارىپ, استا-توك ەتىپ تاستايتىن. قىسقى ازيا ويىندارىندا مولشىلىقتىڭ كوكەسىن كورسەتكەنى ەستەن كەتپەيدى. مۇندا ءبارى قاراپايىم. بىراق وعان قاراپ جاتقان سپورتشىلار دا, جۋرناليستەر دە جوق. ءبارى ءماز-مەيرام.
بوكستان باس جاتتىقتىرۋشى مىرزاعالي ايتجانوۆتى كوردىك. بەرى شىعا الماعانىمەن, قازاقى جىگىت قولىن كەۋدەسىنە قويىپ, بارىمەن امانداسىپ جاتىر. ون ەكى قابات تۇتاس ءبىر ءۇيدى قىتاي مەملەكەتى جالعىز يەمدەنىپ, جاعالاي تۋىن ءىلىپ تاستاپتى.
وليمپيادا قالاشىعىنان ۇلتتىق وليمپيادا كوميتەتى پرەزيدەنتىنىڭ ورىنباسارى سەرىك قاسقاباسوۆ, مادەنيەت جانە سپورت ءمينيسترىنىڭ ورىنباسارى ساكەن مۇسابەكوۆ جانە سپورت كوميتەتىنىڭ توراعاسى ەلسيار قاناعاتوۆ شىعىپ, ءبىراز جايتقا قۇلاعدار ەتتى. كۇندە جيىن, باس جاتتىقتىرۋشىلاردىڭ مىندەتى, سپورتشىلاردىڭ دايىندىعى پىسىقتالىپ جاتىر. قۇراماداعى 104 سپورتشىعا 11 ادامنان قۇرالعان دارىگەرلەر مەن پسيحولوگ, ماسساجيستەر قىزمەت ەتۋدە.
ەلسيار قاناعاتوۆ – سپورتتىڭ مايىن ىشكەن ادام, ءبارىن بەس ساۋساقتاي بىلەدى. وسى وليمپيادادان قانشا التىن مەدال الاتىنىمىزدى بىلگىمىز كەلەدى.
– ونى باقتيار تايجان بىلەدى, – دەپ كۇلەدى ول. – ءبىز بىلگەندى سەندەر دە بىلەسىڭدەر عوي. تالداۋ جاساپ جۇرەسىڭدەر. بارلىق سپورتشىلاردىڭ مۇمكىندىكتەرى بەلگىلى. ءبىز دە شامالاعانىمىزبەن, ءبارى ءبىر اللانىڭ قولىندا.
جازۋشى سەيداحمەت بەردىقۇلوۆتىڭ «اسپاننان شۇعا جاۋعان كۇن» دەپ اتالاتىن شىعارماسى بار ەدى. بىزگە سالسا, شۇعا ەمەس, التىن جاۋدىرىپ قويار ەدىك, شىركىن...
ازىرگە ريودا جاڭبىر جاۋىپ تۇر.
قازى مەن قىمىز – قۋات قاينارى
وليمپياداشىلار قالاشىعىندا بوكسشى بەرىك ابدىراحمانوۆپەن جۇزدەستىك. قۇراما تاڭەرتەڭگىلىك جەڭىل جاتتىعۋ جاساپ, اس ىشكەننەن كەيىن ساعات 11-دە جاتتىعۋعا بارادى ەكەن. تۇستەن كەيىن تاعى دا جاتتىعۋ قايتالانادى. بوكس زالى قوزىقايىرىم جەردە. كەيبىر مەملەكەتتەردىڭ سپورتشىلارى ريوداعى تاعام ساپاسىنا رازى ەمەس. ءبىزدىڭ قازاق قاناعاتشىل عوي. شاعىم جوق. بوكسشىلار وزدەرىمەن بىرگە قازى-قارتا, قىمىز, قىمىران اكەلىپتى. ارينە, ولار ەت جەپ, قىمىز ىشۋگە كەلگەن جوق, بىراق حالقىمىزدىڭ ۇلتتىق تاعامى كۇش بەرەدى, ناعىز قورەك. جاتىن جايلارى دا جاقسى. ءبىر بولمەدە ەكى ادام جاتادى. ەكى الىپ – ۆاسيلي لەۆيت پەن يۆان دىچكوعا عانا جەكە بولمە ءتيىپتى.
– ءبارى ءبىر اللانىڭ قولىندا, – دەيدى بەرىك ءابدىراحمانوۆ. – ءوزىمىز ءۇشىن دە, مەملەكەتىمىز ءۇشىن دە بارىمىزدى سالامىز. حالقىمىزدىڭ مەرەيى تاسىعانى – ءبىز ءۇشىن ۇلكەن مارتەبە.
وليمپيادا قالاشىعىنان سوڭ قازاقستاننىڭ وسىنداعى اشىلعان ءباسپاسوز ورتالىعىنا باردىق. بۇرىن برازيليادا قازاقستاننىڭ توتەنشە جانە وكىلەتتى ەلشىسى بولعان باقىتجان ورداباەۆ دەلەگاتسيامىزدىڭ كەڭەسشىسى قىزمەتىنە كىرىسىپتى. ۇوك جاۋاپتى قىزمەتكەرى جىگەر ازبەرگەن ەكەۋى سوڭعى ازىرلىك جۇمىستارىن تياناقتاپ جاتىر. ءباسپاسوز ورتالىعىندا جەڭىمپاز جانە ءجۇلدەگەر سپورتشىلارمەن كەزدەسۋ وتكىزىلەدى. قالىڭ قازاقتان قۇس جولىمەن ءسۇيىنشى سۇرايتىن جەر وسى. ورتالىقتىڭ ءبىر بۇرىشىنان «قازاقستان – قازسپورت» ءمۇيىسى اشىلدى. قازاق سپورتىنىڭ بار جاقسىلىقتارىن ناسيحاتتايتىن جاڭا ارنامىز وسى جەردەن تىكەلەي حابار جۇرگىزەدى.
ەرتەڭ وليمپيادا قالاشىعىندا قازاقستاننىڭ تۋى كوتەرىلۋ ءراسىمى وتەدى.
«ەگەمەن قازاقستاننىڭ» ارناۋلى ءتىلشىسى
باقتيار تايجان,
ريو-دە-جانەيرودان حابارلايدى
كوگىلدىر ەكرانعا نازار سالىڭىزدار
بۇدان بۇرىن حابارلانعانىنداي, ريو-دە-جانەيروداعى XXXI جازعى وليمپيالىق ويىنداردى «حابار», «قازاقستان» جانە «KazSport» تەلەارنالارى كورسەتەتىن بولادى. سونىڭ ىشىندە «حابار» مەن «قازاقستان» وزدەرىنىڭ ءبىرىنشى ترانسلياتسياسىن 6 تامىزعا قاراعان ءتۇنى باستايدى. ەفير ساعات 03:55-تە اشىلادى.
تومەندە ءبىز جارىستىڭ العاشقى 3 كۇنى ىشىندە رەسپۋبليكا تەلەارنالارى جۇرگىزەتىن حابارلار كەستەسىن جاريالاپ وتىرمىز. ال تولىق كەستەمەن سىزدەر «ەگەمەن قازاقستاننىڭ» ينتەرنەت-نۇسقاسىنا (egemen.kz) 2 تامىز كۇنى جاريالانعان «وليمپيالىق ويىندار كورسەتىلىمى» دەپ اتالاتىن حابار ارقىلى تانىسا الاسىزدار. ول سايتتىڭ «سپورت» بلوگى اياسىنان ورىن العان.
6 تامىز
03.55 – ريو-دە-جانەيروداعى XXXI جازعى وليمپيالىق ويىنداردىڭ اشىلۋ سالتاناتى. تىكەلەي ەفير («حابار», «قازاقستان»)
17.25 – ۆەلوسپورت. ەرلەر. فينال. تىكەلەي ەفير («حابار»)
18.55 – بوكس. تىكەلەي ەفير («قازاقستان»)
23.25 – دزيۋدو. فينال. تىكەلەي ەفير («قازاقستان»)
20.55 – ءجۇزۋ. تىكەلەي ەفير (KazSport)
23.25 – مىلتىق اتۋ (پنەۆماتيكالىق تاپانشا). فينال. تىكەلەي ەفير (KazSport)
7 تامىز
00.55 – بوكس. ەرلەر. تىكەلەي ەفير («حابار»)
02.55 – اۋىر اتلەتيكا. ايەلدەر. فينال. تىكەلەي ەفير («قازاقستان»)
04.50 – اكادەميالىق ەسۋ. ىرىكتەۋ (KazSport)
05.55 – ءجۇزۋ. ەرلەر 100 مەتر. براسس. جارتىلاي فينال. تىكەلەي ەفير («قازاقستان»)
06.20 – ۆولەيبول. ايەلدەر. سەربيا - يتاليا. تىكەلەي ەفير (KazSport)
09.35 – ۇستەل تەننيسى. ەرلەر. (KazSport)
10.55 – تەننيس. جەكەلەي جارىس (KazSport)
13.25 – دزيۋدو. فينال (KazSport)
15.25 – اۋىر اتلەتيكا. ايەلدەر. فينال. جازبا («حابار»)
17.50 – دزيۋدو. ەرلەر. تىكەلەي ەفير (KazSport)
18.55 – بوكس. ەرلەر. ىرىكتەۋ راۋندى. تىكەلەي ەفير («قازاقستان»)
20.55 – ءجۇزۋ. ىرىكتەۋ راۋندى. تىكەلەي ەفير (KazSport)
23.40 – ۆولەيبول. ەرلەر. فرانتسيا-يتاليا. جازبا (KazSport)
8 تامىز
00.55 – بوكس. ەرلەر. تىكەلەي ەفير («حابار»)
02.55 – اۋىر اتلەتيكا. ەرلەر. تىكەلەي ەفير («قازاقستان»)
01.45 – اكادەميالىق ەسۋ (جەكەلەي). (KazSport)
02.50 – باسكەتبول. ەرلەر. حورۆاتيا - يسپانيا. تىكەلەي ەفير (KazSport)
بۇدان بولەك, اتالعان تەلەارنالاردىڭ كۇندىزگى ەفيرلەرىندە «وليمپيادا كۇندەلىگى» بەرىلىپ تۇرادى.
ۇشاق سۇيرەپ, ۇران تاستادى
قازىرگى تاڭدا بۇكىل ەل بولىپ ريو-2016 وليمپياداسىنا اتتانعان سپورتشىلارىمىزدىڭ تىلەۋىن تىلەپ وتىرمىز. بىرەۋ سوزبەن, بىرەۋ ىسپەن, ايتەۋىر قولداۋدان ايانىپ جاتقان جوقپىز. «بالاسى اتقا شاپسا, اناسى ۇيدە وتىرىپ تاقىمىن قىسادى» دەگەن وسى عوي!
بۇل ۇردىستەن قاراعاندىلىقتار دا قالىس قالمادى. جەرگىلىكتى پوليتسيا قىزمەتىنە قاراستى جول-پاترۋلدىك پوليتسياسى پولكىنىڭ باسشىلىعى وبلىستىق مما, بوكس جانە اۋىر اتلەتيكا فەدەراتسيالارىمەن تىزە قوسىپ, برازيلياداعى ءدۇبىرلى دوداعا اتتانعان سپورتشىلارىمىزدى قولداۋ ماقساتىندا ەلدە جوق فلەشموب ۇيىمداستىردى.
ءاۋ باستا ۇيىمداستىرۋشىلار سپورتشىلارعا 50 توننالىق تۋ-154 ۇشاعىن سۇيرەتپەك بولعان. الايدا, شاراعا قاتىسۋشىلاردى اياعان بولۋ كەرەك, اۋىردىڭ ورنىن جەڭىلدەۋىمەن – 15 توننالىق ان-26 ۇشاعىمەن الماستىردى...
سودان نە كەرەك, لوندون-2012 وليمپياداسىنىڭ چەمپيونى سەرىك ساپيەۆ, افينا-2004 وليمپياداسىنىڭ قولا ءجۇلدەگەرلەرى: جەڭىل اتلەت دميتري كارپوۆ پەن بوكسشى سەرىك ەلەۋوۆ سىندى ساڭلاقتار باستاعان سپورتشىلار الگى ۇشاقتى تۋرا يليا رەپيننىڭ «ۆولگاداعى بۋرلاكتار» كارتيناسىنداعىداي ءبارى جابىلا سۇيرەپ, ونداعان مەتر جەرگە دەيىن اپاردى.
فلەشموبتان سوڭ سەرىك ءساپيەۆ جۋرناليستەرگە ءوزىنىڭ وسى وليمپيادادا بوكستان ۇلتتىق قۇراما كوماندا ساپىندا 64 كيلو سالماقتا ونەر كورسەتەتىن ابىلايحان جۇسىپوۆكە جانكۇيەر بولاتىنىن ايتتى.
– مەنىڭشە, ونىڭ جۇلدە الۋعا بارلىق مۇمكىندىگى بار. تەك ساتتىلىك پەن دايىندىق سەرىك بولسىن دەڭىز. مەن ەكى مارتە وليمپيادا ويىندارىنا قاتىسقان اداممىن. سونداعى تۇسىنگەنىم – ەشقاشاندا ساسپاۋ كەرەك, – دەدى سەرىك ساپيەۆ.
ەڭ سوڭىندا يگى شاراعا قاتىسقان 120-عا جۋىق سپورتشى «سارىارقا» اۋەجايىن جاڭعىرتىپ, «العا, قازاقستان!», دەپ ۇران تاستادى.
قايرات ءابىلدينوۆ,
«ەگەمەن قازاقستان»
قاراعاندى