ەلدى 29 جىلدان استام ۋاقىت باسقارعان ەگيپەت پرەزيدەنتى حوسني مۇباراك وتستاۆكاعا كەتتى. بۇل تۋرالى مەملەكەتتىك تەلەۆيزيا ەفيرىندە مىسىردىڭ ۆيتسە-پرەزيدەنتى ومار سۇلەيمان مالىمدەدى. پرەزيدەنتتىڭ كەتكەنى جانە رەۆوليۋتسيانىڭ جەڭىسى تۋرالى جاڭالىق تاحرير الاڭىنا جينالعاندار اراسىندا ادام ايتقىسىز قۋانىش تۋعىزدى. اتالعان الاڭعا مىڭداعان ادام جينالعان بولاتىن. ولار: «بوستاندىق! بوستاندىق! ەگيپەت – بوستان ەل!» دەپ ايقايلادى. ۆيتسە-پرەزيدەنتتىڭ سوزىنە قاراعاندا, كەتەرىنىڭ الدىندا مۇباراك ەلدى باسقارۋدى قارۋلى كۇشتەردىڭ جوعارى كەڭەسىنە تاپسىرعان. جاقىن ارادا اتالعان كەڭەستىڭ وكىلى حالىققا تەلەديدار ارقىلى ۇندەۋمەن شىعادى دەپ كۇتىلۋدە. ال مىسىر ازاماتتارى مەن مۇباراك رەجىمى اراسىنداعى قارسى تۇرۋشىلىق 25 قاڭتاردان بەرى جالعاسىپ كەلگەنى بەلگىلى. كوپتەگەن باقىلاۋشىلار دەمونسترانتتار ءۇشىن تاياۋ شىعىستاعى اسا تۇراقتى رەجىمدەردىڭ ءبىرىن تاقتان تايدىرۋ مۇمكىن ەمەس دەپ ەسەپتەگەن ەدى. الايدا ولاردىڭ ساۋەگەيلىگى ۇزاققا بارمادى. ال مۇباراكتىڭ ءوزى بولسا, ولسەم ءوز ەلىمدە ولەمىن دەپ, مىسىردان قاشۋ نيەتى جوق ەكەنىن ءبىلدىرىپ وتىرعان كورىنەدى. فرانتسۋز ءداستۇرىن قۇرمەتتەۋى ءتيىس فرانتسيا پرەزيدەنتى نيكولا ساركوزي جۋىقتا وسىنداي مالىمدەمە جاساعان. ونىڭ ايتۋىنشا, فرانتسيادا وسى ۋاقىتقا دەيىن ۇستەمدىك قۇرىپ كەلگەن مۋلتيكۋلتۋراليزم ءداستۇرى ءوزىنىڭ نەگىزسىزدىگىن كورسەتتى. ەندىگى كەزەكتە وسى ەلگە تۇراقتى تۇرۋ ءۇشىن كەلگەن كەز كەلگەن شەتەلدىك ءوزىن فرانتسۋز ۇلتىنىڭ ءبىر بولىگى رەتىندە سەزىنۋى ءتيىس. بۇل ەلدە قىزدارعا مەكتەپكە بارۋ جونىندە تىيىم سالۋعا ەشكىمنىڭ قاقىسى جوق. فرانتسيا پرەزيدەنتىنىڭ مۇنداي مالىمدەمە جاساۋىنا سوڭعى كەزدەگى وسى ەلدە اراب ەلدەرىنەن كەلەتىن مۇسىلمان ازاماتتاردىڭ سانى بارعان سايىن كوبەيە تۇسكەندىگى اسەر ەتكەن سەكىلدى. فرانتسيا قالالارىنىڭ كوشەلەرىندە ءپارانجى كيگەن ايەلدەر مەن كوشەدە ناماز وقۋشىلار كوبەيىپ كەتكەن. سەبەبى, وسى ەلدەگى مەشىتتەرگە ادامدار سىيماي بارادى. وسىعان وراي وتكەن جىلدىڭ 10 قىركۇيەگىندە فرانتسيا سەناتى ايەلدەرگە قوعامدىق ورىنداردا ءپارانجى كيىپ ءجۇرۋگە تىيىم سالاتىنداي زاڭ قابىلداعان بولاتىن. وسى زاڭعا سىن كوزىمەن قاراۋشىلار فرانتسيانىڭ ءاربىر ادامنىڭ ۇلتتىق ءداستۇرى مەن قۇقىعىن قۇرمەتتەۋشى ەل ەكەندىگىن ەسكە الىپ, بۇل زاڭنىڭ وسى داستۇرگە قايشى ەكەندىگىن ايتسا, فرانتسيا پرەزيدەنتى وعان جاۋاپ رەتىندە فرانتسۋزداردىڭ كەلۋشىلەردىڭ داستۇرلەرىن قۇرمەتتەيمىز دەپ ءوزىنىڭ ۇلتتىق ءداستۇرىنەن ايىرىلىپ بارا جاتقاندىعىن مالىمدەگەن. ەۋروپا ەكونوميكاسىنا ينتەگراتسيالانادى ەۋروپالىق كوميسسيانىڭ اتىنان ۋكراينامەن كەلىسسوز جۇرگىزۋشى توپتىڭ جەتەكشىسى فيليپپ كۋيسون ۋكراينا مەن ەۋروپا وداعى اراسىنداعى ەركىن ساۋدا ايماعى تۋرالى كەلىسىمگە بيىل قول قويىلاتىندىعىن مالىمدەدى. فيليپپ كۋيسوننىڭ ايتۋىنشا, كەلىسىمگە قول قويىلعاننان كەيىن ول ەكىجاقتى راتيفيكاتسيادان ءوتۋى ءتيىس. دەمەك, كەلىسىمنىڭ ناقتى ىسكە كىرىسۋىنە ءالى دە ەكى جىلداي ۋاقىت قاجەت. «2013 جىلعا دەيىنگى بۇل ۋاقىت ۋكراينا ءۇشىن وتپەلى كەزەڭ بولىپ تابىلادى. وسى ارالىقتا ءبىز كۆوتا مەن تاريفتەر ماسەلەسىن شەشەتىن بولامىز» دەپ مالىمدەدى كۋيسون. ءسويتىپ, قازىرگى پىكىرلەرگە قاراعاندا, ۋكراينا ەندى ءبىر 10 جىلدان كەيىن ەۋروپا ەكونوميكاسىنا تولىق ينتەگراتسيالاناتىن بولادى. اسسانجدى ايىپتايتىن كىتاپ جۋىقتا گەرمانيادا Wikileaks ينتەرنەت-پورتالى مەن ونىڭ نەگىزىن قالاۋشى دجۋليان اسسانجدى ايىپتايتىن «Wikileaks-ءتىڭ ءىشى. مەنىڭ جۇمىسىم الەمدەگى ەڭ قاۋىپتى سايت» دەگەن كىتاپ جارىق كوردى. ونىڭ اۆتورى دانيەل دومشايت-بەرگ اسسانجبەن ءۇش جىل قاتارىنان تىزە قوسىپ جۇمىس ىستەپ, اتالعان ينتەرنەت-پورتالدىڭ دامۋىنا ايتارلىقتاي ۇلەس قوسقان ادام. الايدا دومشايت-بەرگ وتكەن جىلدىڭ قىركۇيەك ايىندا ينتەرنەت-پورتالداعى قىزمەتىنەن ءوزى ەركىمەن كەتكەن. ونىڭ ايتۋىنشا, مۇنداي قادام جاساۋعا اسسانجدىڭ بارلىق بيلىكتى ءوز قولىنا جيناپ, باسقالاردىڭ ەركىن پىكىرىنە قۇلاق قويماعاندىعى, ءتىپتى ايعايعا باسىپ, قىسىم كورسەتەتىندىگى, ءوزىن تىم وكتەم ۇستايتىندىعى اسەر ەتكەن. «Wikileaks-تەن» جالعىز مەن عانا ەمەس, باسقا دا كوپتەگەن ادامدار كەتتى. ءبىز ەندى ءوزىمىز بىرىگىپ, Openleaks اتتى جەكە سايت «قۇردىق» دەگەن دومشايت-بەرگ اسسانجدىڭ اقپاراتتىڭ قۇپيالىعىنا قارسى شىعۋ ارقىلى الەمدە ۇلكەن اڭگىمەنى باستاپ بەرگەن كوزسىز ەرلىگىن مويىنداي وتىرىپ, «بالالارعا قارۋمەن ويناۋعا بولمايدى, قارۋ رەتىندە مەن اقپاراتتى, ال بالا رەتىندە دجۋليان اسسانجدى ايتىپ وتىرمىن» دەگەن ءۋاجىن بىلدىرگەن. جالعان اقپارات مۇناي باعاسىن كوتەردى اتالعان ماسەلەگە بايلانىستى ساۋد ارابياسى سىرتقى ىستەر ءمينيسترى بەكزادا ساۋل ءال-فەيسال ارنايى رەسمي مالىمدەمە جاساپ, وسىدان بۇرىن حالىقارالىق باسپاسوزدى تاراپ كەتكەن وسى ەلدىڭ كورولىنىڭ ءولىمى جونىندەگى اقپاراتتى تەرىسكە شىعاردى. ونىڭ ايتۋىنشا, كورولدىڭ دەنساۋلىق جاعدايى جاقسى. موروككوداعى ەمدەلۋ كۋرسىنان وتكەن سوڭ قايتادان ۇيىنە ورالاتىن بولادى. وتكەن جىلدىڭ سوڭىندا 87 جاستاعى كورول نيۋ-يورك قالاسىندا ەكى وپەراتسيادان وتكەن بولاتىن. داقپىرتتىڭ پايدا بولۋىنا وسى جاعداي اسەر ەتكەن سەكىلدى. تاراپ كەتكەن بۇل حابار حالىقارالىق ساۋدا بيرجالارىندا مۇناي باعاسىنىڭ كوتەرىلۋىنە ىقپال ەتىپتى.
قىسقا قايىرىپ ايتقاندا:
وزبەكستاندا وسى ەلدەگى جاعدايعا سىن كوزىمەن قاراعان رەسەيدىڭ 5-6 تەلەارنالارى جابىلعان. ولاردىڭ قاتارىندا رەن-تۆ مەن تۆتس كانالدارى دا بار. اقش امەريكالىق ازاماتتاردىڭ الەمدىك ينتەرنەت شىرماۋىعىنا قوسىلۋىنا قوسىمشا 18 ميلليارد دوللاردىڭ قارجىسىن جۇمساماق. مۇندا قاۋىپسىزدىك ماسەلەسى دە قاراستىرىلاتىن سەكىلدى. پەنسيلۆانيدە گاز جارىلىسىنان قازا تاپتى دەگەن ادامداردىڭ سانى كەشەگى كۇنى 5-كە جەتتى. وسى ۋاقىتقا دەيىن ءۇش ادام قازا تاۋىپ, ەكى ادام حابارسىز كەتتى دەپ سانالعان ەدى. الايدا ءورت سوندىرۋشىلەر ەندى ولاردى دا ولگەندەر قاتارىنا قوسىپ وتىر.ينتەرنەت ماتەريالدارى نەگىزىندە ازىرلەندى.