[caption id="attachment_53080" align="aligncenter" width="560"] فوتو: kp.ru[/caption]
جاپونيانىڭ كاناگاۆا پرەفەكتۋراسىنداعى ساگاميحارا قالاسىندا ءبىر ادام مۇگەدەكتەر ۇيىنە باسا-كوكتەپ كىرىپ, پىشاقپەن شابۋىل جاساعان. سالدارىنان 19 ادام قازا تاۋىپ, 20 ادام ءتۇرلى جاراقات الدى. دارىگەرلەر ولاردىڭ تورتەۋىنىڭ جاعدايى تىم اۋىر ەكەنىن مالىمدەدى.
ال NHK تەلەارناسىنىڭ مالىمەتىندە زارداپ شەككەندەر 45 ادام ەكەنى ايتىلادى.
«ەر ادام مۇمكىندىگى شەكتەۋلى جاندارعا ارنالعان مەكەمەگە شابۋىل جاسادى. پوليتسيا 19 ادامنىڭ وپات بولعانىن, سونداي-اق 45-ءى زارداپ شەككەنىن مالىمدەدى», – دەپ حابارلادى NHK تەلەارناسى. وقىس وقيعا توكيوعا جاقىن جەردەگى «تسۋكۋيدەگى لالا گۇلدەر» مۇگەدەكتەر ينتەرناتىندا ورىن الدى.
قاندى ارەكەتىن جۇزەگە اسىرعاننان كەيىن كۇدىكتى پوليتسياعا قارسىلاسپاي, ءوز ەركىمەن بەرىلگەن. ريا «نوۆوستي» اقپارات اگەنتتىگىنىڭ حابارلاۋى بويىنشا, ول – 26 جاستاعى ەر ادام. ءدال وسى ينتەرناتتا ءۇش جىل قىزمەت ەتىپ, جارتى جىل بۇرىن ءوز قالاۋىمەن شىعىپ كەتكەن. بۇگىنگە دەيىن جۇمىسسىز ءجۇرىپتى.
ايان ءابدۋالي