شىلدە ايىنىڭ سوڭىندا, ياعني 30-ى كۇنى ەلوردالىقتار مەن قالا قوناقتارى پيانينوشىلار قۇرامىنداعى حالىقارالىق بايقاۋلاردىڭ جەڭىمپازدارى الەكساندرا ەگوروۆا مەن ايا بولاتوۆادان قۇرالعان «Lotus Bleu» فورتەپيانولىق دۋەتىنىڭ وزگەشە ونەرىن تاماشالاي الادى. كونتسەرت «استانا وپەرا» تەاترىنىڭ كامەرالىق زالى ساحناسىندا «ەسەلەنگەن شابىت» دەگەن اتپەن وتپەك.
«Lotus Bleu» دۋەتىنىڭ ورىنداۋىندا ءحىح-حح عاسىرلارداعى شەتەل كومپوزيتورلارىنىڭ, سونداي-اق امەريكالىق جاس كومپوزيتور, پيانيست, بەينەپروديۋسەر ءارى جازۋشى گرەگ اندەرسوننىڭ شىعارمالارى كوپشىلىك نازارىنا ۇسىنىلادى. ونەرپازداردىڭ ايتۋىنشا, كونتسەرت اياسىندا بۇرىن ورىندالماعان شىعارمالار پرەمەرالارىنا ەرەكشە كوڭىل اۋدارىلماق. ياعني, جاس ۇجىمنىڭ بۇل كونتسەرتى «تاڭعالدىرۋ» جانە «جاڭالىق اشۋ» تۇجىرىمداماسى مەن ۇستانىمدارىنا سايكەس كەلمەكشى. بەلگىلى نەمىس كومپوزيتورى, ورگانشى ماكس رەگەردىڭ وزگەشە ورىنداۋدى قاجەت ەتەتىن التى پەساسى دا قازاقستاندا العاش رەت قويىلادى. سونداي-اق, قازاقستاندىقتار ءۇشىن گرەگ اندەرسوننىڭ وڭدەۋىندەگى ەكى رويالعا ارنالعان «كارمەن-فانتازياسى» دا تىڭ جاڭالىق بولماق.
اتالعان اسپاپتىڭ شەبەر ورىنداۋشىلارى تاياۋدا عانا يتاليادان جەڭىسپەن ورالدى. وندا «Lotus Bleu» دۋەتى حالىقارالىق پيانينوشىلار بايقاۋىندا (يسكيا) جۇلدەلى ەكىنشى ورىندى يەلەنگەن ەكەن. جالپى, «Lotus Bleu» دۋەتى جايلى حالىقارالىق دەڭگەيدە ەندى عانا ايتىلا باستاعانىمەن, ونىڭ سوليستەرى جەكە-دارا الدەقاشان تانىلعان, سوندىقتان دا تانىمال بولىپ ۇلگەرگەن ونەرپازدار. مۇنداي شاعىن قۇرامدا شىعارماشىلىق ۇجىم قۇرۋ يدەياسىنىڭ اۆتورى الەكساندرا ەگوروۆا – ءتۇرلى دارەجەدەگى حالىقارالىق بايقاۋلاردىڭ جەڭىمپازى رەتىندە كوپتەگەن ماراپاتتىڭ يەگەرى.
ول ءوزىنىڭ پىكىرىن بىلايشا تۇيىندەدى: «ءار پيانينوشى وزدەرىنىڭ ىشكى دۇنيەسىندە – سوليست, ال سوليستەردىڭ ءبىر-بىرىمەن ۇيلەسە كەتۋى وتە قيىن. ەۋروپادا پيانيستەر تەك وزدەرىنىڭ جەكە كارەراسىمەن اينالىساتىن جانە دۋەتتەردە عانا وينايتىن پيانينوشىلار بولىپ بولىنەدى. دۋەت پايدا بولعان سايىن, مۋزىكانتتار دا ورتاق ويلارىمەن ءبولىسىپ, ءبىر-ءبىرىن تۇسىنە باستايدى, بىرلەسىپ جاقسى ونەر كورسەتەدى. سول سەبەپتى, شەتەلدە فورتەپيانولىق دۋەتتەر ءساتتى قۇرىلسا, وندا جەكە ورىنداۋشىلىققا بولىنبەي, سول قۇراممەن ونەر كورسەتە بەرەدى. فورتەپيانولىق دۋەت قۇرۋ يدەياسى مەن ءۇشىن ايتارلىقتاي جاڭالىق بولىپ تۇر. قازىرگى زامانعا ساي وزگەرىپ كەلە جاتقان جانە كونسەرۆاتيۆتىك پىكىردى عانا ۇستانبايتىن مۋزىكانت رەتىندە ماعان ءدال وزىمدەي پيانيست-سوليستپەن ءبىر دۋەتتە ويناي الاتىندىعىمدى تەكسەرىپ ءارى سىناپ كورۋ وتە قىزىقتى. ايا تۋرالى ايتار بولسام, ءبىز ەكەۋمىز بۇرىننان تانىسپىز, سەبەبى ماگيستراتۋرادا بىرگە وقىدىق. فورتەپيانودان دۋەت قۇرۋ تۋرالى ويىمدى ايتقانىمدا, ول مەنى بىردەن قولداي كەتتى».
ايا بولاتوۆانىڭ ايتۋىنشا, العاشىندا دۋەت ەكى رويالدا ويناعان, ال مۇنداي ونەر كورسەتۋگە ماشىقتانۋدىڭ ءوزى ەرەكشە تەبىرەنىس سىيلايتىن كورىنەدى. «اركىم ءوز رويالىنا وتىرعاننان كەيىن, اسپاپتى تولىق مەڭگەرۋدىڭ ارتىقشىلىعى مول. كەيىنىرەك ءبىز ءارى قاراي دا ءوز-ءوزىمىزدى جەتىلدىرۋدى ويلاپ, شىعارمانى بىرلەسە, ءتورت قولمەن ويناپ كورۋگە بەكىندىك. سول كەزدە جاعداي وزگەردى. ناتيجەسىندە, ءتۇرلى ەرەكشەلىك بايقالا باستادى. بىرتىندەپ شىعارمانى قالاي ورىنداۋ كەرەكتىگىن مەڭگەرە باستادىق. ارينە, ءبىر ادام باسقارىپ وتىرعاندا, بارلىعى جەڭىل سياقتى كورىنۋى مۇمكىن. ال ەكى ادامنىڭ ويناۋى ارقىلى ءبىر اۋەن مەن سازدى شىعارۋ قاجەت بولعاندا, بارلىعى ءبىز ويلاعاننان الدەقايدا قيىنىراق. الايدا, ونداي كەزدە تەحنيكالىق قىرىنان عانا ەمەس, ءبىزدىڭ ساۋساقتارىمىزدىڭ جۇمىسى, كوزدەگەن باعىتىمىز, جالپى شىعارماشىلىق ويىمىز ورتاق, ءتىپتى ەكەۋمىزدىڭ جۇرەگىمىز ءبىر بولىپ كەتەدى ەكەن», – دەيدى ايا بولاتوۆا.
ءلايلا ەدىلقىزى,
«ەگەمەن قازاقستان»
استانا