وڭىرلىك ەكولوگيالىق اكتسياسىن جانداندىرۋعا جاستار قوسىلدى
الماتى قالاسى اكىمدىگىنىڭ تابيعي رەسۋرستار مەن تابيعاتتى پايدالانۋدى رەتتەۋ باسقارماسىنىڭ قولداۋىمەن CarlsbergKazakhstan كومپانياسى «اعاش وتىرعىز» («PosadiDerevo.kz») رەسپۋبليكالىق قوعامدىق بىرلەستىگىمەن بىرلەسە وتىرىپ, «ءمولدىر سۋ» وڭىرلىك ەكولوگيالىق اكتسياسىنىڭ باستاۋ العاندىعىن حابارلادى. باستاما ماقساتى بەلگىلى – قازاقستان سۋلارىنىڭ ەكوجۇيەسىن ساقتاۋ, سونىمەن قاتار, قالدىقتاردى بولشەكتەپ جيناۋ مەن قايتا وڭدەۋ مادەنيەتىن دامىتۋ.
كومپانيا قىزمەتكەرلەرى جەرگىلىكتى تۇرعىنداردىڭ قاتارىنان شىققان ەرىكتىلەر مەن قوعامدىق ۇيىمداردى وسى باستاماعا تارتا وتىرىپ, ەلدىڭ ءتۇرلى ءوڭىرلەرىندە ءتۇرلى سۋ توعاندارىنىڭ (وزەن, كول, سۋ قويمالارى) جاعالاۋىندا ورنالاسقان اۋماقتاردا تازالاۋ جۇمىستارىن جالعاستىرماق. ءار جولعى اكتسياعا شامامەن 250 ادام قاتىسادى دەپ بولجانۋدا. جوبا جىل اياعىنا دەيىن جالعاساتىن بولادى.
وسى كۇندەرى قازاقستاننىڭ بىرنەشە وڭىرلەرىن قامتۋدى جانە 7 سۋ توعانىنىڭ (الماتى, استانا, اتىراۋ, پاۆلودار, قاراعاندى, وسكەمەن قالالارى, بالقاش كولى) جاعالاۋىندا قوقىس جيناۋ, سونىمەن قاتار, كەيبىر وڭىرلەردە قوقىس جيناۋعا ارنالعان كونتەينەرلەردى ورناتۋ جوسپارلانۋدا. سونىمەن قاتار, اكتسياعا قاتىسۋشىلار سول ورىندا قوقىستىڭ سۇرىپتالۋىن جۇزەگە اسىرادى جانە قالدىقتاردىڭ بولىگى قايتادان وڭدەلۋى ءۇشىن مامانداندىرىلعان ۇيىمدارعا تاپسىرىلاتىن بولادى.
العاشقى «ءمولدىر سۋ» اكتسياسى الماتى قالاسىندا بورالداي كولىنىڭ ماڭايىن تازارتۋدان باستالدى. ءبىرىنشى كەزەكتە بۇل ىسكە جاستار جۇمىلدى. ۇيىمداستىرۋشىلار مۇنداي ساۋاپتى شاراعا بارلىق ىقىلاس بىلدىرۋشىلەر قاتىسا الاتىندىعىن ايتادى. ول ءۇشىن اكتسيا تۋرالى الەۋمەتتىك جەلىلەردە اقپاراتتىق ناۋقان جۇرگىزىلگەلى وتىر.
بۇل باستاما جونىندە Carlsberg Kazakhstan بايلانىس جونىندەگى مەنەدجەرى ماريا گوروحوۆا بىلاي دەيدى: «ءبىز رەسەيدىڭ «بالتيكا» كومپانياسىمەن بىرنەشە جىل قاتارىنان ىسكە اسىرىلىپ كەلە جاتقان «7 كول» جوباسىنا ۇقساس اكتسيانىڭ يدەياسىن كوپ ۋاقىت بويى ويلاستىرىپ جۇردىك. ماڭىزدىسى, اكتسيانىڭ ءبىزدىڭ ءوندىرىس ورنالاسقان الماتىمەن عانا شەكتەلىپ قويماي, قازاقستاننىڭ بىرنەشە وڭىرلەرىن دە قامتۋى بولاتىن. وسى جوبا اياسىندا ءبىز وتاندىق وندىرۋشىلەردىڭ دەڭگەيىندە سونداي-اق, ءار قازاقستاندىقتىڭ ەكولوگيالىق دەربەس جاۋاپكەرشىلىگىنىڭ دەڭگەيىندە ەلىمىزدە قوقىستى بولشەكتەپ جيناۋ قاجەتتىلىگىنە ەرەكشە نازار اۋدارعىمىز كەلەدى. بۇل ەلىمىزدىڭ «جاسىل» ەكونوميكاعا اۋىسۋ باعىتىن ەسكەرە كەلە, اسا قاجەت نارسە. ءبىزدىڭ «ءمولدىر سۋ» اتتى باستامامىز وڭىرلەردەن, جەرگىلىكتى بيلىكتەردەن, جەرگىلىكتى تۇرعىنداردان ءوز قولداۋىن تابادى دەگەن ويدامىز جانە جىل سايىنعى ەكولوگيالىق داستۇرگە اينالادى دەگەن سەنىمدەمىز. ءوز كەزەگىندە, Carlsberg Kazakhstan ۇزاق مەرزىمدى نەگىزدە وسى جوبانى قولداۋدى جوسپارلاپ وتىر».
ايناش ەسالي,
«ەگەمەن قازاقستان»
الماتى