ەگيپەت پرەزيدەنتى حوسني مۋباراك كايردەگى قاقتىعىستاردى تەرگەۋ بويىنشا تاۋەلسىز كوميسسيا قۇرۋ جونىندە تاپسىرما بەردى, دەپ حابارلادى «روسسيا-24» تەلەارناسى. ونىڭ مىندەتى – ەرەۋىلشىلەرگە قارسى قولدانىلعان زاڭعا قايشى دەگەن ارەكەتتەردى بارىنشا وبەكتيۆتى تۇردە زەرتتەۋ.
سونىڭ الدىندا جاڭا مينيسترلەر كابينەتىنىڭ ءبىرىنشى وتىرىسى ءوتىپ, ۇكىمەت مەملەكەتتىك قىزمەتشىلەردىڭ ەڭبەكاقىلارىن 15 پايىزعا ءوسىرۋ جونىندە شەشىم قابىلدادى. ونىڭ سىرتىندا كومەندانتتىق ساعاتتىڭ ۋاقىتىن قىسقارتۋ تۋرالى دا شەشىم قابىلداندى. كايردەگى نارازى توپتاردىڭ سانى قازىر بۇرىنعىداي كوپ ەمەس. ادامدار قالىپتى ومىرلەرىنە قايتا ورالۋدا.
وڭتۇستىك سۋدان ەگەمەندىگىن شىلدەدە تانىماق
اقش پرەزيدەنتى باراك وباما ءوڭتۇستىك سۋداننىڭ ەگەمەندىگىن 2011 جىلدىڭ شىلدەسىندە تانيتىندىعىنا ۋادە بەردى. ول افريكالىق ەلدى رەفەرەندۋمدى تابىستى وتكىزۋىمەن قۇتتىقتادى, دەپ حابارلادى «اسسوشەيتەد پرەسس» اگەنتتىگى.
ەلدىڭ تاۋەلسىز ەكى مەملەكەتكە ءبولىنۋى 2011 جىلدىڭ 9 شىلدەسىنە بەلگىلەنگەن. وعان دەيىن تاراپتار ەلدى ءبولۋدىڭ شارتتارىمەن كەلىسىپ, اتاپ ايتقاندا, شەكارانى بەلگىلەپ, سونىمەن بىرگە سۋدان مۇنايىنىڭ تورتتەن بىرىنەن استامى وندىرىلەتىن ابەي شەكارالاس اۋدانىنىڭ كىمگە تيەتىنىن انىقتاۋلارى كەرەك.
رۋمىنيا 5 ميلليارد ەۋرو كومەك الماقشى
حالىقارالىق ۆاليۋتا قورى مەن ەۋروپا وداعى رۋمىنياعا 5 ميلليارد ەۋرو كولەمىندە نەسيە بولمەك نيەتتە, دەپ حابارلايدى «اسسوشەيتەد پرەسس». ەل پرەزيدەنتى ترايان بەسەسكۋدىڭ ايتۋىنشا, تۇراقتاندىرۋ كرەديتى كۇتپەگەن جاعدايلار تۋا قالعان ساتتەر ءۇشىن قاجەت بولماق.
رۋمىنيا حۆق, بۇكىلالەمدىك بانك جانە ەۋرووداقپەن 20 ميلليارد ەۋرو كرەديت الۋ جونىندە 2009 جىلدىڭ مامىرىندا ۋاعدالاسقان بولاتىن. بىراق ەلدەگى ساياسي داعدارىسقا بايلانىستى 2010 جىلدىڭ قاراشاسىندا قارجىلاندىرۋ توقتاتىلىپ, بيىلعى قاڭتاردان ول قايتا باستالىپ وتىر.