وتكەن سەنبىدە پرەمەر-مينيستر كارىم ءماسىموۆتىڭ ءتوراعالىعىمەن ۇكىمەتتە كەزەكتى سەلەكتورلىق كەڭەس بولىپ ءوتتى. وندا ەل تۇرعىندارىن ەڭبەكپەن قامتۋدىڭ الداعى ۋاقىتتاعى كەشەندى شارالارى قارالدى. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى گۇلشارا ابدىحالىقوۆا بايانداما جاسادى.
ەلباسى نۇرسۇلتان نازارباەۆ «بولاشاقتىڭ ىرگەسىن بىرگە قالايمىز» اتتى قازاقستان حالقىنا ارناعان بيىلعى جولداۋىندا «ۇكىمەتكە وبلىستاردىڭ, استانا جانە الماتى قالالارىنىڭ اكىمدەرىمەن بىرلەسىپ, 2011 جىلدىڭ 1 مامىرىنا دەيىن حالىقتى ەڭبەكپەن قامتۋ جونىنەن قاعيداتتى تۇردە جاڭا باعدارلاما ازىرلەۋدى تاپسىرامىن» دەپ اتاپ كورسەتكەن بولاتىن. بايانداماشى ءوز سوزىندە مەملەكەت باسشىسىنىڭ جولداۋىندا العا قويعان وسى مىندەتتەردى اتاپ كورسەتە كەلىپ, مينيسترلىكتىڭ رەسپۋبليكامىزدىڭ حالقىن ەڭبەكپەن قامتۋدىڭ 2020 جىلعا دەيىنگى جاڭا باعدارلاماسىن ۇكىمەت ءمۇشەلەرىنىڭ تالقىلاۋىنا ۇسىندى.
ءمينيستردىڭ ايتۋى بويىنشا, تالقىلاۋعا ۇسىنىلىپ وتىرعان جاڭا باعدارلامانىڭ باستى ءۇش ماقساتى بار. ولار بىرىنشىدەن, حالقىمىزدىڭ ءومىر ءسۇرۋ تابىسىن كوبەيتۋ, ەكىنشىدەن, ەلىمىزدە قابىلدانعان ۇدەمەلى يندۋستريالىق-يننوۆاتسيالىق دامۋ باعدارلاماسىن ءىس جۇزىنە اسىراتىن بىلىكتى كادرلاردى دايارلاۋ, ۇشىنشىدەن, الەۋمەتتىك كومەك جۇيەسىن جەتىلدىرۋ بولىپ تابىلادى. ۇستىمىزدەگى جىلى قاناتقاقتى جوبا رەتىندە باعدارلامانىڭ ءبىرىنشى كەزەڭى ءىس جۇزىنە اسىرىلماق. ەلباسىنىڭ جولداۋىنا بايلانىستى جۇزەگە اسىرىلاتىن تۇرعىنداردى ەڭبەكپەن قامتۋدىڭ تولىققاندى باعدارلاماسى 2012 جىلدان باستاپ ومىرگە ەنگىزىلە باستايدى. «ءبىز حالىقتى ەڭبەكپەن قامتۋدى تولىققاندى جۇزەگە اسىرۋعا ارنالعان وسى باعدارلاما شەڭبەرىندە 2015 جىلعا دەيىن 1,5 ميلليون حالىقتى تۇراقتى جۇمىسپەن قامتۋدى كوزدەپ وتىرمىز. ەلباسىنىڭ جولداۋىندا ەرەكشە ماڭىز بەرىلگەن بۇل باعدارلامانى جۇزەگە اسىرۋ بارىسىندا ءبىز تاياۋ بولاشاقتا رەسپۋبليكامىزداعى كەدەيشىلىك دەڭگەيىن 7 پايىزعا, جۇمىسسىزدىق دەڭگەيىن 5,5 پايىزعا تومەندەتۋدى كوزدەپ وتىرمىز», دەدى ءوز سوزىندە ەڭبەك جانە حالىقتى الەۋمەتتىك قورعاۋ ءمينيسترى گۇلشارا ابدىحالىقوۆا.
ۇكىمەت وتىرىسىندا پرەمەر-مينيستر كارىم ءماسىموۆ ءسوز الىپ, حالقىمىزدى 2020 جىلعا دەيىنگى ەڭبەكپەن قامتۋ ماسەلەسى 8 اقپاندا وتەتىن ۇكىمەتتەگى كەزەكتى سەلەكتورلىق كەڭەستە جان-جاقتى تالقىلاناتىندىعىن حابارلادى. سونىمەن بىرگە وسى ۇكىمەت وتىرىسىندا قۇرىلىس جانە تۇرعىن ءۇي-كوممۋنالدىق قىزمەت سالاسىنىڭ پروبلەمالارى دا تالقىلاناتىن بولادى. ۇكىمەت باسشىسى اتاپ كورسەتكەندەي, الداعى ۇكىمەت وتىرىسىندا ەلباسىنىڭ قازاقستان حالقىنا ارناعان جولداۋىنان تۋىندايتىن مىندەتتەرگە بايلانىستى, اسىرەسە, تۇرعىنداردى جۇمىسپەن قامتۋدىڭ الداعى 10 جىل مەرزىمگە ارنالعان كەشەندى باعدارلاماسى بەلگىلەنبەكشى.
جىلقىباي جاعىپار ۇلى.