مەن ونى العاش ماقتاي رامازان ۇلى ساعديەۆتىڭ قاسىنان كوردىم. اتاقتى زىلقارانىڭ ۇرپاعى, العىر قايراتكەر, سەرى جىگىت ماقتايدىڭ قاسىندا كەز كەلگەن ادام جۇرە بەرمەيتىنىن, ونىڭ جولداس, دوس تاڭداي الاتىنىن بىلەتىن مەنىڭ جاڭا تانىسقا كوز تىگە قاراعانىم ەسىمدە. بۋرىل تارتا باستاعان شاشى ارىستاننىڭ جالىنداي ءتوگىلگەن, ءوزى دە ارىستان كەلبەتتى جىگىت ەكەن. كەڭ يىقتى, كەۋدەسى شالقاق بىتكەن, ۇزىن بويلى ازاماتتىڭ تۇلعاسى دا «ەشكىمگە ەشقاشان يلىكپەيمىن, تىزە بۇكپەيمىن» دەپ تۇرعانداي, تاكاپپار كورىندى. ماقتاي ونى «ەسكى دوسىم» دەپ تانىستىردى. ول «رىمبەك ءجۇنىسوۆ» دەپ اتى-ءجونىن ايتتى. كەشىكپەي ول ءبىزدى – ماقتايدىڭ دوستارىن قوناققا شاقىردى. تاياۋدا عانا كوشىپ كەلگەن ەكەن. بايكەن-اعا ءاشىموۆ, ساعادات-اعا نۇرماعامبەتوۆ, ساعىندىق-اعا كەنجەباەۆ, ىشىندە ءبىز بار – تانىسىپ, ءبىراز وتىرىپ, اڭگىمەلەسىپ قايتتىق. رىمبەكتىڭ وتباسىن, تەگىن بىلدىك. قاراعاندى وبلىسىنىڭ اقتوعاي (بۇرىن قوڭىرات اتانعان) اۋدانىنىڭ تۋماسى بولىپ شىقتى. بۇل – ءاليحان ءبوكەيحانوۆ, ءالىمحان ەرمەكوۆ, جاقىپ اقباەۆ سياقتى الاشتىڭ ارىستارى شىققان ولكە بولاتىن. الاشورداشىلارعا, ولاردىڭ ۇرپاعىنا, جەرلەستەرىنە كەكشىلدىكپەن قاراعان كەڭەس وكىمەتى ولاردىڭ ەلىنە دە كوپ جىلدار قاعاجاۋ كورسەتىپ, اۋداننىڭ دامۋىنا كوڭىل بولمەگەن. ءسويتىپ ول ۇنەمى «الىس, ارتتا قالعان» اۋداندار ءتىزىمىندە جۇرگەن. ءومىر بويى ول ەلدەن شىققان ادامدارعا سەنىم كورسەتىلمەي, بىرەن-ساران ءوز قابىلەتىمەن كوزگە تۇسكەندەردىڭ ۇستىنەن ىلعي ارىزدار جازىلعانىن دا بىلەتىنبىز. اقتوعاي اۋدان بولعاننان بەرى 60 جىلدىڭ ىشىندە ەل باسشىلىعىنا ءوز ىشىنەن ءبىر ادام ۇسىنىلماي, كادردى ىلعي سىرتتان تاسىعانىن دا جەرگىلىكتى جىگىتتەر وكپە قىپ ايتىپ جۇرەتىن. سول ادەت «قايتا قۇرۋ» كەزىندە بۇزىلىپ, اۋدان ەڭبەكشىلەرى اۋداندىق پارتيا كوميتەتىنىڭ ءبىرىنشى حاتشىسىنا وزدەرى سايلاپ العان تۇڭعىش جەرگىلىكتى جىگىت وسى رىمبەك بولعان ەكەن.
رىمبەكتىڭ ەڭبەك جولىنىڭ ءوزى – ءبىر ادامنىڭ ومىرىنە جەتەرلىك, ءارى قىزعىلىقتى, ءارى از كۇنگى ادامي تىرشىلىكتى قالاي قۇرۋعا بولاتىنى جايلى تاجىريبەگە ۇقساس. ونىڭ ومىردەن العان ساباعى مەن كوڭىلىنە تۇيگەن سىرى كوپ. تەكتى جىگىت جاستايىنان ۇلتتىق ونەگە ءداستۇرلەردىڭ كوڭىلگە قونىمدى جاعىن ەكشەپ بويىنا سىڭىرگەن. جاڭانى دا تانىعىش, بىراق كورسەقىزارلىق تانىتپاي, ابايلاپ, وي ەلەگىنەن وتكىزىپ بارىپ قابىلداعان. قازاقى تىرشىلىكتى بۇزباي, ساباقتاستىرا پايدالانعان. وسىعان ازاماتتىڭ ەل ءسۇيۋ, جەر ءسۇيۋ سەزىمدەرىن, ۇلتتىق ماقتانىش پەن نامىسىن بيىك قوياتىنىن, ارۋاقتار مەن ۇلكەندەردى سىيلاي ءبىلۋىن, العا قاراۋشىلىق, بولاشاقتى بولجاعىش قابىلەتىن, بويىنا بىتكەن قايراتتى قوسىڭىز. رىمبەكتىڭ ىزدەنىمپازدىعىن, كىسىلىگىن ءتاربيەلەگەن ۇعىمداردىڭ وسىلار بولعانىن ونىڭ ءومىر جولىمەن تانىسقان ادامنىڭ ءبارى دە تۇسىنە الادى. ول وسىنىسىمەن, ازاماتتىق ۇلاعاتىمەن ءىرى كورىنەدى.
رىمبەك العاشقى قىزمەتىن اۋىل شارۋاشىلىعى تەحنيكۋمىن ءبىتىرىپ كەلىپ, سوۆحوزعا اگرونوم بولۋدان باستاپتى. ءار نارسەنى بىلۋگە قۇمار, تالاپتى, پىسىق جاس جىگىتتى اۋداندىق پارتيا كوميتەتىنىڭ ءبىرىنشى حاتشىسى كورىپ, ونى پارتياعا العىزىپتى. ءارى ونىمەن اڭگىمەلەسىپ, بولاشاعىنا جول سىلتەپتى. «بۇل وقۋىڭ ازدىق ەتەدى. كەلەشەگىڭ ۇلكەن سياقتى. وقۋىڭدى جالعاستىر», دەپ اقىلىن دا ايتىپتى. سودان رىمبەك الماتىنىڭ اۋىل شارۋاشىلىعى ينستيتۋتىنا ءتۇسىپ وقىعان.
سودان كەيىنگى ونىڭ ءومىرى ەلدەگى اۋىل شارۋاشىلىعى سالاسىنداعى ەڭبەگىمەن جالعاسقان. سوۆحوزدا باس اگرونوم, اۋداندىق پارتيا كوميتەتىندە نۇسقاۋشى, اۋداندىق اۋىل شارۋاشىلىعى باسقارماسى باستىعىنىڭ ورىنباسارى قىزمەتتەرىن ىستەپ, «قىزىل اراي» اتتى سوۆحوزعا ديرەكتورلىققا تاعايىندالعان. وسى جىلدارى ويشىل جاس جىگىت اۋىلداعى تىرشىلىكتى, شارۋاشىلىقتى باسقارۋ ءجۇيەسىن تولىق زەرتتەپ, ويلانا باستايدى. اۋىل شارۋاشىلىعىنداعى ولقىلىقتاردى كورەدى. ىسكە جاۋاپسىز قاراۋ, وتىرىك ايتۋ, جالعان ءمالىمەتتەر بەرۋدىڭ ءورىس العانىنا كۇيىنەدى. ەندى بيلىككە كەلگەندە, جۇمىستى نەدەن باستاۋ كەرەك ەكەندىگىنە ءمان بەرە قارايدى. ءسويتىپ, ول سوۆحوز ديرەكتورى بولىپ ىستەگەن 8 جىل ىشىندە ءوز ۇعىم-تۇسىنىگىمەن شارۋاشىلىقتى جاڭاشا باسقارۋعا ۇمتىلادى. كادرلاردى اۋىستىرمايدى, تەك ولارعا جاڭاشا ىستەۋ تالابىن قويادى, جاۋاپكەرشىلىگىن كۇشەيتەدى. ەلدەن جاسىرىپ, «بىرەۋ كورىپ قويماسىن» دەگەن ۇعىممەن جۇمىس ءىستەۋدىڭ قىلمىسقا اپاراتىنىن ايتىپ, نە ىستەسەڭ دە اشىق, ەلگە كورسەتىپ ىستەۋدى تاپسىرادى. وسىنىڭ وزىمەن شارۋاشىلىقتا بار مۇمكىندىكتەردى العا شىعارىپ, مال باسى ءمولشەرىن مولايتادى. سوۆحوزدا مەملەكەتكە ەت تاپسىرۋ 525 توننادان 800 تونناعا, قوي باسى 22 مىڭنان 38 مىڭعا, سيىر 2800-دەن 4000-عا, جىلقى 475-تەن 850 باسقا دەيىن وسەدى.
اۋىلدىڭ الەۋمەتتىك تىرشىلىگىن دە جاقسارتۋعا جول اشىلادى. سوۆحوز ورتالىعىنا ون جىلدىق جاڭا مەكتەپ سالدىرىپ, تۇڭعىش بالاباقشا اشادى. اۋداندا ءبىرىنشى بوپ «قىزىل ارايعا» تەلەفون ءجۇيەسى كەلەدى, تەلەديدار قابىلداۋعا قول جەتكىزەدى. اۋدان مەن سوۆحوز اراسىنا كوتەرمە جول سالدىرادى. سول جولمەن ەكى اراعا اۆتوبۋس قاتىناسىن ۇيىمداستىرادى. سول 70-جىلدارى الىس اقتوعايدىڭ ءبىر اۋىلىندا ىسكە اسقان وسىنداي جاڭالىقتار ءبىر اۋداندى دۇرلىكتىرۋگە جارايتىن ەدى. ەلدىڭ ءبارى «قىزىل ارايعا» قارايدى. اۋدان باسشىلارى ولاردىڭ ءتاجىريبەسىن پايدالانۋ ءۇشىن كورشى اۋىلداردان كىسىلەر جىبەرەدى. جاس ديرەكتوردىڭ ەسىمى دە ءار جەردە اتالا باستايدى.
ءسويتىپ ول اۋەلى اۋدانعا اۋىل شارۋاشىلىعى باسقارماسىنىڭ باستىعى, ودان سوڭ اۋداندىق پارتيا كوميتەتىنىڭ ەكىنشى حاتشىسى, اۋداندىق اتقارۋ كوميتەتىنىڭ ءتوراعاسى سياقتى لاۋازىمدارعا كوتەرىلەدى. اۋداندىق پارتيا كوميتەتىنىڭ ءبىرىنشى حاتشىسى قىزمەتىنە سايلانادى.
رىمبەك اقتوعاي اۋدانىنا باسشى بولعان جىلدارى گورباچەۆتىڭ دەموكراتيانى دامىتۋ ءجونىندەگى يدەياسى جەر-جەرگە تاراي باستاعان ەدى. قازاقستاندا دا جەكەلەگەن ۇجىمدار ءوز باسشىلارىن وزدەرى سايلاپ الا باستادى. اۋداندىق پارتيا كوميتەتىنىڭ ءبىرىنشى حاتشىسى كەتىپ, جاڭا باستىق سايلاۋ كەزىندە جەرگىلىكتى كوممۋنيستەر داۋىس كوتەرىپ, «پارتيا اقتوعايعا كادردى ءومىر بويى سىرتتان تاسۋمەن بولدى. ءبىزدىڭ ادامدارعا سەنىم كورسەتپەدى. ەندى ءوز باسشىمىزدى ءوزىمىز سايلاپ الاتىن كۇن تۋدى» دەپ, رىمبەك ءجۇنىسوۆتى ۇسىنىپ, بالاما نەگىزدە ءبىراۋىزدان سايلايدى.
جاس باسشىنى الدىمەن وبلىس ورتالىعىنان الىس ورنالاسقان اۋداننىڭ ارتتا قالىپ وتىرعان جاعدايلارى ويلاندىرادى. 1986 جىلدى اۋدان 6 ملن. رۋبل قارىزبەن اياقتاپتى. تابىسى مالدىڭ ءتولىمەن, جۇنىمەن, سۇتىمەن, ەتىمەن باعالاناتىن اۋداندا بۇل كورسەتكىشتەر تىم تومەن ەكەنى بەلگىلى. ول شارۋاشىلىقتاردا بولىپ, مەملەكەتكە بەرەشەك قارىزدى جويۋ, تابىستى ۇلعايتۋ, ول ءۇشىن ءار ۇجىمنىڭ ءوزىن-ءوزى اقتاۋى ماسەلەلەرىن اقىلداسادى. بىرتىندەپ قارجىلاندىرۋدىڭ جاڭا پرينتسيپىنە كوشۋدىڭ قاجەتتىگىن كوتەرەدى. وسى سالاداعى بەتبۇرىس اقتوعايلىقتاردى ەكونوميكالىق رەفورماعا جەتەلەيدى. مۇنداي جولدىڭ پايدالى ەكەنىنە حالىقتىڭ كوزى جەتە باستايدى. ءسويتىپ, 1987 جىلى سايلانعان جاس باسشى اۋداننىڭ بۇرىنعى قارىزىن وتەپ, 1988 جىلدىڭ 2 ملن. رۋبل تابىسپەن اياقتالۋىن قامتاماسىز ەتەدى. اۋدان بويىنشا ارەندالىق قاتىناستاردى دامىتۋدىڭ مۇمكىندىكتەرى اشىلادى. 1989 جىلى اۋدان 5 ملن. 886 مىڭ رۋبل پايدا تابادى.
ءسويتىپ ءتۇپ تامىرى تەرەڭگە كەتكەن بىرىڭعاي شارۋاشىلىق كورسەتكىشتەرىن ەندى ەكونوميكالىق تۇتقالار باتىل الماستىرا باستايدى. ارەندالىق, مەردىگەرلىك ءادىس كەڭ ءورىس الادى. ەكى جىل ىشىندە اۋدان شارۋاشىلىقتارىنان 93 بريگادا ارەندالىق قاتىناسقا كوشەدى. اۋداندا مال ۇستاۋدىڭ جىلدار بويى قالىپتاسقان ءبىر جاقتى ەڭبەك ادىسىنە وزگەرىستەر جاساۋدىڭ قاجەتتىگى كورىنە باستايدى. جارتىلاي شولەيت ايماققا ورنالاسقان اۋداندا جايىلىمدار مەن شابىندىقتاردىڭ جۇتاڭ تارتۋى, توپىراق جامىلعىسىنىڭ مال تۇياعىمەن توزۋى, اقشاڭداقتارعا اينالۋى ونى پايدالانۋدىڭ جاڭا ءادىسى جايلى ويلاندىرادى. ولاردى قالپىنا كەلتىرۋ جۇمىستارىمەن بىرگە, ارنايى مال بورداقىلاۋ الاڭدارىن جاساۋ ءماسەلەسى قوزعالادى. اۋدان بويىنشا ەكى جىلدىڭ ىشىندە 4 مىڭ قوي, 500 ءىرى قارا سەمىرتەتىن 5 مال بورداقىلاۋ الاڭى ىسكە قوسىلادى.
وسىنداي باستامالار نەگىزىندە اۋداننىڭ ەكونوميكالىق جاعدايى ۇلكەن وزگەرىسكە ۇشىرايدى. اقتوعاي باسشى ورىنداردىڭ نازارىنا ىلىگەدى. 1988 جىلدىڭ قورىتىندىسى بويىنشا, اۋدان كوكپ وك-ءنىڭ, كسرو مينيسترلەر كەڭەسىنىڭ, كاسىپوداقتاردىڭ بۇكىلوداقتىق ورتالىق كەڭەسىنىڭ, بلكجو وك-ءنىڭ قۇرمەت ديپلومىن جەڭىپ الادى. بۇل – ءومىر بويى ارتتا قالىپ كەلگەن اقتوعاي اۋدانىنىڭ العاشقى جەڭىسى ەدى.
وسىنىڭ ءبارى ءبىر ادامنىڭ ەڭبەگى ەمەستىگى ايقىن. بىراق ەلدى ۇلى ىستەرگە باستاپ, ۇيىمداستىرا بىلەتىن باسشىنىڭ ءرولى ەشۋاقىتتا دا جوققا شىقپايدى. رىمبەك باس بولىپ, اۋدان جىگىتتەرىنە, ماماندارعا وي سالدى, جىگەر بەردى, جاستاردىڭ ىسكەرلىگىن, شەبەرلىگىن, باسقا دا قابىلەتىن اشۋعا كومەكتەستى.
كومەك الۋدىڭ دا جولى كوپ. رىمبەك ءاربىر ساپارىندا الماتىدا, وبلىس ورتالىعىندا بولعان كەزدەرى رەسپۋبليكانىڭ باسشى قىزمەتكەرلەرىن اۋدانعا شاقىراتىن ءمىنەز شىعاردى. ولاردى اۋدانمەن تانىستىرىپ, ەڭبەكشىلەردىڭ مۇڭ-مۇقتاجىن ايتادى. ءسويتىپ كومەك الادى. بايلانىس ءمينيسترى ۋليانوۆ وعان تەلەديدار, تەلەفون ءجۇيەسىن سىيلاسا, اۆتوموبيل جولدارى ءمينيسترى ش.بەكبولاتوۆ جولدى جوندەۋگە كومەك بەردى. تۇتىنۋ قوعامىنىڭ باستىعى ءو.سارسەنوۆ ءۇلكەن ساۋدا ورتالىعىن سالىپ بەرسە, س.قۇباشەۆ بالقاش ءوندىرىسىنىڭ اۋدانعا كومەكتەسۋىنە ءجاردەم جاسادى. الا ءبىلۋ, ۇيىمداستىرۋ – بۇل دا ونەر.
رىمبەكتىڭ كەزىندە اقتوعايدا ەڭبەك ادامدارىنىڭ تۇرمىس كۇيىنە, جاستاردىڭ وقىپ ءبىلىم الۋىنا, مەكتەپ, مادەنيەت سارايى, كىتاپحانا, كينو قوندىرعى, اۋرۋحانا, ەمحانا, ساۋدا, تۇرمىس قاجەتىن وتەۋ, بايلانىس مەكەمەلەرىنىڭ جۇمىستارى جولعا قويىلدى. مۋزىكا, سپورت مەكتەپتەرى اشىلدى. ويىن-ساۋىق اتتراكتسيونى ورنادى. بۇرىن جوعارعى ءبىلىمدى مامان كادرلارى از اۋدان جاستارىن قولداپ, شارۋاشىلىقتار ەسەبىنەن وقۋعا جىبەرۋ پراكتيكاسى ىسكە استى.
وسىنداي جاعدايدا 1990 جىلى اۋداننىڭ ۇيىمداستىرىلعانىنا 60 جىل تولۋى اتاپ ءوتىلدى. رىمبەك ونى ءوزى باسقارىپ, ءۇي تىگۋ, اس تا توك جاساپ, بايلىقتى باسەكەمەن كورسەتۋ جولىن ەمەس, اۋداننىڭ ءبۇگىنگى كەلبەتىن تانىتۋ جولىن تاڭدادى. «اۋدان تاريحى وتە باي, بىراق ونىڭ قاعازعا تۇسكەنى جوق» دەگەن ول اۋدان ءومىرى جايلى تەلە, راديو حابارلار جاساتتى. «اقتوعاي – التىن بەسىگىم» اتتى كىتاپ شىعاردى. ولاردا ار جاعى قارامەندە بي مەن جيدەباي باتىردىڭ, بەر جاعىندا ءاليحان بوكەيحانوۆ, ءالىمحان ەرمەكوۆ, جاقىپ اقپاەۆ سياقتى الاش ارىستارىنىڭ, نارمانبەت ورمانبەتوۆ, شاشۋباي قوشقارباەۆ, كۇلاش بايسەيىتوۆا, ماناربەك ەرجانوۆ, ماعاۋيا حامزين ءتارىزدى ادەبيەت پەن ونەر تارلاندارىنىڭ, اقجان ماشانوۆ, قايدار ارىستانبەكوۆ, راقىمجان شاياحمەتوۆ, ءاليحان مۋسين سياقتى قوعام جانە عىلىم قايراتكەرلەرىنىڭ وتانى جايلى قىزىقتى اڭگىمەلەر قامتىلدى.
رەسپۋبليكادا حالىق دەپۋتاتتارى سايلاۋى وتكەن كەزدە رىمبەك كوپپەن بىرگە سول سايلاۋعا قاتىناستى. سايلاۋ تاعدىرى ءۇش اۋدان (اقتوعاي, شەت, پريوزەر) سايلاۋشىلارىنىڭ قاتىسۋىمەن شەشىلدى. اقتوعايدا رىمبەك اتقارعان جۇمىستار كورشى اۋداندارعا دا بەلگىلى بولىپ قالعان كەز. سوندىقتان ولار دا ەلىنە ورتاق ازاماتتى شىن كوڭىلدەرىمەن قولدادى. ءسويتىپ «قازاق كسر حالىق دەپۋتاتى» دەگەن اتاققا يە بولىپ, جوعارعى كەڭەستىڭ ءحىى سەسسياسىنىڭ جۇمىسىنا قاتىستى. وسى دەپۋتاتتىق مانداتىمەن ول 1991 جىلى ەلىمىزدىڭ ەگەمەندىگىن جاريالاۋدا, ن.نازارباەۆتى پرەزيدەنت ەتىپ سايلاۋدا, ەگەمەن ەلدىڭ زاڭنامالىق قۇجاتتارىن قابىلداۋدا بەلسەندى جۇمىستار جاسادى. «وتان» (كەيىن «نۇر-وتان») پارتياسىنىڭ العاشقى مۇشەلەرىنىڭ ءبىرى بولىپ, پارتيانىڭ ساياسي كەڭەسىنىڭ قۇرامىنا سايلاندى. ءۇشىنشى شاقىرىلعان پارلامەنتكە وسى پارتيا اتىنان ۇسىنىلدى.
كەيىن استاناعا ورنالاسىپ «اقمولا-بەتون» زاۋىتىن باسقارعاننان بەرى دە ەلىنە كومەگىن جالعاستىرىپ كەلەدى. استانانىڭ ون جىلدىعى تۇسىندا قاراعاندىلىقتار ورناتقان ورتالىق تسيرك الاڭىنداعى تۇعىرلاردى سالۋعا كەرەك بەتوندى وسى زاۋىت بەردى. اقتوعاي اۋدانىنىڭ ورتالىعىنداعى كاسىپتىك-تەحنيكالىق ۋچيليششە ونىڭ ارقاشان دا قامقورلىعىنا يە بولىپ كەلەدى. ازاماتىنا ريزا اقتوعايلىقتار رىمبەكتى «اقتوعاي اۋدانىنىڭ قۇرمەتتى ازاماتى» ەتىپ سايلادى. ەل تاۋەلسىزدىگىنە قوسقان وسىنداي ۇلەسى ءۇشىن ول «قازاقستاننىڭ ەڭبەك سىڭىرگەن قايراتكەرى» اتاعىنا يە بولدى.
ازاماتتىڭ جۇرگەن جولى قاي كەزدە دە تەگىس بولماعان. ءومىردىڭ قيىنشىلىقتارىنا قوسا, كورە الماۋشىلار, قىزعانىشپەن قاراۋشىلار دا بولعان. رىمبەكتىڭ جولى دا وسىندايلاردان قۇر ەمەس. «كوپتىڭ كوڭىلىنەن شىعىپ, ءسال بيىكتەي باستاساڭ, كورە الماۋشىلىق باستالادى, – دەيدى ول. – سىرتتان كەلمەسە دە, وزىڭمەن بىرگە جۇرگەن, قولىنان تۇك كەلمەيتىن دارمەنسىزدەردىڭ پيعىلىنان تۋاتىن جايتتار بارلىق جەردە كەزدەسەدى. جامان بولماي, جاقسى قايدان شىعادى؟ اق پەن قارا قوسا جۇرسە, جامان مەن جاقسى دا سولاي جۇرەدى. قازىر ويلاپ وتىرسام, سول ارىزداردىڭ كوپ پايداسى تيگەن ەكەن. بىرىنشىدەن, ساقتاناسىڭ, ويلاۋ قابىلەتىڭ كۇشەيەدى. ەكىنشىدەن, تەكسەرىپ كەلگەن كىسىلەرمەن تانىساسىڭ, ءورىسىڭ كەڭەيەدى. ادالدىققا كوزى جەتكەننەن كەيىن ولار قول ۇشىن بەرەدى, قولدايدى, قورعايدى». وسى بۇرالاڭ, تايعاق جولدارمەن رىمبەك تىزەسى بۇگىلمەي, تابانى تايماي, سۇرىنبەي ءوتتى.
بۇگىندە قۇرمەتتى دەمالىسىن الىپ, ازداعان بيزنەسىن كۇيتتەپ جۇرگەن ازاماتتىڭ ءىسى مەن ويىندا تىنىم جوق. ول تاۋەلسىز ەلىنىڭ تىرشىلىگى جايلى ويلانادى. جاقسىسىنا قۋانىپ, ءساتسىز قادامدارىنا سىن كوزىمەن قاراپ وتىرادى, ونىڭ دەۆيزى – «قاي جاسقا كەلسەڭ دە, ەلىڭە پايداڭدى تيگىزۋ. ءتىپتى قولىڭنان ەشتەڭە كەلمەسە, تىلەكشى بول. باستىق بولۋ مىندەتتى ەمەس. قانداي جۇمىس اتقارساڭ دا, پەيىلىڭمەن ىستە, ارتىڭدا ءىز قالسىن. اتا ارۋاعىنا سىيىنىپ كۇن كورۋگە بولمايدى, مەنىڭ اكەم عۇلاما بولعان, باي, بولىس, باتىر بولعان دەگەندى ايتۋدىڭ ءوزى كۇلكى». ول قازاقستاننىڭ جەتىستىگىنە قۋانادى.
رىمبەكتىڭ ويلارى دا, ىستەرى دە كوپكە تانىمال. ونىڭ «كوڭىلگە تۇيگەندەرىم» (2000), «توقىراۋىن توقىراماسىن» (2007) دەگەن كىتاپتارى بۇل كۇندەرى وقىرماندارىن تاپقان. وسىلاردى وقۋ ءبىراز جىلدان بەرى تانىسىپ, تابىسقان ىنىمە دەگەن مەنىڭ قۇرمەتىمدى وياتقانى جاسىرىن ەمەس. 20 جىلدىق تانىستىق, تۋىستىق سەزىمدەر ونىڭ كەڭ مىنەزدى, كىسىگە جاقىن جۇرەتىن, ادام تانيتىن, ۇلكەنگە كىشى, كىشىگە اعا بولا بىلەتىن ازامات ەكەنىن كورسەتتى. وسى مەرزىم ىشىندە مەن ونىڭ ازاماتتىق بەينەسىن تولىق كوز الدىما كەلتىرىپ, جان دۇنيەسىن تانىعاندايمىن. دوس-ءىنىم تۋرالى ەكى-ءۇش اۋىز ءسوز ايتۋعا بەكىنۋىم دە وسىدان.
... قارقارالى تاۋلارىنىڭ ەڭ بيىك شىڭدارى – قىزىلاراي مەن اقسوراڭ, سۋى ەلگە بەرەكە اكەلگەن, جاعاسى نۋ توقىراۋىن رىمبەكتىڭ ازاماتتىق بەينەسىن دە, ەلىنىڭ تابيعاتىن دا كوز الدىڭنان وتكىزىپ تۇر. ەردى ەل تۋعىزادى, تاربيەلەيدى.
سەرىك قيراباەۆ.