سەيدوللاعا دەگەن ساعىنىش سەيىلمەيدى

استانادا قازاقستاننىڭ ەڭبەك سىڭىرگەن ونەر قايراتكەرى سەيدوللا بايتەرەكوۆتىڭ شىعار­ماشىلىعىنا ارنالعان كەش ءوتتى. ونىڭ «ءاليا», «كۇنگە تابىنۋ», «دوس تۋرالى جىر», «تۇركىستان» اندەرى مۋزىكا سۇيەر قاۋىمنىڭ رۋحاني ازىعىنا اينالدى دەسەك, ارتىق ايتقاندىق بولماس. «ءاليا» ءانى دۇنيەگە 1975 جىلى كەلگەن ەكەن. كوزى تىرىسىندە سازگەر سول ءاننىڭ دۇنيەگە كەلۋى جايلى بىلاي دەپ تولعانعان ەدى: «ءان ويىمدا ءبىراز ءجۇردى. كۇردەلى اۋەن جادىمدى باۋراي جونەلدى. باسىندا ىڭىلداپ قانا ءجۇردىم. بىردە باكىر تاجىباەۆتىڭ جىر جيناعىن قولىما الىپ, اشا بەرگەنىم مۇڭ ەكەن, كوزىمە اقىننىڭ ءاليا مولداعۇلوۆاعا ارنالعان ولەڭ جولدارى ءتۇستى. جادىمدا جۇرگەن اۋەنگە سالىپ ەدىم, قۇيىپ قويعانداي ءدال كەلدى. بۇل ءان ارناۋ ەمەس, بۇل ءان – جوقتاۋ. بالعىن قىزدىڭ ەرلىگىن ۇلىقتاۋ, ەل جادىندا قالدىرۋ ءۇشىن وسىنداي ءان قاجەت-اق». ول ءان سول كەزدە 17 جاستاعى ءانشى روزا رىمباەۆانىڭ ورىنداۋىندا كەڭىنەن تانىلدى. 1976 جىلى «التىن ورفەي» بايقاۋىندا شىرقالىپ, ءبىرىنشى ورىندى يەلەندى. ماسكەۋلىكتەر «ءاليا» ءانىن «ەڭ ۇزدىك جىل ءانى» دەپ باعالاپ, ماراپاتتاعان بولاتىن. «ءاليا» ءانى ارقىلى جاس ءانشى روزا رىمباەۆا كوپشىلىكتىڭ كوزايىمىنا اينالىپ, ونەر كوگىندە كەڭىنەن قانات قاعۋىنا جول اشتى. سونداي-اق, «ءاليا» ءانى كوپشىلىككە سازگەر سەيدوللا بايتەرەكوۆتى دە تانىتتى. «سەيدوللا ءوز زامانىنىڭ تۇلعاسى. بۇگىنگى ۇرپاق ونى ۇلگى تۇتىپ, اندەرىن جاتتاپ ءجۇرۋى ءتيىس. ول ءۇشىن ونى ەلگە ودان ءارى تانىتاتىن وسىنداي شىعارماشىلىق كەشتەر ءداستۇرلى تۇردە ءوتىپ تۇرۋى قاجەت», – دەيدى ونىڭ جارى ءلاززات مۇزارافقىزى. ەسىلدىڭ ەن جاعاسىندا وتكەن كەشكە روزا رىمباەۆا, «جەتىگەن» توبى, سۇندەت بايعوجين, باعدات سامەدينوۆا, جەڭىس ىسقاقوۆا, باقىت شاداەۆا, ءالي وقاپوۆ, ايگەرىم قالاۋباەۆا, سەرىك يبراگيموۆ, «ۆيدمەن» توبى, «ءلۇپىل» دۋەتى سەكىلدى ەسترادا جۇلدىزدارى قاتىسىپ, سازگەردىڭ اندەرىن ورىندادى. راۋان قايدار, «ەگەمەن قازاقستان»