كەشە قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى ق.ساۋداباەۆ ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ (اوسشك) اتقارۋشى ديرەكتورى ەلشى چينار الدەميرمەن كەزدەستى, دەپ حابارلادى قر ءسىم-ءىنىڭ ءباسپاسوز قىزمەتى.
كەزدەسۋ بارىسىندا اوسشك جاۋاپكەرشىلىك ايماعىندا قاۋىپسىزدىكتى قامتاماسىز ەتۋ, ازيا ەلدەرىنىڭ ىنتىماقتاستىعىن ۇيلەستىرۋ, اتاپ ايتقاندا, گۋمانيتارلىق جانە ەكونوميكالىق ولشەمدەردەگى ماسەلەلەر تالقىعا سالىندى.
اوسشك-ءنىڭ ىرعاقتى دامۋىنا, ونىڭ ينستيتۋتتىق رەسىمدەلۋىنە جانە قاتىسۋشىلارىنىڭ كوبەيۋىنە بايلانىستى قر پرەزيدەنتىنىڭ 1992 جىلى بۇۇ قابىرعاسىندا ۇسىنىپ, قاتىسۋشى مەملەكەتتەر تاراپىنان دا جانە ءالەمدىك قاۋىمداستىق تاراپىنان دا قولداۋ مەن تۇسىنىستىك تاپقان باستاماسىنىڭ جەمىستىلىگى مەن وزەكتىلىگى ەرەكشە اتالدى. ءبۇگىنگى تاڭدا اوسشك 3 ملرد. حالقى بار 22 مەملەكەتتى قامتىپ وتىرعان ۇلكەن كوپجاقتى ديپلوماتيالىق فورۋمعا اينالدى. وسىعان وراي, قازاقستان سىرتقى ساياسات ۆەدومستۆوسىنىڭ باسشىسى جاڭا مۇشەلەردىڭ الەۋەتىن اوسشك قىزمەتىن بەلسەندىلەندىرۋگە, ءوزارا ۇنقاتىسۋدى ءارى قاراي نىعايتۋعا جانە دامىتۋعا پايدالانۋ قاجەتتىگىن اتاپ ءوتتى.
اڭگىمە بارىسىندا قازاقستان مەن تۇركيانىڭ اوسشك اياسىنداعى ءوزارا ىقپالداستىق ماسەلەسى قاراستىرىلدى. ەكى ەلدىڭ كەڭ اۋقىمدى باعىتتارداعى ىنتىماقتاستىعىن اتاي وتىرىپ, تاراپتار ەكىجاقتى بايلانىستى نىعايتۋعا باعىتتالعان جۇمىستاردى جالعاستىرا بەرۋگە نيەت ءبىلدىردى.
ق.ساۋداباەۆ انكارا قولداۋىن جوعارى باعالادى جانە ەكىجاقتى قارىم-قاتىناس دەڭگەيىن, تۇرىك تاراپىنىڭ حالىقارالىق جانە ايماقتىق بىرلەستىكتەردەگى جۇمىس تاجىريبەسىن ەسكەرە وتىرىپ, ءتۇركيا توراعالىعى ازيا كەڭەسى قىزمەتىن جاڭا دەڭگەيگە شىعاراتىنىنا سەنىم ارتتى.
كەزدەسۋدە اۋعانستان ماسەلەسى دە قوزعالدى.