سەمەيدەگى ابايدىڭ مەملەكەتتىك تاريحي-مادەني جانە ادەبي-مەموريالدىق قورىق-مۇراجايىنا ادەبيەتشى-عالىم جاندوس ءاۋباكىردىڭ باسشى بولىپ كەلگەنىنە ءبىر جىلدان ەندى عانا استى. سول از عانا ۋاقىتقا قاراماستان, مۇندا بىرقاتار يگىلىكتى ىستەر تىندىرىلىپ ۇلگەرىلدى. ەڭ باستىسى, وسى مەرزىم ىشىندە حاكىم ابايدىڭ 165 جانە اقىن مۇراجايىنىڭ 70 جىلدىعى ءوز مانىندە رۋحاني تۇرعىدا دۇركىرەپ ءوتتى. وسى مەرەكەلەر اياسىندا دانىشپان اقىن ءومىرى مەن شىعارماشىلىعىن جيناپ, باستىرۋ, ناسيحاتتاۋ ىسىنە قاتىسى بولعان مۇرسەيىت, ءارحام, احات, كامەن سىندى تاريحي تۇلعالاردىڭ مەرەيتويلارى دا كەڭىنەن اتالىپ ءوتىلدى. سونداي اسەرلى كەشتەر بارىسىندا قىزىقتى دەرەكتەر مولىنان ايتىلدى.
مۇنى ءبىر دەسەڭىز, ەكىنشىدەن, وتكەن جىلى «اباي مۇراجايىنىڭ حابارشىسى» دەگەن جاڭا جۋرنالدىڭ العاشقى سانى جارىق كوردى. ونىڭ مەنشىك يەلەرى رەسپۋبليكا مادەنيەت مينيسترلىگى مەن اباي قورىق مۇراجايىنىڭ ءوزى بولىپ تابىلادى. جۋرنال جىلىنا ءتورت رەت شىعادى. ونىڭ العاشقى سانى مادەنيەت ءمينيسترى مۇحتار قۇل-مۇحاممەدتىڭ قۇتتىقتاۋ سوزىمەن اشىلعان. ودان ارىدە «ابايتانۋ», شاكارىمتانۋ», «مۇحتارتانۋ», «الاشتانۋ», «ولكەتانۋ», «مۋزەيتانۋ» جانە باسقا ايدارلارمەن مازمۇندى ماقالالار مەن تىڭ دەرەكتەر جاريالانعان.
مۇنىڭ سىرتىندا وسى مەرزىم ىشىندە «اباي مۇراجايىنىڭ كىتاپحاناسى» سەرياسىمەن «اباي تۋرالى ەستەلىكتەر» جانە «مۇتىلعاننىڭ تاعدىرى» دەگەن اتپەن كولەمدى ەكى جيناق جانە جارىق كوردى. اباي مەن شاكارىم ءومىرىنەن سىر شەرتەتىن بۇل دۇنيەلىكتەردىڭ دە ايتارى كوپ. اتالعان سەريا اياسىندا «ابايدىڭ مەملەكەتتىك قورىق-مۇراجايىنىڭ ءجادىگەرلەرى», «شاكارىمنىڭ سايات قوراسى», «كوكبايدىڭ مەشىت-مەدىرەسەسى», «ءشاكىر ابەن ۇلىنىڭ مۇراجاي-ءۇيى», «احمەت ريزا مەدىرەسەسى» كىتاپشالارىنىڭ دا جارىق كورۋى وڭدى شارۋا بولدى.
داۋلەت سەيسەن ۇلى, سەمەي.