ءسوز زەرگەرى عابيت مۇسىرەپوۆ وسىلاي جازعان ەكەن. قامشىنىڭ سابىنداي قىسقا عۇمىرىندا باعا جەتپەس مۇرا قالدىرعان شوقان ءۋاليحانوۆتىڭ تۋعانىنا 175 جىل تولۋىنا وراي ورىس تىلىندە «ش.ءۋاليحانوۆ. ەنتسيكلوپەديا» جيناعى جارىق كوردى. ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ كافەدرا مەڭگەرۋشىسى, تاريح عىلىمدارىنىڭ دوكتورى, پروفەسسور قادىرجان قابيدەن ۇلىنىڭ جەتەكشىلىگىمەن قۇراستىرىلعان بۇل ەڭبەك تەك عىلىمي ورتاعا ەمەس, بارشا وقىرمان قاۋىمعا بەرەرى مول باسىلىم بولىپ تابىلادى.
ەنتسيكلوپەديا ءۇش بولىمنەن تۇرادى. ءبىرىنشى ءبولىمدى العىسوز جانە اكادەميك الكەي مارعۇلاننىڭ «ش.ش.ءۋاليحانوۆتىڭ ءومىرى مەن قىزمەتى» دەپ اتالاتىن كولەمدى وچەركى قۇراعان. بۇل, ارينە بەلگىلى شوقانتانۋشى-عالىم رۋحىنا دەگەن قۇرمەت. بارىنشا تولىق اقپارات بەرىلگەن بيوگرافيالىق جانە انىقتامالىق ماقالالاردان تۇراتىن ەكىنشى ءبولىم - كىتاپتىڭ باستى ەرەكشەلىگى. ەنتسيكلوپەديا شوقان شىڭعىس ۇلىنىڭ قالامىنان شىققان اۆتوپورترەت پەن پورترەتتەرگە, شەجىرە مەن كارتالارعا, وسى كۇندەرى جاسالعان تاقىرىپقا ساي ءتۇرلى-ءتۇستى فوتوسۋرەتتەرگە باي. ءۇشىنشى ءبولىم پروفەسسور ق.ابۋەۆتىڭ «شوقان ءۋاليحانوۆتىڭ الەمى» وچەركىمەن, اقىن, قوعام قايراتكەرى كاكىمبەك سالىقوۆتىڭ «شوقان ءۋاليحانوۆ جانە قانىش ساتباەۆ» اتتى زەرتتەۋىمەن قورىتىندىلانعان. وقىرماندارعا جول تارتقان وسى ءبىر قۇندى ەڭبەك شوقان شىڭعىس ۇلى ءۋاليحانوۆ فەنومەنىنە ارنالعان كىتاپتاردىڭ, ءومىربايانىن زەرتتەيتىن عىلىمي ەڭبەكتەردىڭ جاڭا ءبىر تولاسسىز تولقىنىنا سەبەپكەر بولۋعا لايىق العىشارتتارعا يە.
گۇلشات نۇرىمبەتوۆا, مەملەكەت تاريحى ينستيتۋتىنىڭ ءبولىم باستىعى,
ساياسي عىلىمدار دوكتورى.
مارال تومانوۆا, عىلىمي قىزمەتكەر, الەۋمەتتانۋ ماگيسترى