...كەلىسىم-شارتقا وتىردى
تاياۋدا «تەڭىزشەۆرويل» جشس كاسىپورىن قىزمەتكەرلەرى بىرلەستىگىمەن جانە تەڭىز مۇناي-گاز كەشەنى كاسىپوداعىمەن جاڭا ۇجىمدىق كەلىسىم-شارتقا وتىرعاندىعىن جاريالادى. «ءبىزدىڭ تابىسىمىز كاسىبي بىلىكتىلىگى جوعارى قىزمەتكەرلەر مەن مەردىگەر ۇيىمداردىڭ جۇمىسىنا نەگىزدەلگەن. ءبىز الەمدىك دەڭگەيدەگى جۇمىس جاعدايىن تۋعىزۋعا جانە قىزمەتكەرلەرىمىزدىڭ ءمۇددەسىنە ساي كەلەتىن قوماقتى الەۋمەتتىك پاكەت بەرۋگە ۇمتىلۋدامىز. ۇجىمدىق كەلىسىم-شارت ۇدەرىسى تشو باسشىلىعىنا قىزمەتكەرلەردىڭ جانە كومپانيانىڭ مۇددەلەرىن قامتاماسىز ەتۋگە كومەكتەسەدى», – دەپ اتاپ ءوتتى «تەڭىزشەۆرويل» جشس باس ديرەكتورى تيم ميللەر.
«ءبىز الەۋمەتتىك پاكەت اياسىن كەڭەيتە تۇسكەن جاڭا كەلىسىم-شارت ناتيجەسىنە ريزا بولدىق», – دەگەندى ايتتى تشو قىزمەتكەرلەرى بىرلەستىگىنىڭ ءتوراعاسى امانجول الىباەۆ.
جولداسبەك شوپەعۇل.
اتىراۋ وبلىسى.
* * *
...اكۆاپاركتىڭ قۇرىلىسى
جالپى اۋماعى التى مىڭ شارشى مەتر جەردى الىپ جاتقان سۋ كەشەنى ءبىر مىڭ ادامعا دەيىن قىزمەت كورسەتە الادى. كانادانىڭ زاماناۋي قوندىرعىلارى ورناتىلىپ, بيىكتىگى – 18,5, ۇزىندىعى 26 مەتردى قۇرايتىن بولادى. حالىقارالىق تالاپتارعا ساي تۇرعىزىلاتىن باسسەيندى بويلاپ ءتورت وتباسىلىق سىرعاناق سالىنادى. ولاردىڭ ۇزىندىعى – 150 مەتر. مۇندا سپورت زالى, فيتنەس ورتالىعى مەن مۇز ايدىنى دا ورنالاسادى.
پەتروپاۆل ورانجەرەياسى جانىندا بوي كوتەرەتىن كەشەندى اتتراكتسيوننىڭ قۇرىلىس جۇمىستارىمەن «لەونتەۆ» جشس اينالىسۋدا. اكۆاپاركتى تامىز ايىندا پايدالانۋعا بەرۋ كوزدەلىپ وتىر.
ءومىر ەسقالي.
سولتۇستىك قازاقستان وبلىسى.
* * *
...كوشەگە اتاۋ بەرىلدى
ادامنىڭ ەڭبەگى ەشقاشان ۇمىت قالمايدى. وسىنداي سوڭىنا وشپەس ونەگە قالدىرعاندار قاتارىنداعى قاراسايلىق شەجىرەشى اۋباي بايعازى ۇلىنىڭ ەسىمىمەن قاسكەلەڭ قالاسىنداعى ءبىر كوشە اتالدى.
قاراساي اۋدانىنا قاراستى ايتەي اۋىلىندا دۇنيەگە كەلگەن اۋباي بايعازى ۇلى قاسكەلەڭ قالاسىندا ساۋاتىن اشىپ, قازاق مەملەكەتتىك اۋىل شارۋاشىلىعى ينستيتۋتىن ءتامامداعان سوڭ, ءتۇرلى مەكەمەلەردە باسشىلىق قىزمەتتەر اتقارعان. سونىمەن بىرگە, شىعارماشىلىققا دەن قويىپ, ەل شەجىرەسىن جيناقتاپ, قاعازعا ءتۇسىرۋدى دە ەستەن شىعارماعان. كوپ جىلدار قازاقتىڭ تاريحىن, شىعۋ تەگىن, شەجىرەسىن زەرتتەپ, ءومىرىنىڭ سوڭىنا دەيىن بىرىزدەندىرۋمەن بولعان.
كوكشەتاۋداعى قاراساي مەن اعىنتاي باتىرلاردىڭ جاتقان جەرىنە بەلگىتاس ورناتقانداردىڭ ءبىرى جانە قوس اسىلىمىزعا الىپ كەسەنە سومداۋعا دا ءوزىندىك ۇلەسىن قوسقان جان.
كۇمىسجان بايجان.
الماتى وبلىسى.