ايتپاسا ءسوزدىڭ اتاسى ولەدى. بىلتىرعى جىلى شىلدە ايىندا اقسۋ قالاسى اۋماعىنا قاراستى سارىشىعاناق اۋىلىنىڭ تۇرعىندارى گازەتىمىزگە ءوز ءوتىنىش-ارىزدارىن جازىپ اكەلىپ ەدى. وندا اۋىلداعى جالپى ءبىلىم بەرەتىن ورتا مەكتەپتىڭ ىشىندە اۋىل اكىمدىگى, پوشتا, پوليتسيا ءبولىمشەسى, ءدارىگەرلىك بولمەلەر, كىتاپحانا – ءبارى بىرگە ورنالاسقانىن, ال, كەرىسىنشە, اۋىلدا جەكەشەلەندىرۋ ۋاقىتىنان بەرى بوس تۇرعان ۇيلەر بار ەكەنىن, نەگە بۇلاردى تۇرعىنداردىڭ يگىلىگىنە جاراتۋعا بولمايدى دەپ ساۋال تاستاپ, كومەكتەسۋىمىزدى سۇراعان بولاتىن-دى.
تۇرعىندار وتىنىشىنە وراي سارىشىعاناق اۋىلىنا بارعانىمىزدا ءتىپتى, تاڭقالدىق. ويتكەنى, قازىرگى اكىم ورازكەلدى قايىركەلدينوۆكە دەيىن بۇل قالادا ءۇش-ءتورت اكىم اۋىسىپ كەلىپ-كەتسە دە, اۋىلدىڭ كۇيى وسى قالپىندا قالا بەرىپتى. سودان بەرى ون-ون بەس جىل ۋاقىت وتكەن. ءسويتىپ, ءبىز «جول كارتاسىنان تىس قالعان اۋىل» دەپ گازەتكە ماقالا جاريالادىق. بۇل ماسەلە وبلىس اكىمى باقىتجان ساعىنتاەۆتىڭ دا نازارىنان تىس قالعان جوق. ءسويتىپ, جاڭا جىلدىڭ الدىندا سارىشىعاناقتا جارقىراعان, جابدىقتالعان جاڭا دارىگەرلىك ءبولىمشە اشىلدى. بۇعان جۇرەگى جارىلا قۋانعان اۋىل تۇرعىندارى مۇنداعى جۇرتتىڭ جاي-كۇيىن اشىپ جازعان ەل گازەتى – «ەگەمەنگە» ىرزامىز, دەپ وتىر.
فاريدا بىقاي.
پاۆلودار وبلىسى.