مەن جوعارى ءبىلىمدى, جالپى تەحنيكالىق ءپاندەر مامانىمىن. 16 جىل پەداگوگيكالىق ءوتىلىم بار. ەڭبەك ەتكەن جەرلەرىمنەن العان ماقتاۋ, العىس قاعازدارىم دا جەتەرلىك. بىراق, سوعان قاراماستان, 2005 جىلى شتات قىسقارتۋ كەزىندە جۇمىستان بوساتىلدىم. سودان بەرگى التى جىل ىشىندە باسىمنان وتكەن قيىندىقتى دۇشپانىما دا تىلەمەس ەدىم. ءوزىم جۇمىسسىز, اسىراۋىمدا بالا بار. كۇنكورىس ءۇشىن تىرلىكتىڭ قاندايىنان بولسىن قاشقانىم جوق. ساقىلداعان سارى ايازدا دالادا تۇرىپ شەمىشكە دە ساتتىم.
جۇمىس ىزدەپ بارماعان جەرىم, شىقپاعان تاۋىم قالمادى. ءتىپتى ءبىر بالانىڭ زاڭدى قامقورشىسى ەكەنىمدى دە ەشكىم ەلەپ, ەسكەرمەدى. قالاداعى قازاقشا مەكتەپتەردىڭ كەيبىرىنەن ورىن تابىلعانىمەن, باسپانالى بولۋ قيامەتتىڭ زورى ەكەن. «ەندى باسىمىزداعى پانادان ايرىلۋعا بولماس» دەپ تۋعان جەرىم تارباعاتاي اۋدانى, اقجار اۋىلىنان ۇزاپ ەشقايدا كەتە الماي, مەكتەپ باسشىلارىن جاعالاپ جۇرگەندە ارادا التى جىلدىڭ وتە شىققانىن بايقاماپپىن. سودان بەرى قانشا اكىمنىڭ, قانشا باسشىنىڭ الدىنا بارمادىم دەسەڭىزشى, بىرەۋى قايىرىلمادى.
ءسويتىپ, مەن سياقتى جالعىز-جارىمنىڭ مۇڭ-مۇقتاجىن تىڭدايتىن ادامدى ىزدەپ شارق ۇرىپ جۇرگەنىمدە, شىعىس قازاقستان وبلىسى, تارباعاتاي اۋدانىنىڭ اكىمى بولىپ ماناربەك ساپارعاليەۆ دەگەن ازامات كەلدى. قايدا بارماعان باسىم, ول كىسىنىڭ دە قابىلداۋىندا بولىپ, جىلاپ-ەڭىرەپ جاعدايىمدى ايتتىم. ول كىسى بىردەن ماعان كومەك قولىن سوزىپ, تارباعاتاي اۋدانى, اقجار اۋىلىنداعى م.اۋەزوۆ اتىنداعى مەكتەپكە جۇمىسقا ورنالاستىردى. بارىنەن كۇدەرىمدى ۇزگەن شاقتا حالىقتىڭ قامىن ويلايتىن ادام كەزدەسكەنىنە اللاعا شۇكىرشىلىك ايتتىم. ال اۋەزوۆ مەكتەبىنىڭ باسشىسى ءادىل ەگىنباەۆ دەگەن كىسى وقۋشىلاردىڭ ساپالى ءبىلىم الىپ, سانالى ازامات بولۋى جولىندا جان اياماي, ۋاقىتپەن ساناسپاي ەڭبەكتەنەتىن جان ەكەن. قايناعان ەڭبەكتىڭ ورتاسىنا كەلگەن مەن جۇمىسسىز جۇرگەن جىلدارىمدا تالاي جايدان كەنجەلەپ قالعانىمدى سەزدىم. قازىر «ەسەم كەتسە دە, وسىنداي مىقتى كوشكە ىلەسەر كۇشىم كەتپەسىن» دەپ جۇمىس ىستەپ جۇرگەن جايىم بار. مەنى وسىنداي ەڭبەكشىل ۇجىمنىڭ ورتاسىنا قوسىپ, جۇمىسقا ورنالاستىرعان, سونۋگە اينالعان ءۇمىتىمدى قايتا جاعىپ, ۇلكەن ادامگەرشىلىك تانىتقان تارباعاتاي اۋدانىنىڭ اكىمىنە ايتار العىسىم شەكسىز.
ايگۇل مۇسايپوۆا.
شىعىس قازاقستان وبلىسى, تارباعاتاي اۋدانى, اقجار اۋىلى.