كەشە ەلوردادا اق ازيادانىڭ 1500 مەترلىك قاشىقتىقتاعى كونكيمەن سىرعاناۋ سپورتىنان ەرلەر مەن ايەلدەر اراسىندا وتكەن جارىستىڭ جەڭىمپازدارى مەن جۇلدەگەرلەرى انىقتالدى. اتالعان الاماندا ەرلەر اراسىندا وتانداسىمىز دەنيس كۋزين الدىنا قارا تۇسىرمەي, ازيا چەمپيونى اتانىپ, جاڭا رەكورد جاسادى.
جارىس سىنى باستالماي تۇرىپ جينالعان جەرگىلىكتى جانكۇيەرلەر باسەكەنىڭ ۋاقىتى بەلگىلەنگەن سوڭ, وتانداس سپورتشىلاردىڭ تىلەۋىن تىلەۋمەن وتىردى. ەلىمىز تۋى كوكتە جەلبىرەپ, «قازاقستان العا!» دەپ ۇرانداعان جالىندى جاستاردا تەك ءبىر عانا تىلەك بولاتىن. ول وتانداستاردىڭ اتى وزسا دەگەن اق پەيىل-ءتىن. بۇل نيەت 1500 مەتر قاشىقتىقتاعى ەرلەر سىنىندا قابىل بولعانداي ەدى. ازيانىڭ ازۋىن ايعا بىلەگەن حاس جۇيرىكتەرى جارىسقان بۇل باسەكە قازاقستاندىق دەنيس كۋزيننىڭ جەڭىس تۇعىرىنىڭ ەڭ بيىك ساتىسىنان قول بۇلعاپ, ەل ءانۇرانىن اۋەلەتە شىرقاتقانى ارتىندا تاقىمىن قىسىپ وتىرعان ءدۇيىم جۇرتتىڭ كوڭىلىن تاسىتىپ, مەرەيىن اسىردى. 1 ءمينوت 47,37 سەكونت كورسەتكىشپەن قارسىلاستارىنىڭ ءبارىن دە قاپى قالدىرىپ, قۇستاي ۇشقان دەنيستىڭ ەرلىگىنە سۇيسىنبەگەن جان قالمادى. ءوز جەرىندە ءوتىپ جاتقان بايراقتى سىننىڭ بايىبىن بەرىك سەزىنگەن جامپوزدىڭ بۇل ولجاسى اتالعان سپورتتىڭ وزگە قاشىقتىقتارداعى جارىستارىندا كەتىپ جاتقان ەسەنىڭ ورنىن تولتىرعانداي. سايىپقىران ساڭلاق جارىس جولىنا شىققان ساتتەن جاتتىقتىرۋشىنىڭ شىققان جان داۋىسى كورەرمەندەردى دە بەيجاي قاراتىپ وتىرعىزا المادى. وسى رەتتە جان ۇشىرا ايقايلاپ, جۇيكە جۇقارتقان جاتتىقتىرۋشىلار ەڭبەگىنىڭ ۇشان-تەڭىز ەكەنىن ايتپاي كەتە المايمىز. قالاي دەسەڭىز دە ءتورت جىل بويى توككەن تەردىڭ وتەۋى تارازىعا سالىنار تۇس قوي بۇل. سوندىقتان دا مۇنى ءبىز ءجىتى تۇسىنەمىز.
ەندى جەڭىمپازبەن مارەگە قۇيرىق تىستەسىپ كەلگەن جۇلدەگەرلەرگە كەلەيىك. كۋزينگە نەبارى 0,34 سەكونتكە جول بەرگەن وڭتۇستىك- كورەيالىق ساڭلاق مو تە بۋم قىسقى ازيا ويىندارىنىڭ كۇمىس جۇلدەسىن جەڭىپ الدى. ال قولا مەدال دا وڭتۇستىك كورەيا سپورتشىسىنا بۇيىردى. ونىڭ يەسى – لي كيۋ حيۋك.
ايەلدەر اراسىنداعى سىرعاناۋ باسەكەسى دە جيىلعان جۇرتتى جەلپىندىرۋمەن ءوتتى دەسە بولادى. مۇندا دا جەلپىنگەن جانكۇيەرلەر. ايدىنعا قاي ەلدىڭ سپورتشىسى شىقسا, سول جەردىڭ ءوز جانكۇيەرلەرى ءجيىرەك دەم بەرىپ, ولاردىڭ جارىس جولىندا بارىنشا سەرگەك قيمىلداۋلارىنا جول اشىپ وتىرۋلارى سايىستىڭ اجارىن تىپتەن اشا ءتۇستى دەسەك تە بولادى. ۇكىلەگەن ءۇمىتتەرىن اق ازيادانىڭ بايگەسىنە قوسقان ەلدەر سپورتشىلارى اراسىندا شىن مىقتىلار توپ جارىپ, جانكۇيەر جۇرتىن شەكسىز قۋانىشقا ءبولەدى. سونىمەن قىسقى ازيا ويىندارىنىڭ التىنىن قىتايلىق ارۋ ۋانگ فەي جەڭىپ الىپ, جەرلەستەرىنە تاماشا جەڭىس سىيلادى. ونىڭ كورسەتكىشى – 1 ءمينوت 58,37 سەكونت. ال كۇمىس جۇلدە وڭتۇستىككورەيالىق نوح سەونيەونگقا بۇيىرسا, جۇلدەگەرلەر ۇشتىگىن جاپوندىق جامپوز قىز كودايرا ناو قورىتىندىلادى.
قازاقستان نامىسىن قورعاعان ەكاتەرينا ايتوۆا قولا جۇلدەگە قول سوزىم جەردە قالدى. وسى تۇستا كاتيانىڭ بارىنشا جىلدامدىق تانىتۋعا بارىن سالىپ, ءتورتىنشى ورىنعا تۇراقتاعانىن جاقسى كورسەتكىش دەپ باعالار ەدىك. ال وسى سىندا ونەر كورسەتكەن تاعى ءبىر وتانداسىمىز تاتيانا سوكيركو جالپى ەسەپتە توعىزىنشى ورىنعا تۇراقتادى.
ءيا, بۇل جارىس. جارىس بولعاندا دا قازاقستاندا ءوتىپ جاتقان ازيانىڭ مەنمىن دەگەن ءدۇلدۇلدەرى شەبەرلىكتەرىن سىنعا سالىپ جاتقان ءدۇبىرلى دودا. سول ءۇشىن دە جۇلدەدەن جىلىستاپ قالعان جەرلەستەرىمىزگە ءبىر ءسات تۇسىنىستىكپەن قاراعان دا ءجون شىعار.
ءابدىراحمان قىدىربەك.
* * *
مۇز ايدىنىنىڭ مايتالماندارى
استانادا مانەرلەپ سىرعاناۋشىلار جارىسى باستالدى. ءبىرىنشى كۇنگى سپورتتىق جۇپتار اراسىنداعى تۋرنيردە قىسقا بي, جۇپپەن سىرعاناۋ, ەرلەردىڭ جالعىز سىرعاناۋى بويىنشا جارىس ءوتتى.
ازيادا جارىستارىنىڭ بۇل ءتۇرى اقپان ايىنىڭ ۇشىندە باستالدى. ەرلەردىڭ ەركىن باعدارلاماسى, ايەلدەر اراسىنداعى ەركىن باعدارلاما, مۇزدا بيلەۋ جانە جۇپتار اراسىندا ەركىن باعدارلاماعا 4 التىن كوزدەلىپ وتىر. بۇل سايىسقا قازاقستان اتىنان ابزال راقىمعاليەۆ پەن دەنيس تەن قاتىستى. الدىن الا تاستالعان جەرەبە بويىنشا دەنيسكە 13 سانى, ەكىنشى سپورتشى ابزالعا 6-شى كەزەك بۇيىردى.
ەكىنشى كەزەڭگە جۇپتار اراسىنداعى قىسقا باعدارلامالى ءمانەرلەپ سىرعاناۋعا 4 جۇپ, بارلىعى سەگىز ۇمىتكەر قاتىستى. ونىڭ ەكى جۇبىن قىتايلىق قارسىلاستارىمىز قۇرادى. قازاقستاندىق مانەرلەپ سىرعاناۋشىلار ۆيكتوريا كۋچەرەنكو مەن ۆيكتور اۆدونەۆ قولداۋ كورسەتۋ كەزىندە كەنەتتەن قۇلاپ قالىپ, جارىس بارىسىندا مۇز ايدىنىنا شىعا المادى.
ويىننىڭ ءۇشىنشى ءتۇرى – قىسقا بيگە بەس جۇپ قاتىستى. ولار سولتۇستىك كورەيا, قازاقستان, جاپونيا جانە قىتايلىق ەكى جۇپ. مۇندا قازاقستان اتىنان ۆيكتور اۆدونەۆ پەن ۆيكتوريا كۋچەرەنكو شىعۋ كەرەك بولاتىن. الايدا, بۇل جۇپ مۇز ۇستىندە جولى بولمادى. قازاقستاننىڭ مانەرلەپ سىرعاناۋشى جەتەكشىلەرىنىڭ ءبىرى يۋري گۋسكوۆ ۆيكتوردىڭ مۇز ايدىنىنا دەنە قىزۋى 38-گە كوتەرىلىپ, اۋىرىپ شىققاندىعىن ايتتى.
ناتيجەسىندە, قىسقا بيدە كوشباسشى بولىپ قىتايلىق سپورتشىلار حۆان چينتون مەن جەن كسۋن تانىلدى. ەكىنشى كەزەككە اعالى-قارىنداستى جاپوندىق جۇپ كەتي ريد پەن كريس ريد جايعاستى. ولاردىڭ جاتتىقتىرۋشىلارىنىڭ ءبىرى اتاقتى رەسەيلىك باپكەر – نيكولاي موروزوۆ.
جۇلدىز ءبايدىلدا.
* * *
قۇراماعا قۇرمەت
بەيسەنبى كۇنى استاناداعى «قازاقستان» سپورت سارايىندا حوككەيدەن ەرلەر اراسىندا وينالعان تاعى ءبىر ماتچتا ازياداداعى ەڭ ءىرى ەسەپ تىركەلدى. بۇل كەزدەسۋدە قازاقستان قۇراماسى قىتايلىق تايپەي كومانداسىن 35:0 ەسەبىمەن ويسىراتا ۇتتى.
كەزدەسۋدە العاشقى شايبانىڭ اۆتورى شابۋىلشى ماكسيم حۋدياكوۆ, ال ماتچتا قارسىلاستار قاقپاسىنا ەڭ كوپ شايبا سوققان ويىنشى وڭ جاق قاپتالداعى شابۋىلشى ۆاديم كراسنوسلابودتسەۆ بولدى. ول كەزدەسۋدە قاقپانى 7 رەت ءدال كوزدەپ, ۇزدىك ويىنشى اتاندى. «بارىس» كومانداسىندا ويناپ, سوڭعى كەزدەرى ۇلتتىق قۇرامانىڭ ساپىندا كوزگە ءتۇسىپ ءجۇرگەن تالعات جايلاۋوۆ بولسا, بۇل جولى 3 شايبا سوعىپ ۇلگەردى.
ال ەرتەڭ «قازاقستان» سپورت سارايىندا ساعات 14.00-دە باستالاتىن قازاقستان مەن جاپونيا قۇراماسىنىڭ كەزدەسۋىندە الاڭ يەلەرى تاعى دا جەڭىسكە قينالماي جەتەدى دەپ سەنەمىز.
كەشە ۇلتتىق قۇراما كەلەسى كەزدەسۋىن وڭتۇستىك كورەيا كومانداسىمەن وتكىزدى. بۇل ماتچتاعى ەسەپ 8:1, تايلاند پەن موڭعوليا اراسىنداعى ويىن 7:1 بولىپ اياقتالدى.
اراي ۇيرەنىشبەكقىزى.