ەلىمىزدە ينۆەستيتسيا تارتۋعا, ءىرى كاسىپورىندارعا قاجەتتى زاتتاردى شاعىن جانە ورتا بيزنەس نىساندارىنا ورنالاستىرۋ ارقىلى يمپورتتىڭ ۇلەسىن ازايتۋعا باعىت ۇستالۋدا. بۇل باعىتتا وڭىردە قۇرىلعان يندۋستريالىق ايماقتاردىڭ ۇلەسى مول بولماق. «اقتوبە» يندۋستريالىق ايماعى ءوز جۇمىسىن وتكەن جىلى باستاعان بولاتىن. مەملەكەت تاراپىنان يندۋستريالىق ايماقتا ينفراقۇرىلىم جۇرگىزۋگە 5 ميلليارد تەڭگە قارجى ءبولىندى. وسىنشاما قارجىعا ايماققا گاز, ەلەكتر, سۋ جەتكىزىلىپ, تاس جول مەن تەمىرجول سالىندى. ءبىر سوزبەن ايتقاندا «اقتوبە» يندۋستريالىق ايماعىنا تولىقتاي ينفراقۇرىلىم جۇرگىزىلىپ, شاعىن جانە ورتا بيزنەس نىساندارىنىڭ جۇمىس ورىندارىن اشۋلارىنا بارلىق جاعداي جاسالدى.
مىنە, يندۋستريالىق ايماقتىڭ يگىلىگىن پايدالانا وتىرىپ, داعدارىس جاعدايىندا دامۋعا باعىت ۇستاعان كاسىپكەرلەردىڭ ءبىر توبى جاڭا ءوندىرىس ورىندارىن اشۋعا بەل بۋعان ەكەن. مۇندا ءبىر كۇندە قۇنى 10 ميلليارد تەڭگە بولاتىن بەس بىردەي ءوندىرىس ورنىنىڭ قۇرىلىسى باستالدى.
– ءبىزدىڭ «اقتوبە» الەۋمەتتىك كاسىپكەرلىك كورپوراتسياسى دا وسىندا قونىس اۋداردى. كورپوراتسيا يندۋستريالىق ايماققا كاسىپكەرلەردى تارتۋ بويىنشا جۇمىستاردى بەلسەندى جۇرگىزۋگە ىقپال ەتۋدە. ءبىز بەلسەندى ماركەتينگتىك جۇمىستار جۇرگىزدىك, ءوزىمىزدىڭ جاڭا سايتىمىزدى اشتىق. الەۋمەتتىك جەلىلەردە پاراقشالارىمىزدى اشىپ, ءوز مۇمكىندىگىمىزدى اشىپ كورسەتتىك. سونىڭ ناتيجەسىندە باستاپقى كەزەڭدە عانا قۇنى 24 ميلليارد تەڭگە بولاتىن 9 ءوتىنىش ءتۇستى, بۇگىنگى تاڭدا سولاردىڭ اراسىنان وڭىرلىك كوميسسيانىڭ قولداۋىنا يە بولعان بەس جوبانىڭ جۇمىسىن باستاعالى وتىر, – دەيدى «اقتوبە» الەۋمەتتىك-كاسىپكەرلىك كورپوراتسياسىنىڭ باسشىسى قايرات بەكەنوۆ بىزبەن اڭگىمەسىندە.
يندۋستريالىق ايماقتا ورنالاساتىن كاسىپورىندار ءۇشىن ەلەكتر قۋاتى مەن گاز اناعۇرلىم ارزانعا تۇسەدى. مۇنىڭ ءوزى ينۆەستورلار ءۇشىن ۇلكەن قولداۋ بولىپ وتىرعانى ءسوزسىز.
«اقتوبە» يندۋستريالىق ايماعىندا باستاۋ العان بەس ءوندىرىس ورنىنىڭ ىرگەتاسىن قالاۋ سالتاناتتى شاراسىنا وبلىس اكىمى بەردىبەك ساپارباەۆ قاتىسىپ, كاسىپورىندار قۇرىلىسىنىڭ باستالعانىنىڭ بەلگىسى رەتىندە كاپسۋل سالدى.
ءىرى جوبالاردىڭ ءبىرى قۇنى 6 ميلليارد تەڭگە بولاتىن «زەردە كەراميكا اكتوبە» جشس يتاليالىق تەحنولوگيا بويىنشا كەراموگرانيت پەن كەراميكالىق پليتالار شىعارادى. بۇل جوبا 2017 جىلدىڭ اياعىنا تامان پايدالانۋعا بەرىلەدى. كاسىپورىن جىلىنا 5 ميلليون شارشى مەتر كەراموگرانيت جانە كەرەميكا پليتالارىن وندىرەدى. مۇندا ەكى يتاليالىق جەلى ورناتىلادى. جوبا ىسكە قوسىلعاندا 180 ادام ەڭبەك ەتەدى.
– ءبىزدىڭ «زەردە» كومپانيالار توبىنىڭ شىمكەنت قالاسىندا جۇمىس ىستەپ تۇرعان وسىنداي كاسىپورىنى بار. ونىڭ جىلدىق قۋاتى 1,8 ميلليون شارشى مەتر كەراموگرانيت جانە كەراميكا پليتالارىن شىعارۋعا ەسەپتەلگەن. ءبىزدىڭ تاڭداۋىمىزدىڭ اقتوبەگە ءتۇسۋ سەبەبى, مۇندا ەلەكتر قۋاتى مەن گازبەن قامتۋ اناعۇرلىم ارزان, سونداي-اق, جاقىن ورنالاسقان شيكىزات كەن ورىندارى بار. ورنالاسقان جەرى دە كاسىپورىننىڭ دامۋىنا قولايلى, رەسەيگە جاقىن, شيكىزات جانە باسقا ماتەريالداردى جەتكىزۋ ارزانعا تۇسەدى. ءبىز وندىرەتىن كەراموگرانيت جانە كەراميكا پليتالارى رەسەيدەگى, تۇركياداعى جانە قىتايداعى باسەكەلەستەرىمىزگە قاراعاندا ساپالى دا ارزان بولادى. وندىرىلگەن ءونىمنىڭ 30 پايىزى ەكسپورتقا, 70 پايىزى ىشكى نارىققا شىعارىلادى. بۇل ءبىزدىڭ تەز ارادا جوبالىق قۋاتقا شىعۋىمىزعا العىشارت جاسايدى,–دەيدى «زەردە» كومپانيالار توبىنىڭ باس ديرەكتورى مۇحتار بيتەمىروۆ.
ال «پوليۆەست» جشس – بۇرىننان جۇمىس ىستەپ كەلە جاتقان كاسىپورىن. الايدا, عيماراتتى جالعا الىپ كەلگەن. ەندى ءوز الدىنا شاڭىراق كوتەرمەكشى. سول ءۇشىن 1 گەكتار جەر الىپ, مەديتسيناعا جانە ساۋداعا قاجەتتى پوليەتيلەن پاكەتتەرىن شىعاراتىن زاۋىت سالۋعا كىرىسىپ وتىر. بولاشاقتا تاعى ءبىر گەكتار جەر الىپ, ءوندىرىسىن كەڭەيتۋگە باعىت ۇستاۋدا. قازىردىڭ وزىندە ەلىمىزدىڭ اتىراۋ, استانا جانە قاراعاندى قالالارىنا ونىمدەرىن وتكىزۋدە. كورشىلەس رەسەيدىڭ سامار وبلىسىنا دا شىعارۋدا. مۇندا 60 جاڭا جۇمىس ورنى اشىلادى. ايىنا 100 توننا پوليەتيلەن پاكەتتەرى شىعارىلادى. بۇل كاسىپورىن شىعاراتىن پوليەتيلەن پاكەتتەر ەكولوگيالىق تازا ءونىم بولىپ تابىلادى.
«FIBC Kazakhstan» جشس پوليەتيلەن مەن پوليپروپيلەننەن قوراپتار, ءىرى ونەركاسىپ مەكەمەلەرى ءۇشىن جۇمساق كونتەينەرلەر وندىرەدى. «Talan Technology» كومپانياسى جارامسىز بولىپ قالعان اۆتوموبيل دوڭگەلەكتەرىن وڭدەپ, سپورت ۇيىمدارىنا قاجەتتى تاقتا توسەنىشتەر, ال «اقتوبە TOPSA پلاست» اينەك جۋاتىن سۇيىقتىق پەن انتيفريز, ەرىتكىشتەر مەن حيميالىق رەاگەنتتەر شىعارۋمەن اينالىسادى.
قۇرىلىس جۇمىستارى باستالىپ وتىرعان جوبالاردىڭ جالپى قۇنى 10 ميلليارد تەڭگەدەن اسادى. اتالعان جوبالار جۇزەگە اسىرىلعاندا بيۋدجەتكە جىلىنا شامامەن 1 ميلليارد تەڭگە سالىق تۇسەدى, 315 جۇمىس ورنى اشىلادى دەپ كۇتىلۋدە.
سالتاناتتى شارادان كەيىن وبلىس اكىمى بەردىبەك ساپارباەۆ «اقتوبە» اكك وكىلدەرى, مەملەكەتتىك مەكەمەلەر, ءىرى كاسىپورىندار باسشىلارىمەن جانە بيزنەس وكىلدەرىمەن «اقتوبە» يندۋستريالىق ايماعىندا جاڭا وندىرىستىك قۋاتتاردى ىسكە قوسۋ ماسەلەلەرىنە ارنالعان كەڭەس وتكىزدى. كەڭەستە ول وڭىردە كاسىپكەرلىكتى دامىتۋدىڭ مۇمكىندىگى مول ەكەنىنە ايرىقشا توقتالىپ, ءىرى كاسىپورىندار اراسىندا قازاقستاندىق ۇلەستى ارتتىرۋدىڭ, يمپورتتىڭ ۇلەسىن ازايتۋدىڭ ءالى دىتتەگەن دەڭگەيگە كوتەرىلمەي وتىرعانىن سىنعا الدى. بۇل باعىتتا جۇمىستى بۇرىنعىدان دا شيراتا ءتۇسۋ قاجەتتىگىن قاداپ ايتتى. جيىندا «اقتوبە» يندۋستريالىق ايماعىنىڭ مۇمكىندىكتەرىن ءتيىمدى پايدالانۋ, ونەركاسىپتىك كلاستەر قۇرۋ جانە كاسىپكەرلىك قىزمەتتى ارتتىرۋ ماقساتىندا ءىرى كاسىپورىندار مەن شاعىن جانە ورتا بيزنەستىڭ ارىپتەستىك قاتىناسىن دامىتۋ جايى اڭگىمە وزەگىنە اينالدى.
ءوڭىر باسشىسى يندۋستريالىق اۋماقتىڭ بىلتىر قولدانىسقا بەرىلگەنىن, الايدا كۇنى بۇگىنگە دەيىن ونىڭ اۋماعىندا بىردە-ءبىر جوبانىڭ جۇزەگە اسىرىلماعانىن اتاپ ءوتتى.
– 5 ميلليارد تەڭگە جۇمسالعان ينفراقۇرىلىم جۇمىسى بوس تۇرىپ قالدى, كەيبىر جابدىقتارى قولدى بولدى. «اقتوبە» اكك-گە ينۆەستورلار تارتۋ جونىندە تاپسىرما بەرىلدى. سونىمەن بىرگە, ءىرى كومپانيالاردىڭ باسشىلارىنا شاعىن جانە ورتا بيزنەسكە كومەكتەسۋلەرىن سۇرادىق. بۇل جۇمىستىڭ تيىمدىلىگى كوزگە كورىنىپ تۇر. بۇگىندە 5 جاڭا ءوندىرىس ورنىنىڭ ىرگەتاسى قالاندى, – دەدى وبلىس باسشىسى.
شارا سوڭىندا وبلىس اكىمدىگى جانە كاسىپورىندار باسشىلارى اراسىندا جۇزەگە اسىرىلعالى وتىرعان جوبالار بويىنشا مەموراندۋمدارعا قول قويىلدى.
ساتىبالدى ءساۋىرباي,
«ەگەمەن قازاقستان»
اقتوبە وبلىسى